ລະເບີດແຮງ ກາງເຂດກໍ່ສ້າງຄອນໂດໃນນະຄອນໂຕກຽວຂອງຍີ່ປຸ່ນ ເຮັດໃຫ້ມີຜູ້ບາດເຈັບ 10 ຄົນ ອາຄານອ້ອມຮອບເສຍຫາຍເກືອບ 40 ຫຼັງ

 

ເຈົ້າຫນ້າທີ່ພົບຖັງແກັສອະເຊທິລີນຝັງຢູ່ໃຕ້ດິນ ຄາດວ່າເປັນຕົ້ນເຫດການລະເບີດ

 

ວັນທີ 27 ພຶດສະພາ 2025 ເວັບໄຊທ໌ຂ່າວ NHK ລາຍງານວ່າ ເກີດເຫດການລະເບີດຮຸນແຮງຢູ່ບໍລິເວນເຂດກໍ່ສ້າງຄອນໂດ ໃນຍ່ານຮິງາຊິຄະໄຊ ເຂດເອໂດກາວະ ໃນນະຄອນໂຕກຽວ

 

 

ສົ່ງຜົນໃຫ້ມີຜູ້ບາດເຈັບຢ່າງນ້ອຍ 10 ຄົນ ໂດຍສ່ວນໃຫຍ່ເປັນຄົນງານກໍ່ສ້າງ ແລະ ປະຊາຊໃນພື້ນທີ່ ອາຍຸລະຫວ່າງ 20-70 ປີ

 

ບາງຄົນມີອາການເຈັບຫູ ແລະ ແສບຄໍຈາກແຮງອັດ ແລະ ກິ່ນຄວັນ ແຕ່ບໍ່ມີໃຜໄດ້ຮັບບາດເຈັບຮ້າຍແຮງ

 

ນອກນີ້ຍັງມີອາຄານບ້ານເຮືອນ ຮ້ານຄ້າ ລວມທັງລົດບັນທຸກໃນພື້ນທີ່ໄດ້ຮັບຄວາມເສຍຫາຍຈາກແຮງລະເບີດ ແລະ ໄຟໄຫມ້

 

ແຮງລະເບີດເຮັດໃຫ້ແກ້ວ ແລະ ຝາຜະໜັງຂອງຮ້ານສະດວກຊື້ໃກ້ຄຽງແຕກກະຈາຍ ລວມທັງບ້ານເຮືອນ ແລະ ອາຄານພານິດໃນລັດສະໝີ 100 ແມັດ ໄດ້ຮັບຄວາມເສຍຫາຍຢ່າງໜັກ ລວມ 38 ຫຼັງ ໂດຍແຮງລະເບີດຍັງເຮັດໃຫ້ລົດບັນທຸກພາຍໃນໄຊຕ໌ກໍ່ສ້າງເກີດໄຟລຸກໄຫມ້ເສຍຫາຍທັງໝົດ

 

ລາຍງານຂ່າວລະບຸວ່າ ພື້ນທີ່ເກີດເຫດຢູ່ໃກ້ກັບສະຖານີລົດໄຟຄະໄຊ ເທິງສາຍໂຕກຽວ ເມໂທຣ ໂຕໄຊ ຊຶ່ງເປັນຍ່ານທີ່ຢູ່ອາໃສຫນາແໜ້ນ ເຕັມໄປດ້ວຍຄອນໂດ ແລະ ບ້ານເຮືອນ

 

ເບື້ອງຕົ້ນທາງການໄດ້ຮ້ອງຂໍໃຫ້ປະຊາຊົນໃນເຂດໃກ້ຄຽງ ຍົກຍ້າຍອອກຈາກພື້ນທີ່ຊົ່ວຄາວເພື່ອຄວາມປອດໄພ ກ່ອນຈະໄດ້ຮັບອະນຸຍາດໃຫ້ກັບເຂົ້າທີ່ພັກໃນຊ່ວງບ່າຍຂອງວັນດຽວກັນ

 

ທາງດ້ານສຳນັກງານດັບເພີງທີ່ຄອນໂຕກຽວ ເປີດເຜີຍວ່າ ໄດ້ຮັບແຈ້ງເຫດລະເບີດໃນເວລາປະມານ 9.00 ໂມງເຊົ້າ ຕາມເວລາທ້ອງຖິ່ນ ແລະ ຕ້ອງລະດົມລົດດັບເພີງກວ່າ 30 ຄັນ

 

ເຂົ້າຄວບຄຸມໄຟທີ່ລຸກໄຫມ້ຢ່າງຮຸນແຮງ ໂດຍໃຊ້ເວລານານກວ່າ 4 ຊົ່ວໂມງຈຶ່ງສາມາດຄວບຄຸມໄຟໄດ້

 

ລາຍງານຂ່າວລະບຸວ່າ ຈາກການຕິດຕາມຕາຍເບື້ອງຕົ້ນເຈົ້າຫນ້າທີ່ພົບ ຖັງແກັສອະເຊທິລີນ ຊຶ່ງເປັນແກັສທີ່ຕິດໄຟງ່າຍ ໃຊ້ໃນການເຊື່ອມໂລຫະ ຖືກຝັງຢູ່ໃຕ້ດິນໃນຈຸດທີ່ເກີດເຫດ ແລະ ມີຮ່ອງຮອຍຄວາມເສຍຫາຍຢ່າງຊັດເຈນ

 

ເຊື່ອວ່າໃນຊ່ວງທີ່ມີການຕອກເສົາເຂັມລົງດິນເພື່ອກໍ່ສ້າງອາຄານໃໝ່ ອາດໄປກະທົບ ຫຼື ເຮັດໃຫ້ແກັສຮົ່ວໄຫຼຈົນເກີດການລະເບີດ ແລະ ໄຟລຸກລາມຂຶ້ນ

 

ຈົນເຖິງຕອນນີ້ເຈົ້າຫນ້າທີ່ກຳລັງສອບສວນວ່າເຫດໃດຖັງແກັສຈຶ່ງຖືກຝັງຢູ່ໃຕ້ດິນ ແລະ ເປັນຂອງໃຜ ເນື່ອງຈາກບໍ່ມີການລະບຸໄວ້ໃນແຜນຜັງ ຫຼື ລາຍງານກ່ອນຫນ້າ

 

ໂດຍອາດເປັນຖັງເກົ່າທີ່ຖືກທິ້ງ ຫຼື ຝັງໄວ້ໂດຍບໍ່ໄດ້ມາດຕະຖານ ຫຼື ເປັນຄວາມຜິດພາດໃນການຈັດການວັດສະດຸອັນຕະລາຍ ຝັງເພື່ອເຊື່ອງຖັງໄວ້ໃຕ້ດິນເພື່ອຫຼີກເວັ້ນການຕິດຕາມກວດກາ

 

ໃນຂະນະທີ່ຫຼາຍຝ່າຍຈັບຕາມອງວ່າອາດສະທ້ອນເຖິງຊ່ອງໂຫວ່ໃນລະບົບຄວາມປອດໄພຂອງໄຊຕ໌ກໍ່ສ້າງໃຈກາງນະຄອນຫຼວງຂອງຍີ່ປຸ່ນ.

ສະແດງຄຳຄິດເຫັນ