ທຳນຽບຂາວປະກາດວ່າ ຊາອຸດີອາຣາເບຍໄດ້ເຮັດຂໍ້ຕົກລົງການລົງທຶນກັບສະຫະລັດອາເມຣິກາ ໃນວົງເງິນ 600,000 ລ້ານໂດລາ

 

ໃນລະຫວ່າງທີ່ປະທານາທິບໍດີໂດນັລ ທຣຳ ເດີນທາງຢ້ຽມຢາມຊາອຸດີອາຣາເບຍເມື່ອ ວານນີ້ (13 ພຶດສະພາ) ຊຶ່ງເປັນໜຶ່ງໃນພາລະກິດຢ້ຽມຢາມຕາເວັນອອກກາງ

 

ໜຶ່ງໃນຂໍ້ຕົກລົງທີ່ສຳຄັນຄື ຂໍ້ຕົກລົງຂາຍອາວຸດເກືອບ 142,000 ລ້ານໂດລາ ໂດຍສະຫະລັດຈະຈັດຫາຍຸດໂທປະກອນທີ່ລ້ຳສະໄໝໃຫ້ແກ່ຊາອຸດີອາຣາເບຍ ຊຶ່ງເປັນການເຮັດຂໍ້ຕົກລົງກັບບໍລິສັດຜະລິດອາວຸດຂອງສະຫະລັດຫຼາຍກວ່າ 10 ແຫ່ງ ແລະ ວົງເງິນໃນຂໍ້ຕົກລົງດັ່ງກ່າວສູງເກືອບ 2 ເທົ່າຂອງງົບປະມານປ້ອງກັນປະເທດຂອງຊາອຸດີອາຣາເບຍໃນປີນີ້ ຊຶ່ງຢູ່ທີ່ 78,000 ລ້ານໂດລາ

 

ດ້ານມົງກຸດຣາຊະກຸມານ ໂມຮຳເໝັດ ບິນ ຊັລມານ ແຫ່ງຊາອຸດີອາຣາເບຍ ກ່າວວ່າ ເປົ້າໝາຍຂອງການລົງທຶນດັ່ງກ່າວແມ່ນເພື່ອຍົກລະດັບຄວາມຮ່ວມມືລະຫວ່າງສະຫະລັດອາເມຣິກາ ແລະ ຊາອຸດີອາຣາເບຍ ໃຫ້ມີມູນຄ່າສູງເຖິງ 1 ລ້ານລ້ານໂດລາ ໂດຍຄອບຄຸມດ້ານການທະຫານ, ຄວາມໝັ້ນຄົງ, ເສດຖະກິດ, ແລະ ເຕັກໂນໂລຊີ

 

ຕົວເລກການລົງທຶນຄັ້ງນີ້ ຍັງລວມເຖິງເມັດເງິນລົງທຶນຮ່ວມກັນມູນຄ່າ 80,000 ລ້ານໂດລາ ຈາກບໍລິສັດ DataVolt // Google // Oracle // AMD // ແລະ Uber ສຳລັບການລົງທຶນທັງໃນສະຫະລັດອາເມຣິກາ ແລະ ຊາອຸດີອາຣາເບຍ

 

 

ນອກຈາກນີ້ ທ່ານທຣຳໄດ້ປະກາດໃນລະຫວ່າງການຢ້ຽມຢາມຊາອຸດີອາຣາເບຍວ່າ ເພິ່ນວາງແຜນຈະຍົກເລີກມາດຕະການຄວ່ຳບາດຕໍ່ຊີເຣຍ ຫຼັງຈາກລັດຖະບານຂອງທ່ານ ບາຊາ ອັລ-ອັສຊາດ ລົ້ມສະລາຍ ການເຮັດເຊັ່ນນີ້ຈະມອບໂອກາດໄປສູ່ຄວາມຍິ່ງໃຫຍ່ໃຫ້ແກ່ຊີເຣຍ

 

ທ່ານທຣຳລະບຸດ້ວຍວ່າ ເພິ່ນຕັດສິນໃຈເລື່ອງການຍົກເລີກຄວ່ຳບາດຊີເຣຍ ຫຼັງຈາກໄດ້xປຶກສາຫາລືກັບເຈົ້າຊາຍໂມຮຳເໝັດ ບິນ ຊັລມານ ມົງກຸດຣາຊະກຸມານແຫ່ງຊາອຸດີອາຣາເບຍ ລວມເຖິງ ທ່ານເຣເຈບ ໄຕຢິບ ເອໂດອັນ ປະທານາທິບໍດີຕຸລະກີ

 

ທີ່ຜ່ານມາຊີເຣຍ ປະເຊີນການດູຖູກ ສົງຄາມ ການສູ້ຮົບມາເປັນເວລາຫຼາຍປີ ນັ້ນຄືເຫດຜົນທີ່ຈະເລີ່ມກ້າວແລກໄປສູ່ການຟື້ນຟູຄວາມສຳພັນລະດັບປົກກະຕິ ລະຫວ່າງສະຫະລັດອາເມຣິກາກັບຊີເຣຍເປັນຄັ້ງທຳອິດໃນຮອບກວ່າ 10 ປີ ສ່ວນທ່ານມາໂກ ຣູບິໂອ ລັດຖະມົນຕີວ່າການກະຊວງການຕ່າງປະເທດ ຈະພົບລັດຖະມົນຕີຝ່າຍຊີເຣຍ ທີ່ຕຸລະກີໃນຊ່ວງທ້າຍອາທິດນີ້

 

ດ້ານທຳນຽບຂາວສະຫະລັດອາເມຣິກາ ຢືນຢັນວ່າ ທ່ານທຣຳ ກັບທ່ານ ອາຫມັດ ອັລ-ຊາຣາ ປະທານາທິບໍດີຄົນໃໝ່ຂອງຊີເຣຍ ແລະ ອະດີດຜູ້ນຳກຸ່ມຕິດອາວຸດຜູ້ໂຄ່ນລົ້ມລັດຖະບານອັສຊາດ ຈະໄດ້ພົບປະກັນຢ່າງບໍ່ເປັນທາງການ ທີ່ກຸງຣິຢາດ ຂອງຊາອຸດີອາຣາເບຍ ໃນມື້ນີ້ (14 ພຶດສະພາ)

 

ທັງນີ້ ທ່ານທຣຳຢູ່ໃນລະຫວ່າງພາລະກິດການຢ້ຽມຢາມຕາເວັນອອກກາງ ຈຸດໝາຍໃນການເດີນທາງລຳດັບຕໍ່ໄປແມ່ນປະເທດກາຕາໃນມື້ນີ້ (14 ພຶດສະພາ) ແລະ ສະຫະລັດອາຣັບເອມິເຣດ ຫລື ຢູເອອີ ໃນວັນທີ 15 ພຶດສະພາ ແຕ່ບໍ່ໄດ້ໄປຢ້ຽມຢາມອິສຣາເອນ ທີ່ເປັນພັນທະມິດໃກ້ຊິດຂອງສະຫະລັດອາເມຣິກາ

ສະແດງຄຳຄິດເຫັນ