“ນ້ຳແຂງຕິດໄຟ” ພະລັງງານແຫ່ງອະນາຄົດ ຄວາມສຳເລັດຂອງຈີນທີ່ອາດປ່ຽນໂຊມຕະຫຼາດພະລັງງານໂລກ

ຈີນປະກາດຄວາມສຳເລັດຄັ້ງສຳຄັນກັບການຂຸດ ແລະ ນຳນ້ຳແຂງຕິດໄຟ ຫຼື ທີ່ຮູ້ຈັກໃນຊື່ “Combustible Ice” ຂຶ້ນມາຈາກໃຕ້ທະເລບໍລິເວນເມືອງເສິ່ນຫູ ໃນທະເລຈີນໃຕ້ ທີ່ລະດັບຄວາມເລິກເຖິງ 1,266 ເມັດ ຫ່າງຈາກເກາະຮ່ອງກົງໄປທາງຕາເວັນອອກສຽງໃຕ້ປະມານ 285 ກິໂລເມັດ ຖືເປັນກ້າວສຳຄັນທີ່ອາດປະຕິວັດແຫຼ່ງພະລັງງານຂອງໂລກໃນອະນາຄົດ

ນ້ຳແຂງຕິດໄຟ ຫຼື ມີຊື່ທາງວິທະຍາສາດວ່າ Natural Gas Hydrate (NGH) ຫຼື Methane Hydrate ແມ່ນສານປະກອບແຂງລະຫວ່າງ ແກັສມີເທນກັບນ້ຳ ທີ່ກໍ່ຕົວຂຶ້ນໃນສະພາວະແຮງດັນສູງ ແລະ ອຸນຫະພູມຕ່ຳ

ໂດຍມັກພົບໄດ້ຕາມພື້ນມະຫາສະມຸດ ຫຼື ໃນຊັ້ນດິນແຂງແກ່ວຂອງໂລກ ນ້ຳແຂງຊະນິດນີ້ມີຄຸນສົມບັດສະເພາະທີ່ສາມາດປ່ອຍແກັສມີເທນອອກມາໃນປະລິມານມະຫາສານ ເມື່ອໄດ້ຮັບຄວາມຮ້ອນ ຫຼື ຄວາມດັນຫຼຸດລົງ ໂດຍນ້ຳແຂງຕິດໄຟພຽງ 1 ແມັດກ້ອນ ສາມາດປ່ອຍແກັສທຳມະຊາດໄດ້ຫຼາຍເຖິງ 160-164 ແມັດກ້ອນ

ສັກຍະພາບຂອງນ້ຳແຂງຕິດໄຟນີ້ ຈຶ່ງເຮັດໃຫ້ທົ່ວໂລກຈັບຕາເບິ່ງ ເພາະນອກຈາກຈະໃຫ້ພະລັງງານສູງແລ້ວ ຍັງປ່ອຍມົນລະພິດນ້ອຍກວ່າຖ່ານຫິນ ນ້ຳມັນ ແລະ ແກັສທຳມະຊາດທົ່ວໄປ ອີກທັງຍັງມີປະລິມານສຳຮອງມະຫາສານ

ນັກວິໄຈຄາດວ່າພຽງພໍຕໍ່ຄວາມຕ້ອງການຂອງມະນຸດໄດ້ດົນເກືອບ 1,000 ປີ ແລະ ອາດຫຼາຍກວ່າປະລິມານສຳຮອງຫີນດິນດານເຖິງ 10 ເທົ່າ ຫາກຈີນສາມາດນຳມາໃຊ້ໃນເຊີງການຄ້າ ໄດ້ສຳເລັດໃນອະນາຄົດ ຍ່ອມສົ່ງຜົນກະທົບຕໍ່ລາຄານ້ຳມັນໂລກ ແລະ ອາດສັ່ນສະເທື່ອນໄປເຖິງຄວາມໝັ້ງມີຂອງປະເທດຜູ້ຜະລິດນ້ຳມັນໃນຕາເວັນອອກກາງ

ແນວໃດກໍ່ຕາມ ການນຳພະລັງງານຊະນິດໃໝ່ນີ້ມາໃຊ້ຢ່າງແຜ່ຫຼາຍຍັງຄົງມີຄວາມທ້າທາຍ ໂດຍສະເພາະດ້ານສິ່ງແວດລ້ອມ ເພາະແກັສມີເທນເປັນແກັສເຮືອນແກ້ວ ທີ່ມີສັກຍະພາບເຮັດໃຫ້ໂລກຮ້ອນຫຼາຍກວ່າຄາບອນໄດອອກໄຊດ໌ເຖິງ 25 ເທົ່າ ຫາກຮົ່ວໄຫຼສູ່ຊັ້ນບັນຍາກາດໂດຍບໍ່ໄດ້ຮັບການຄວບຄຸມ ອາດເລັ່ງໃຫ້ເກີດພາວະໂລກຮ້ອນໄວຍິ່ງຂຶ້ນ ນັກສິ່ງແວດລ້ອມຈຶ່ງເຕືອນໃຫ້ມີມາດຕະການຄວບຄຸມ ແລະ ກຳກັບດູແລທີ່ຮັດກຸມ

ຈີນເອງຄຳນຶງ ເຖິງປະເດັນນີ້ ແລະ ໄດ້ປະກາດຈັດຕັ້ງຫ້ອງປະຕິບັດການໃຕ້ນ້ຳເລິກ 2,000 ແມັດເພື່ອສຶກສາທັງສັກຍະພາບຂອງແຫຼ່ງພະລັງງານ ແລະ ຜົນກະທົບຕໍ່ສິ່ງແວດລ້ອມຢ່າງລະອຽດ ຄວາມສຳເລັດໃນຄັ້ງນີ້ເຖິງແມ່ນຈະຖືເປັນກ້າວທຳອິດທີ່ໜ້າຕື່ນເຕັ້ນ ແຕ່ເສັ້ນທາງສູ່ການໃຊ້ປະໂຫຍດໃນທາງການຄ້າ ຢ່າງປອດໄພຍັງຄົງຕ້ອງອາໄສເວລາ ເທັກໂນໂລຍີ ແລະ ຄວາມຮ່ວມມືຈາກນານາຊາດຢ່າງຮອບຄອບຕໍ່ໄປ

ສະແດງຄຳຄິດເຫັນ