ຄິມ ຈົງອຶນ ຜູ້ນຳເກົາຫຼີເໜືອສັ່ງລົງໂທດເຈົ້າໜ້າທີ່ເປັນລາຍທີ່ 4 ຫລັງເກີດເຫດຜິດພາດໃນການເປີດໂຕເຮືອຮົບໃໝ່ ທີ່ສ້າງຄວາມບໍ່ພໍໃຈຢ່າງຮຸນແຮງໃຫ້ກັບລາວ ເພາະຖືວ່ານີ້ເປັນການທຳລາຍສັກສີຊາດ

ລີ ຫະຍັງ-ຊອນ ຮອງຜູ້ອຳນວຍການພະແນກອຸດສາຫະກຳຍຸດໂທປະກອນແຫ່ງພັກແຮງງານ ຊຶ່ງເປັນຜູ້ເບິ່ງແຍງດ້ານການພັດທະນາອາວຸດ ແລະ ເປັນໜຶ່ງໃນສະມາຊິກຄະນະກຳມາທິການການທະຫານກາງຂອງພັກແຮງງານ

ຊຶ່ງມີໜ້າທີ່ເບິ່ງແຍງກອງທັບປະຊາຊົນເກົາຫຼີ ເປັນເຈົ້າໜ້າທີ່ລະດັບສູງລາຍລ່າສຸດທີ່ຖືກຊີ້ວ່າຕ້ອງຮັບຜິດຊອບໂດຍກົງ ຕໍ່ອຸບັດຕິເຫດຄັ້ງໃຫຍ່ທີ່ເກີດຂຶ້ນເມື່ອອາທິດກ່ອນ ຕາມລາຍງານຈາກສຳນັກຂ່າວ KCNA ຂອງທາງການເກົາຫຼີເໜືອເມື່ອວັນຈັນ

ເຮືອພິຄາດຂະໜາດ 5,000 ໂຕນ ທີ່ຫາກໍສ້າງແລ້ວໄດ້ ອຽງລົ້ມ ແລະ ໂຕເຮືອໄດ້ຮັບຄວາມເສຍຫາຍ ຊຶ່ງຄິມຈົງອຶນໄດ້ກ່າວວ່າເປັນການກໍ່ອາຊະຍາກຳທີ່ສ້າງຄວາມເສຍຫາຍຢ່າງຮຸນແຮງຕໍ່ສັກສີ ແລະ ຄວາມພາກພູມໃຈຂອງຊາດ

ປັດຈຸບັນເຮືອລຳດັ່ງກ່າວກຳລັງຢູ່ໃນລະຫວ່າງການຊ້ອມແຊມພາຍໃຕ້ການເບິ່ງແຍງຂອງຜູ້ຊ່ຽວຊານ ຂະນະທີ່ທາງການຍັງບໍ່ເປີດເຜີຍຊັດເຈນວ່າ ເຈົ້າໜ້າທີ່ທີ່ຖືກຈັບກຸມຈະໄດ້ຮັບໂທດສະຖານໃດ ແຕ່ເປັນທີ່ຮູ້ກັນວ່າເກົາຫຼີເໜືອມັກລົງໂທດຢ່າງຮຸນແຮງ ທັງການໃຊ້ແຮງງານໜັກ ແລະ ໃນບາງກໍລະນີອາດເຖິງຂັ້ນປະຫານຊີວິດ

ກ່ອນໜ້ານີ້ໃນຊ່ວງທ້າຍອາທິດທີ່ຜ່ານມາ ທາງການເກົາຫຼີເໜືອໄດ້ຄວບຄຸມຕົວເຈົ້າໜ້າທີ່ອີກ 3 ຄົນຈາກອູ່ຕໍ່ເຮືອໃນເມືອງຊົງຈິນ ຊຶ່ງເປັນສະຖານທີ່ ທີ່ສ້າງເຮືອພິຄາດລຳດັ່ງກ່າວ ປະກອບດ້ວຍ ຫົວໜ້າວິສະວະກອນ ຫົວໜ້າຝ່າຍກໍ່ສ້າງ ແລະຜູ້ຈັດການຝ່າຍທຸລະການ

ຄິມຈົງອຶນກ່າວວ່າ ປະນາມເຫດການຄັ້ງນີ້ວ່າເກີດຈາກຄວາມປະມາດຢ່າງສິ້ນເຊີງ ຂາດຄວາມຮັບຜິດຊອບ ແລະ ໃຊ້ວິທີແບບອີງປະສົບການຢ່າງບໍ່ມີຫຼັກວິທະຍາສາດ

ໂດຍປົກກະຕິແລ້ວ ເກົາຫຼີເໜືອມັກບໍ່ເປີດເຜີຍອຸບັດຕິເຫດໃນປະເທດຕໍ່ສາທາລະນະ ແຕ່ກໍລະນີນີ້ກັບກົງກັນຂ້າມ

ຊຶ່ງນັກວິເຄາະ ເອັດເວີດ ຮາວເວລ ຜູ້ຊ່ຽວຊານດ້ານເກົາຫຼີເໜືອຈາກມະຫາວິທະຍາໄລອອກຊ໌ຟອດໃຫ້ສຳພາດກັບ ABC News ວ່ານີ້ເປັນສັນຍານເຊີງຍຸດທະສາດ ໂດຍເກົາຫຼີເໜືອຕ້ອງການສົ່ງສານຊັດເຈນເຖິງສະຫະລັດ ແລະ ເກົາຫຼີໃຕ້ ວ່າເກົາຫຼີເໜືອຈະເດີນໜ້າພັດທະນາເທັກໂນໂລຊີທາງທະຫານຕໍ່ໄປຢ່າງບໍ່ຢຸດຢັ້ງ

ເຫດເຮືອຮົບລົ້ມໃນອູ່ຕໍ່ເຮືອຄັ້ງນີ້ ເກີດຂຶ້ນພຽງບໍ່ເທົ່າໃດອາທິດຫລັງຈາກເກົາຫຼີເໜືອ ຫາກໍເປີດໂຕເຮືອພິຄາດລຳໃໝ່ໃນອີກພື້ນທີ່ໜຶ່ງຂອງປະເທດ

ໂດຍຄິມຈົງອຶນຍົກຍ້ອງເຮືອລຳນັ້ນວ່າເປັນຄວາມກ້າວໜ້າເຊີງຍຸດທະສາດຂອງກອງທັບເຮືອ ແລະ ກຽມຈະນຳໄປປະຈຳການຕົ້ນປີໜ້າ ຊຶ່ງເຫດການຄັ້ງນີ້ສະທ້ອນໃຫ້ເຫັນເຖິງຄວາມເຂັ້ມງວດໃນລະບຽບວິໄນຂອງກອງທັບເກົາຫຼີເໜືອ ແລະ ຄວາມຈິງຈັງຂອງຜູ້ນຳຄິມຈົງອຶນຕໍ່ໂຄງການພັດທະນາເຮືອຮົບ ແລະ ເທັກໂນໂລຊີທາງທະຫານ ທີ່ລາວຖືເປັນພາລະກິດລະດັບຊາດ ບໍ່ຕ່າງຈາກການພັດທະນາອາວຸດນິວເຄລຍ

ສະແດງຄຳຄິດເຫັນ