ມືປືນຍິງສັງຫານໝູ່ຢູ່ໂຮງຮຽນແຫ່ງໜຶ່ງໃນອົດສະຕາລີ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 10 ຄົນ ສ່ວນຜູ້ກໍ່ເຫດຍິງຕົນເອງເສຍຊີວິດ ຊຶ່ງເປັນຄົນອົດສະຕາລີ ແລະ ບໍ່ເຄີຍມີປະຫວັດກໍ່ຄວາມຮຸນແຮງ

 

ເມື່ອວັນທີ 10 ມິຖຸນາ 2025 ເກີດເຫດຍິງສັງຫານໝູ່ຢູ່ໂຮງຮຽນມັດທະຍົມສຶກສາ Dreierschtzengasse ໃນເມືອງ GRAZ ທາງຕາເວັນອອກສຽງໃຕ້ຂອງປະເທດອົດສະຕາລີ ເມື່ອເວລາປະມານ 10.00 ນ. ຕາມເວລາທ້ອງຖິ່ນ ໂດຍຫຼັງເກີດເຫດມີການລະດົມກຳລັງເຈົ້າໜ້າທີ່ກວ່າ 300 ຄົນ ໄປພື້ນທີ່ເກີດເຫດ ພ້ອມປິດກັ້ນບໍລິເວນໂດຍຮອບທັນທີ

 

ລັດຖະມົນຕີກະຊວງພາຍໃນອົດສະຕາລີ ເປີດເຜີຍວ່າ ຄວາມຮຸນແຮງຂອງເຫດການຄັ້ງນີ້ສົ່ງຜົນໃຫ້ມີຜູ້ເສຍຊີວິດ 9 ຄົນ ໃນຈຳນວນນີ້ເປັນຍິງ 6 ຄົນແລະຊາຍ 3 ຄົນ ຂະນະທີ່ຕຳຫຼວດລະບຸວ່າມີຜູ້ໄດ້ຮັບບາດເຈັບ 12 ຄົນ ບາງຄົນອາການສາຫັດ ກ່ອນທີ່ສື່ທ້ອງຖິ່ນຈະລາຍງານວ່າມີຜູ້ຍິງໜຶ່ງໃນຜູ້ທີ່ໄດ້ຮັບບາດເຈັບ 1 ຄົນເສຍຊີວິດທີ່ໂຮງໝໍ ສົ່ງຜົນໃຫ້ຍອດຜູ້ເສຍຊີວິດເພີ່ມຂຶ້ນເປັນຢ່າງໜ້ອຍ 10 ຄົນ

 

 

ທາງດ້ານຕຳຫຼວດ ເປີດເຜີຍວ່າ ຜູ້ກໍ່ເຫດໄດ້ຍິງຕົນເອງເສຍຊີວິດໃນຫ້ອງນ້ຳຂອງໂຮງຮຽນຫຼັງກໍ່ເຫດ ໂດຍຜູ້ກໍ່ເຫດມີອາຍຸ 21 ປີ ແຕ່ບໍ່ໄດ້ເປີດເຜີຍຊື່ ເປັນຄົນອົດສະຕາລີ ທີ່ອາໄສຢູ່ໃນເຂດດັ່ງກ່າວ ແລະ ເປັນນັກຮຽນເກົ່າທີ່ເຄີຍຮຽນໂຮງຮຽນແຫ່ງນີ້ ແຕ່ບໍ່ໄດ້ຈົບການສຶກສາ ຂະນະນີ້ເຈົ້າໜ້າທີ່ຢູ່ລະຫວ່າງສອບສວນເພື່ອຫາແຮງຈູງໃຈ ພ້ອມລະບຸວ່າຜູ້ກໍ່ເຫດລົງມືພຽງຜູ້ດຽວ

 

ຂໍ້ມູນທີ່ມີຂະນະນີ້ຊີ້ວ່າຜູ້ກໍ່ເຫດໃຊ້ປືນ 2 ກະບອກໃນການກໍ່ເຫດ ຊຶ່ງທັງໝົດໄດ້ມາຢ່າງຖືກກົດໝາຍ ລວມທັງມີໃບອະນຸຍາດຄອບຄອງປືນ ຂະນະທີ່ສື່ທ້ອງຖິ່ນລາຍງານວ່າຜູ້ຕ້ອງສົງໃສໃຊ້ປືນພົກແລະປືນລູກຊອງກໍ່ເຫດ

 

ດ້ານເຈົ້າໜ້າທີ່ຢືນຢັນວ່າຜູ້ກໍ່ເຫດບໍ່ເຄີຍມີປະຫວັດກໍ່ເຫດຮຸນແຮງໃດໆ ສ່ວນໂຮງຮຽນທີ່ເກີດເຫດຈະງົດການຮຽນການສອນຈົນກວ່າຈະມີປະກາດເພີ່ມເຕີມ ຂະນະທີ່ພະຍານທີ່ຢູ່ໃນອາຄານທີ່ພັກອາໄສໃກ້ຄຽງກັບໂຮງຮຽນ ເປີດເຜີຍວ່າໄດ້ຍິນສຽງປືນດັງຂຶ້ນຫຼາຍຄັ້ງຕິດຕໍ່ກັນ ຄາດວ່າປະມານ 30-40 ນັດກ່ອນທີ່ຈະຟ້າວໂທແຈ້ງຕຳຫຼວດ

 

Gerhard Karner ລັດຖະມົນຕີກະຊວງພາຍໃນອົດສະຕາລີ (ຊ້າຍ) ແລະ Christian Stocker ນາຍົກລັດຖະມົນຕີອົດສະຕາລີ (ຂວາ) ແຖລງຂ່າວກ່ຽວກັບເຫດຍິງສັງຫານໝູ່ໃນໂຮງຮຽນ

 

ນາຍົກລັດຖະມົນຕີອົດສະຕາລີ ປະກາດໄວ້ອາໄລ 3 ມື້

 

ນາຍົກລັດຖະມົນຕີອົດສະຕາລີ ລະບຸວ່າ ນີ້ເປັນມື້ທີ່ມືດມົນໃນປະຫວັດສາດຂອງປະເທດ ແລະ ປະກາດວ່າເຫດຍິງສັງຫານໝູ່ດັ່ງກ່າວເປັນເຫດການທີ່ໂສກເສົ້າຂອງຊາດ ໂຮງຮຽນເປັນຫຼາຍກວ່າສະຖານທີ່ຮຽນຮູ້ ແຕ່ເປັນພື້ນທີ່ສຳລັບຄວາມໄວ້ວາງໃຈ ຄວາມຮູ້ສຶກສະບາຍໃຈ ແລະ ອະນາຄົດ ຊຶ່ງຄົນເຫຼົ່ານີ້ເປັນຄົນຫນຸ່ມສາວທີ່ຍັງມີຊີວິດອີກຍາວໄກ

 

ນອກຈາກນີ້ມີການປະກາດໄວ້ອາໄລເປັນເວລາ 3 ມື້ ພ້ອມທັງສັ່ງລົດທຸງເຄິ່ງເສົາທີ່ທຳນຽບປະທານາທິບໍດີ ຂະນະທີ່ໃນເວລາ 10.00 ນ. ວັນທີ 11 ມິຖຸນາ ຕາມເວລາທ້ອງຖິ່ນ ຈະມີການຢືນສະຫງົບນິ່ງໄວ້ອາໄລເປັນເວລາ 1 ນາທີທົ່ວປະເທດ

 

ດ້ານນາຍົກເທດສະບານທ້ອງຖິ່ນເອີ້ນເຫດການທີ່ເກີດຂຶ້ນໃນຄັ້ງນີ້ວ່າເປັນເຫດການທີ່ຮ້າຍແຮງ ຂະນະທີ່ນັກຂ່າວໜັງສືພິມທ້ອງຖິ່ນ ລະບຸວ່າ ໂຮງຮຽນອາດບໍ່ໄດ້ກະກຽມຮັບມືກັບຄວາມເປັນໄປໄດ້ທີ່ຈະຖືກໂຈມຕີ ເນື່ອງຈາກພວກເຮົາບໍ່ໄດ້ອາໄສຢູ່ໃນສະຫະລັດ ແຕ່ເຮົາອາໄສຢູ່ໃນອົດສະຕາລີ ຊຶ່ງເບິ່ງຄືວ່າຈະເປັນພື້ນທີ່ທີ່ປອດໄພຫຼາຍ

 

ຄົນອົດສະຕາລີ ວາງດອກໄມ້ໃນເມືອງ GRAZ ຮ່ວມຈູດທຽນໄວອາໄລ ຂະນະທີ່ທາງການອົດສະຕາລີ ໄດ້ປະກາດໄວ້ອາໄລແຫ່ງຊາດເປັນເວລາ 3 ວັນ

 

ປະຊາຊົນບໍລິຈາກເລືອດຊ່ວຍເຫຼືອເຫດຍິງສັງຫານໝູ່

 

ປະຊາຊົນຈຳນວນຫຼາຍໄປບໍລິຈາກເລືອດທີ່ສູນກາງຮັບບໍລິຈາກເລືອດພາຍໃນເມືອງທີ່ເກີດເຫດ ເພື່ອຊ່ວຍເຫຼືອຜູ້ໄດ້ຮັບຜົນກະທົບຈາກເຫດການນີ້ ໂດຍໜຶ່ງໃນຜູ້ທີ່ມາບໍລິຈາກເລືອດລະບຸວ່າ ຮູ້ສຶກສິ້ນຫວັງເມື່ອພົບກັບເຫດດການກັບທີ່ຮ້າຍແຮງ ຄັ້ງນີ້ ຂະນະທີ່ບາງຄົນລະບຸວ່າຕ້ອງການມາບໍລິຈາກເລືອດເພາະຮູ້ສຶກວ່າເປັນສິ່ງດຽວທີ່ທຸກຄົນຈະຊ່ວຍໄດ້

 

ເຫດຮຸນແຮງຄັ້ງນີ້ຖືເປັນເຫດຍິງສັງຫານໝູ່ນອງເລືອດຫຼາຍທີ່ສຸດໃນປະຫວັດສາດຂອງອົດສະຕາລີ ທີ່ເກີດຂຶ້ນໃນຊ່ວງຫຼັງມານີ້ ໂດຍເມື່ອປີ 2020 ມີຜູ້ເສຍຊີວິດ 4 ຄົນ ແລະ ບາດເຈັບອີກ 23 ຄົນ ຫຼັງມືປືນກຸ່ມຫົວຮຸນແຮງອິສລາມກໍ່ເຫດຍິງໃນເຂດສະຖານບັນເທິງຍາມຄ່ຳຄືນໃນກຸງວຽນນາ ແລະ ໃນປີ 2016 ມືປືນກໍ່ເຫດຍິງທີ່ຄອນເສີດໃນເມືອງ Nenzing ສົ່ງຜົນໃຫ້ມີຜູ້ເສຍຊີວິດ 2 ຄົນແລະບາດເຈັບອີກ 11 ຄົນ

ສະແດງຄຳຄິດເຫັນ