ສາດສະຕາຈານ ອາຍຸ 96 ປີ ເຜີຍເຄັດລັບການຍືດອາຍຸໃຫ້ຍືນຍາວຂຶ້ນ 20% ງານວິໄຈຂອງອາເມຣິກາສະໜັບສະໜູນ ສ່ວນຍີ່ປຸ່ນເຮັດມານານແລ້ວ

 

ສາດສະຕາຈານຊິລວິໂອ ກາຣັດຕິນີ (Silvio Garattini) ອາຍຸ 96 ປີ ຜູ້ກໍ່ຕັ້ງແລະຜູ້ອຳນວຍການສະຖາບັນວິໄຈເພສັດວິທະຍາ Mario Negri ປະເທດອິຕາລີ ເປີດເຜີຍເຄັດລັບງ່າຍໆ ທີ່ອາດຊ່ວຍໃຫ້ມະນຸດມີອາຍຸຍືນຍາວຂຶ້ນເຖິງ 20% ພຽງແຄ່ “ກິນໃຫ້ໜ້ອຍລົງກວ່າທີ່ຄິດວ່າພໍແລ້ວເລັກນ້ອຍ”

 

“ຄວນລຸກຈາກໂຕະອາຫານຕອນທີ່ຍັງຮູ້ສຶກຫິວໜ້ອຍໜຶ່ງ” ສຈ.ກາຣັດຕິນີ ກ່າວກັບນິຕະຍະສານ Men’s Health ໂດຍຢ້ຳວ່າ ການກິນອາຫານໜ້ອຍລົງປະມານ 30% ຈາກທີ່ຮ່າງກາຍເຄີຍໄດ້ຮັບ ອາດຊ່ວຍຍືດອາຍຸໄຂໄດ້ເຖິງ 20% ຊຶ່ງແນວຄິດນີ້ບໍ່ໄດ້ເປັນພຽງຄວາມເຊື່ອສ່ວນບຸກຄົນ ແຕ່ໄດ້ຮັບການສະໜັບສະໜູນຈາກງານວິໄຈວິທະຍາສາດລະດັບນານາຊາດ

 

ງານວິໄຈຈາກສະຫະລັດຯ ຊີ້ຊັດ ** ລົດແຄລໍຣີ 15% ຊະລໍວັຍ-ລົດໂລກ ** ໂດຍງານວິໄຈພາຍໃຕ້ຊື່ CALERIE ທີ່ຕີພິມໃນວາລະສານ Cell Metabolism ປີ 2018

 

ເປັນການສຶກສາຄວບຄຸມກຸ່ມທຳອິດໃນຄົນທີ່ບໍ່ເປັນໂລກອ້ວນ ໂດຍພົບວ່າ ການລົດປະລິມານແຄລໍຣີລົງ 15% ເປັນໄລຍະເວລາ 2 ປີ ຊ່ວຍຊະລໍກະບວນການເຜົາຜານແລະລົດ “ຄວາມກົດດັນຈາກອອກຊິເດຊັນ” ຊຶ່ງເປັນປັດໄຈຫຼັກທີ່ກ່ຽວຂ້ອງກັບໂຣກຊຳເຮື້ອ ເຊັ່ນ: ອັນໄຊເມີຣ໌ ມະເຮັງ ພາກິນສັນ ເບົາຫວານ ແລະ ຫົວໃຈ

 

ຮສ.ດຣ.ລີແອນ ເຣດແມນ ຈາກສູນວິໄຈ Pennington Biomedical Research Center ສະຫະລັດຯ ຜູ້ຂຽນງານວິໄຈຊີ້ວ່າ “ການຈຳກັດແຄລໍຣີຊ່ວຍໃຫ້ກະບວນການເຜົາຜານຊ້າລົງ ຫາກການເຜົາຜານຫຼາຍເກີນໄປເລັ່ງກະບວນການແກ່ ການລົດແຄລໍຣີຈຶ່ງເປັນວິທີທີ່ອາດຊ່ວຍຍືດອາຍຸໄດ້ແທ້”

 

ຍີ່ປຸ່ນເຮັດມານານແລ້ວ ແນວທາງ Hara Hachi Bu ຈາກໂອກິນາວາ

 

ແນວທາງນີ້ບໍ່ໄດ້ໃໝ່ກັບຄົນຍີ່ປຸ່ນ ໂດຍສະເພາະໃນພື້ນທີ່ “Blue Zone” ຢ່າງໂອກິນາວາ ຊຶ່ງຂຶ້ນຊື່ວ່າເປັນແຫຼ່ງຮວມຂອງຜູ້ສູງອາຍຸສຸຂະພາບດີຫຼາຍທີ່ສຸດແຫ່ງໜຶ່ງຂອງໂລກ ນິຍົມໃຊ້ຫຼັກ “Hara Hachi Bu” ຫຼື “ກິນພຍງແຕ່ 80% ຂອງຄວາມອີ່ມ” ມາຢ່າງຍາວນານ ເພື່ອຮັກສາສຸຂະພາບແລະຍືດອາຍຸໄຂ ໂດຍເຊື່ອວ່າການບໍ່ກິນຈົນອີ່ມເກີນໄປ ຊ່ວຍລົດພາລະການເຮັດວຽກຂອງລະບົບຍ່ອຍອາຫານ ແລະ ລົດຄວາມກົດດັນໃນຮ່າງກາຍ

 

ພດ.ເດໂບຣາຫ໌ ລີ ຈາກສະຫະຣາດຊະອານາຈັກ ອະທິບາຍວ່າ “ການກິນໃຫ້ໜ້ອຍລົງຊ່ວຍໃຫ້ຮ່າງກາຍສ້າງພະລັງງານໜ້ອຍລົງ ຈຶ່ງລົດການເກີດອະນຸມູນອິດສະຫຼະຊຶ່ງເປັນຕົ້ນຕໍຂອງໂລກຊຳເຮື້ອ ເຊັ່ນ: ເບົາຫວານ ມະເຮັງ ຫົວໃຈ ແລະ ສະໝອງເສື່ອມ”

 

ເຖິງຢ່າງໃດກໍດີ ແມ່ນຈະຢ້ຳເລື່ອງການລົດປະລິມານອາຫານ ແຕ່ສາດສະຕາຈານກາຣັດຕິນີຍັງເນັ້ນວ່າ ຄຸນນະພາບຂອງອາຫານກໍມີບົດບາດສຳຄັນບໍ່ແພ້ກັນ ໂດຍແນະນຳໃຫ້ປະຊາຊົນຫັນມາໃຊ້ ອາຫານແບບເມດິເຕີເຣເນຍນ ຊຶ່ງເນັ້ນຜັກ ໝາກໄມ້ສົດ ປາ ນ້ຳມັນໝາກກອກ ຄາໂບໄຮເດຣດເຊີງຊ້ອນ ແລະ ລົດຊີ້ນແດງຫຼືໄຂມັນຈາກສັດ

 

ນັກວິທະຍາສາດແລະແພດ ຫຼາຍຄົນຕ່າງເຫັນພ້ອງວ່າ ອາຫານແປຮູບສູງແລະມີນ້ຳຕານຫຼືໄຂມັນຫຼາຍ ຊຶ່ງເປັນລັກສະນະດັ່ງຂອງອາຫານແບບຕາເວັນຕົກ ອາດເພີ່ມຄວາມສ່ຽງຕໍ່ໂລກຫົວໃຈ ມະເຮັງ ແລະ ຄວາມເສື່ອມຂອງລະບົບປະສາດ

 

ເຄັດລັບການຍືດອາຍຸແບບງ່າຍໆ ທີ່ໃຜກໍເຮັດໄດ້ ຄື “ກິນໃຫ້ໜ້ອຍລົງ” ແລະ ເລືອກອາຫານທີ່ມີຄຸນນະພາບ ຊຶ່ງບໍ່ພຽງຊ່ວຍຍືດອາຍຸ ແຕ່ຍັງລົດຄວາມສ່ຽງຂອງໂລກຊຳເຮື້ອຕ່າງໆ ໄດ້ຢ່າງມີໄນຍະສຳຄັນ

 

ດັ່ງນັ້ນ, ຖ້າຢາກມີຊີວິດຍືນຍາວຢ່າງຊາວໂອກິນາວາ ເລີ່ມຈາກການ “ກິນໜ້ອຍກວ່າທີ່ຄິດວ່າພໍ”  ແລະ ເລືອກອາຫານທີ່ດີຕໍ່ສຸຂະພາບທຸກວັນ

ສະແດງຄຳຄິດເຫັນ