ວາລະສານອີໄບໂອເມດິຊີນ (eBioMedicine) ລາຍງານຜົນການສຶກສາສະບັບໜຶ່ງ ຊຶ່ງລະບຸວ່າສານເຄມີທີ່ກວດພົບໃນບັນຈຸພັນອາຫານ, ພລາສຕິກ, ລວມເຖິງໂລຊັ່ນ ແລະ ແຊມພູ ມີສ່ວນເຊື່ອມໂຍງກັບກໍລະນີຜູ້ເສຍຊີວິດຈາກພະຍາດຫົວໃຈຫຼາຍແສນຄົນ.

 

ຄະນະນັກຄົ້ນຄວ້າພົບວ່າສານເຄມີເຫຼົ່ານີ້ ຫຼື ສານພາທາເລດ (phthalates) ມີສ່ວນກ່ຽວຂ້ອງກັບການເສຍຊີວິດຂອງຄົນທົ່ວໂລກຫຼາຍກວ່າ 3.5 ແສນຄົນໃນປີ 2018 ຊຶ່ງປະມານຮ້ອຍລະ 75 ຢູ່ໃນອາຊີ, ຕາເວັນອອກກາງ ແລະ ປາຊີຟິກ, ສະທ້ອນຄວາມກັງວົນທີ່ເພີ່ມຂຶ້ນກ່ຽວກັບປະລິມານການແຜ່ກະຈາຍຂອງພລາສຕິກໃນກຸ່ມປະເທດກຳລັງພັດທະນາ.

 

ເດິ ວໍຊິງຕັນ ໂພສຕ໌ ລາຍງານວ່າຄະນະນັກຄົ້ນຄວ້າຍອມຮັບວ່າການສຳຜັດສານພາທາເລດເປັນປັດໄຈຮ່ວມກັບຄວາມສ່ຽງອື່ນໆ ເຊັ່ນ: ພະຍາດອ້ວນ ແລະ ຄວາມຜິດປົກກະຕິຂອງລະບົບຈ່ອຍສະຫຼາຍ.

 

ແຕ່ຜົນການສຶກສານີ້ເປັນອີກໜຶ່ງຫຼັກຖານທີ່ບົ່ງຊີ້ວ່າສານເຄມີທີ່ໃຊ້ໃນພລາສຕິກກໍ່ໃຫ້ເກີດຄວາມສ່ຽງຕໍ່ສຸຂະພາບຢ່າງຮ້າຍແຮງ.

 

ສານພາທາເລດເປັນຊຸດສານເຄມີທີ່ເຂົ້າໃນພລາສຕິກເພື່ອສ້າງຄວາມຢືດຢຸ່ນຫຼືອ່ອນນຸ້ມຍິ່ງຂຶ້ນ ແລະ ເຕີມເຂົ້າໃນໂລຊັ່ນ, ແຊມພູ ແລະ ນ້ຳຫອມເພື່ອກັກເກັບກິ່ນໃຫ້ຕິດທົນນານ.

 

ແຕ່ສານເຄມີຕົວນີ້ທີ່ນັກຄົ້ນຄວ້າບາງສ່ວນຮຽກວ່າ “ສານເຄມີທຸກຫົນແຫ່ງ” ໄດ້ປຸກກະແສວິຕົກກັງວົນຈາກນັກວິທະຍາສາດໃນວົງກວ້າງ.

ສະແດງຄຳຄິດເຫັນ