ມອນເຕວິເດໂອ 15 ພຶດສະພາ- ໂຮເຊ ມູຮິກາ ອະດີດປະທານາທິບໍດີອູຣູກວາຍ ຜູ້ທີ່ໄດ້ຊື່ວ່າເປັນປະທານາທິບໍດີທີ່ທຸກຍາກທີ່ສຸດໃນໂລກ ເສຍຊີວິດແລ້ວເມື່ອວັນອັງຄານ ດ້ວຍໄວ 89 ປີ

 

ປະທານາທິບໍດີ ຍາມານດູ ອໍຊີ ຜູ້ນຳອູຣູກວາຍຄົນປັດຈຸບັນ ປະກາດຂ່າວການເສຍຊີວິດຂອງອະດີດປະທານາທິບໍດີມູຮິກາ ຜ່ານທາງແພລດຟອມເອັກຊ໌ ແລະ ລັດຖະບານອູຣູກວາຍປະກາດໄວ້ອາໄລທົ່ວປະເທດ 3 ວັນ

 

ກ່ອນຈະຈັດລັດຖະພິທີສົບໃນມື້ນີ້ຕາມເວລາທ້ອງຖິ່ນ. ສາເຫດການເສຍຊີວິດຂອງເຂົາຍັງບໍ່ເປັນທີ່ຮູ້ຊັດເຈນ ແຕ່ມູຮິກາເຈັບເປັນໂຣກມະເຮັງຫຼອດອາຫານມາເປັນເວລາຫຼາຍປີ.

 

ໂຮເຊ ມູຮິກາ ຫຼື ທີ່ຮູ້ຈັກກັນໃນຊື່ ‘ເປເປ’ ເປັນອະດີດນັກຮົບກອງໂຈນທີ່ກ້າວຂຶ້ນປົກຄອງອູຣູກວາຍຕັ້ງແຕ່ປີ 2010-2015 ເປັນທີ່ຮູ້ຈັກໃນຖານະປະທານາທິບໍດີທີ່ທຸກຍາກທີ່ສຸດໃນໂລກ ຈາກວິຖີຊີວິດທີ່ລຽບງ່າຍ.

 

ມູຮິກາປະຕິເສດທີ່ຈະຍ້າຍເຂົ້າໄປຢູ່ໃນເຮືອນພັກປະທານາທິບໍດີ ເຊັ່ນດຽວກັບທີ່ຜູ້ນຳປະເທດຕ່າງໆ ທົ່ວໂລກມັກຈະເຮັດ ແຕ່ເຂົາຍັງຄົງຢູ່ກັບເມຍ ຊຶ່ງເປັນນັກການເມືອງແລະອະດີດນັກຮົບກອງໂຈນ ໃນເຮືອນຫຼັງນ້ອຍໆ ຊານກຸງມອນເຕວິເດໂອ ໂດຍບໍ່ມີຄົນຮັບໃຊ້ໃນເຮືອນແລະເກືອບຈະບໍ່ມີເຈົ້າໜ້າທີ່ຮັກສາຄວາມປອດໄພ.

 

ມູຮິກາຍັງມັກແຕ່ງຕົວສະບາຍໆ ມັກຂັບລົດໂຟລຄ໌ສວາເກນບີເທິລສີຟ້າອ່ອນປີ 1987 ໄປຕາມທ້ອງຖະໜົນໃນເມືອງ ແລະ ສະຫຼະເງິນເດືອນສ່ວນໃຫຍ່ໃຫ້ອົງການການກຸສົນ ເຮັດໃຫ້ສື່ບາງສຳນັກເອີ້ນເຂົາວ່າ ‘ປະທານາທິບໍດີທີ່ທຸກທີ່ສຸດໃນໂລກ’.

 

ມູຮິກາຍັງເປັນທີ່ຮູ້ຈັກ ຈາກການທີ່ເຂົາວິພາກວິຈານພຶດຕິກຳບໍລິໂພກນິຍົມ ແລະ ການປະຕິຮູບສັງຄົມຫຼາຍຢ່າງທີ່ເຂົາຜັກດັນ ລວມເຖິງການເຮັດໃຫ້ອູຣູກວາຍເປັນປະເທດທຳອິດທີ່ອະນຸຍາດໃຫ້ມີການໃຊ້ກັນຊາເພື່ອສັນທະນາການ.

 

ມູຮິກາຈຶ່ງກາຍເປັນບຸກຄົນທາງການເມືອງທີ່ມີຊື່ສຽງໃນລາຕິນອາເມລິກາແລະທົ່ວໂລກ.

 

ຂະນະທີ່ເຖິງແມ່ນວ່າລັດຖະບານຂອງເຂົາຈະຖືກວິຈານວ່າລົ້ມເຫຼວເລື່ອງເພີ່ມການໃຊ້ຈ່າຍພາກລັດ ແລະ ແກ້ໄຂບັນຫາການສຶກສາໃນປະເທດບໍ່ສຳເລັດ ແຕ່ສິ່ງໜຶ່ງທີ່ແຕກຕ່າງຈາກຜູ້ນຳຄົນອື່ນໆ ຂອງໂລກ ຄື ມູຮິກາບໍ່ເຄີຍຖືກກ່າວຫາເລື່ອງການທຸຈະລິດ ຫຼື ທຳລາຍຫຼັກປະຊາທິປະໄຕຂອງຊາດ.

 

ຊ່ວງທີ່ກ້າວລົງຈາກຕຳແໜ່ງປະທານາທິບໍດີ ມູຮິກາໄດ້ຮັບຄວາມນິຍົມໃນປະເທດສູງເກືອບ 70% ແລະ ໄດ້ຮັບເລືອກເປັນສະມາຊິກວຸດທິສະພາ ແຕ່ເຂົາໃຊ້ເວລາສ່ວນໜຶ່ງໄປກັບການເດີນທາງຮອບໂລກຫຼັງຈາກລາອອກຈາກຕຳແໜ່ງປະທານາທິບໍດີ ກ່ອນລາອອກຈາກຕຳແໜ່ງ ສວ. ໃນປີ 2018 ຈາກຄວາມເມື່ອຍລ້າຈາກການເດີນທາງທີ່ຍາວໄກ ອີກທັງຍັງປະກາດບໍ່ຂໍຮັບເງິນບຳນານຈາກຊ່ວງທີ່ເຂົາດຳລົງຕຳແໜ່ງ ສວ. ອີກດ້ວຍ.

ສະແດງຄຳຄິດເຫັນ