ຜູ້ແທນເຈລະຈາຂອງທັງລັດເຊຍ ແລະ ຢູເຄຣນເດີນທາງຮອດນະຄອນອິສຕັນບູນ ປະເທດຕຸລະກີແລ້ວ ເພື່ອກຽມຫາລືຂໍ້ຕົກລົງສັນຕິພາບ ແລະ ຢຸດຍິງຮອບສອງໃນມື້ນີ້ ໂດຍທາງການຕຸລະກີກຽມຄວາມພ້ອມຈັດສະຖານທີ່ປະຊຸມທີ່ພະລາຊະວັງຊີລາກັນ

 

ທ່າມກາງມາດຕະການຮັກສາຄວາມປອດໄພຢ່າງເຂັ້ມງວດ ໂດຍການຫາລືໄດ້ເລີ່ມຂຶ້ນເມື່ອເວລາປະມານ 13.00 ນ. ຕາມເວລາທ້ອງຖິ່ນ ຫຼືຶຶ ປະມານ 17.00 ນ. ຕາມເວລາໃນປະເທດລາວ

 

ຄີດ ເຄລລັອກ ຜູ້ແທນຂອງໂດນານ ທຣຳ ປະທານາທິບໍດີສະຫະລັດ ເປີດເຜີຍວ່າ ການເຈລະຈາຮອບນີ້ ທັງສອງຝ່າຍຈະສະເໜີເອກະສານແນວທາງເງື່ອນໄຂເພື່ອສັນຕິພາບຂອງຕົວເອງ ເຖິງແມ່ນວ່າຈະເປັນທີ່ຮູ້ກັນດີວ່າ ຈຸດຢືນຂອງທັງຄູ່ແຕກຕ່າງກັນຢ່າງຈະແຈ້ງຕັ້ງແຕ່ສົງຄາມເລີ່ມເປີດສາກຂຶ້ນ ຈົນຮອດມື້ນີ້ກໍຕາມ

 

ການເຈລະຈາດັ່ງກ່າວຊຶ່ງຖືເປັນຄວາມພະຍາຍາມເພື່ອບັນລຸຂໍ້ຕົກລົງຢຸດຍິງລະຫວ່າງທັງສອງຝ່າຍຄັ້ງທີ 2 ນັບຕັ້ງແຕ່ເລີ່ມຕົ້ນສົງຄາມໃນປີ 2022 ເກີດຂຶ້ນພຽງວັນດຽວ

 

ຫຼັງຈາກຢູເຄຣນເປີດສາກປະຕິບັດການໂຈມຕີເຄື່ອງບິນລົບລັດເຊຍຕາມຖານທັບ 4 ແຫ່ງໃນສອງເຂດຂອງລັດເຊຍ ຄືເຂດເມີມັນສກ ທາງຕະວັນຕົກສ່ຽງເໜືອ ແລະ ໃນເຂດອີກຸດສກ ແຖວໄຊບີເລຍ ໃຊ້ຊື່ ‘ປະຕິບັດການໃຍແມງມຸມ’ (Spider’s Web operation) ທີ່ຢູເຄຣນໃຊ້ເວລາຊຸ່ມວາງແຜນຫຼາຍກວ່າ 1 ປີເຄິ່ງ ດ້ວຍການໃຊ້ໂດຣນພິຄາດ 117 ລຳ

 

ຊຸກເຊື່ອງໃນລັງໄມ້ທີ່ມີຫລັງຄາທີ່ສາມາດສັ່ງເປີດໄດ້ຈາກລະຍະໄກ ໃຫ້ລົດບັນທຸກລັກເດີນທາງໄປຊຸ່ມຢູ່ໃກ້ສະໜາມບິນເປົ້າໝາຍ ແລະ ໃຊ້ການຄວບຄຸມຈາກລະຍະໄກເພື່ອເປີດສ່ວນຫລັງຄາ ສັ່ງການໃຫ້ໂດຣນບິນອອກໄປໂຈມຕີຕາມເວລາທີ່ກຳນົດໄວ້

 

ຢູເຄຣນອ້າງວ່າ ສາມາດທຳລາຍເຄື່ອງບິນຖິ້ມລະເບີດທາງຍຸດທະສາດຂອງກອງທັບລັດເຊຍ ຊຶ່ງມີສັກຍະພາບຕິດຫົວລົບນິວເຄລຍໄດ້ຢ່າງໜ້ອຍ 13 ລຳ ຄິດເປັນຮ້ອຍລະ 34 ຂອງເຄື່ອງບິນຖິ້ມລະເບີດທາງຍຸດທະສາດທັງໝົດທີ່ກອງທັບລັດເຊຍມີຢູ່ ສ້າງຄວາມສູນເສຍໃຫ້ກັບລັດເຊຍ 7,000 ລ້ານໂດລາ ຫາກຂໍ້ເທັດຈິງເປັນໄປຕາມທີ່ຢູເຄຣນອ້າງ ນີ້ຈະຖືເປັນການໂຈມຕີດ້ວຍໂດຣນຝີມືຢູເຄຣນທີ່ສ້າງຄວາມເສຍຫາຍແກ່ລັດເຊຍຫຼາຍທີ່ສຸດ

ສະແດງຄຳຄິດເຫັນ