ຫຼັງຈາກຕົກເປັນກະແສວິພາກວິຈານ ແລະ ສ້າງຄວາມກັງວົນດ້ານຄວາມປອດໄພກໍລະນີກາຕາຣ໌ຈະມອບຂອງຂວັນເປັນເຄື່ອງບິນໂບອິງ ມູນຄ່າກວ່າ 400 ລ້ານໂດລາສະຫະລັດ ລ່າສຸດສະຫະລັດຮັບມອບເຄື່ອງບິນລໍານີ້ແລ້ວ ກະກຽມດັດແປງນໍາເຂົ້າຮ່ວມຝູງບິນແອຣ໌ຟໍຊ໌ວັນ

ວັນນີ້ (22 ພຶດສະພາ 2025) ໂຄສົກ ກະຊວງປ້ອງກັນປະເທດ ແລະ ຄວາມໝັ້ນຄົງແຫ່ງຊາດສະຫະລັດເປີດເຜີຍວ່າ ພີທ ເຮກເຊທ ລັດຖະມົນຕີກາໂຫມ ໄດ້ຮັບມອບເຄື່ອງບິນໂບອິງ 747 ຈາກກາຕາຣ໌ແລ້ວຕາມກົດລະບຽບຂອງລັດຖະບານກາງ ໂດຍເຄື່ອງບິນລໍາດັ່ງກ່າວຈະຕ້ອງໄດ້ຮັບການດັດແປງກ່ອນນໍາໄປເປັນ ເຄື່ອງບິນປະຈໍາຕໍາແໜ່ງປະທານາທິບໍດີສະຫະລັດ ຫຼື ແອຣ໌ຟໍຊ໌ວັນ ເປັນການຊົ່ວຄາວ ລະຫວ່າງລໍບໍລິສັດໂບອິງສົ່ງລໍາໃໝ່ມາໃຫ້

ເຄື່ອງບິນລໍານີ້ເປັນຂອງຂວັນຈາກລາຊວົງກາຕາຣ໌ທີ່ມອບໃຫ້ໂດນັລ ທຣໍາ ຜູ້ນໍາສະຫະລັດ ມູນຄ່າ 400 ລ້ານໂດລາສະຫະລັດ  ຄາດວ່າຕ້ອງໃຊ້ເວລາໃນການດັດແປງນານຫຼາຍປີກ່ອນນໍາມາໃຊ້ງານໄດ້ຈິງ ທັງການຕິດຕັ້ງລະບົບຮັກສາຄວາມປອດໄພເພີ່ມເຕີມ ແລະ ການອັບເກຣດທີ່ຈໍາເປັນສໍາລັບການເດີນທາງຂອງຜູ້ນໍາສະຫະລັດ

ຊຶ່ງລວມເຖິງຄວາມສາມາດໃນການຕ້ານທານຄື່ນແມ່ເຫຼັກໄຟຟ້າຈາກການລະເບີດນິວເຄລຍ ແລະ ການເຕີມເຊື້ອໄຟກາງອາກາດ ໂດຍມີການປະເມີນດ້ວຍວ່າຕົ້ນທຶນໃນການດໍາເນີນການດັດແປງ ອາດສູງເຖິງ 1,000 ລ້ານໂດລາສະຫະລັດ

ປະເດັນການມອບເຄື່ອງບິນເປັນຂອງຂວັນນີ້ກໍ່ໃຫ້ເກີດຄວາມກັງວົນດ້ານຄວາມປອດໄພ ລວມເຖິງເກີດສຽງວິພາກວິຈານ ແລະ ຄໍາຖາມກ່ຽວກັບຈະລິຍະທໍາ ແລະ ຄວາມຖືກຕ້ອງ

ເນື່ອງຈາກລັດຖະທໍາມະນູນຂອງສະຫະລັດມີກໍານົດຫ້າມເຈົ້າໜ້າທີ່ລັດຖະບານຮັບຂອງຂວັນຈາກລັດຖະບານຕ່າງຊາດ ແລະ ປະມຸກຂອງລັດອື່ນ ໂດຍບໍ່ໄດ້ຮັບຄວາມເຫັນຊອບຈາກສະພາຄອງເກຣດ ແຕ່ທໍານຽບຂາວຍືນຢັນວ່າຂອງຂວັນນີ້ຖືກຕ້ອງຕາມກົດໝາຍ ແລະ ເຄື່ອງບິນລໍາໃໝ່ນີ້ຈະຖືກນໍາໄປໄວ້ທີ່ຫ້ອງສະໝຸດປະທານາທິບໍດີຂອງທຣໍາ ຫຼັງຈາກທຣໍາໝົດວາລະລົງ

ກ່ອນໜ້ານີ້ທຣໍາ ຢຸດຢັ້ງວ່າ ກາຕາຣ໌ມອບເຄື່ອງບິນໃຫ້ກັບກະຊວງປ້ອງກັນປະເທດ ແລະ ຄວາມໝັ້ນຄົງແຫ່ງຊາດສະຫະລັດ ບໍ່ແມ່ນຂອງຕົວລາວເອງ ແລະ ຄົງຈະໂງ່ຫາກປະຕິເສດເຄື່ອງບິນລໍານີ້ ນອກຈາກນີ້ຍັງລະບຸດ້ວຍວ່າ ການສົ່ງມອບເຄື່ອງບິນເປັນເລື່ອງຖືກກົດໝາຍ ເພາະມອບໃຫ້ກັບກະຊວງປ້ອງກັນປະເທດ ແລະ ຄວາມໝັ້ນຄົງແຫ່ງຊາດສະຫະລັດ ແລະ ຢືນຢັນວ່າຕົນຈະບໍ່ໃຊ້ເຄື່ອງບິນລໍານີ້ ຫຼັງໝົດວາລະດໍາຕໍາແໜ່ງ

ປັດຈຸບັນຝູງບິນແອຣ໌ຟໍຊ໌ວັນຂອງສະຫະລັດປະກອບດ້ວຍເຄື່ອງບິນໂບອິງ 747-200 ຈໍານວນ 2 ລໍາຊຶ່ງໃຊ້ງານມາຕັ້ງແຕ່ປີ 1990 ລວມທັງເຄື່ອງບິນໂບອິງ 757 ຊຶ່ງມີຂະໜາດນ້ອຍກວ່າອີກຫຼາຍລໍາ

ທັງນີ້ ບໍ່ແມ່ນຄັ້ງທຳອິດທີ່ກາຕາຣ໌ມອບເຄື່ອງບິນໃຫ້ກັບລັດຖະບານຕ່າງຊາດ ເພາະເມື່ອປີ 2018 ກາຕາຣ໌ມອບຂອງຂວັນເປັນເຄື່ອງບິນລຸ່ນດຽວກັນໃຫ້ປະທານາທິບໍດີຕຸລະກີ ຈົນເອີ້ນສຽງວິຈານຈາກພັກຝ່າຍຄ້ານຕຸລະກີ ຊຶ່ງປະທານາທິບໍດີເຣເຊບ ທາຢຢິບ ເອີດວັນ ຢຸດຢັ້ງວ່າ ເຄື່ອງບິນທີ່ໄດ້ມາເປັນຂອງປະເທດຕຸລະກີ ບໍ່ໃແມ່ນຂອງສ່ວນຕົວ

ສະແດງຄຳຄິດເຫັນ