ຄິມ ຈອງອຶນ ຜູ້ນໍາເກົາຫຼີເໜືອ ໃຫ້ຄໍາໝັ້ນສັນຍາວ່າຈະສ້າງກອງເຮືອທີ່ທັນສະໄໝຍິ່ງຂຶ້ນ ເພື່ອເສີມກໍາລັງທາງທະເລຂອງປະເທດ

 

ຂະນະທີ່ເຂົ້າຮ່ວມພິທີປ່ອຍເຮືອພິຄາດຊຶ່ງໄດ້ຮັບການຊ່ອມແປງໃໝ່ ຫຼັງຈາກປະສົບຄວາມລົ້ມເຫຼວໃນການປ່ອຍກ່ອນໜ້ານີ້

 

ຮູບຖ່າຍດາວທຽມສະແດງໃຫ້ເຫັນການຊ່ອມແປງເຮືອພິຄາດຂະໜາດ 5,000 ຕັນ ທີ່ໄດ້ຮັບຄວາມເສຍຫາຍບາງສ່ວນເມື່ອເດືອນພຶດສະພາ ທີ່ຍັງຄົງດໍາເນີນຕໍ່ໄປ ຫຼັງຈາກທີ່ທ່ານຄິມ ເອີ້ນອຸບັດຕິເຫດຄັ້ງນີ້ວ່າເປັນ “ການກະທໍາທີ່ຜິດກົດໝາຍ” ແລະ ສັ່ງໃຫ້ສ້າງເຮືອຂຶ້ນໃໝ່ກ່ອນການປະຊຸມພັກລັດຖະບານໃນຊ່ວງປາຍເດືອນນີ້

 

 

ລາຍງານຂອງສໍານັກຂ່າວເຄຊີເອັນເອ ເປີດເຜີຍໃຫ້ເຫັນ ທ່ານຄິມຈອງອຶນ ຜູ້ນໍາເກົາຫຼີເໜືອ ພ້ອມກັບ ຄິມ ຈູ ເອ ລູກສາວ ໃນພິທີປ່ອຍເຮືອ ຊຶ່ງຕັ້ງຊື່ວ່າ “ຄັງ ກອນ” ຕາມຊື່ນັກສູ້ຕາມປະຫວັດສາດເກົາຫຼີເໜືອທີ່ບັນທຶກໃນຖານະບຸກຄົນສໍາຄັນ ທີ່ອູ່ຕໍ່ເຮືອຣາຈິນ ທາງຕາເວັນອອກສຽງເໜືອຂອງປະເທດ

 

ຄິມ ຈອງອຶນ ກ່າວວ່າການຊ່ອມແປງເຮືອພິຄາດ “ບໍ່ໄດ້ເຮັດໃຫ້ຄວາມພະຍາຍາມຂອງເກົາຫຼີເໜືອ ທີ່ຈະເພີ່ມກໍາລັງທາງເຮືອຊ້າລົງ” ແລະ ກ່າວວ່າມີແຜນທີ່ຈະສ້າງເຮືອພິຄາດຂະໜາດ 5,000 ຕັນອີກ 2 ລໍາໃນປີໜ້າ

 

 

ເກົາຫຼີເໜືອຄວບຄຸມຕົວເຈົ້າໜ້າທີ່ຫຼາຍຄົນຕັ້ງແຕ່ການປ່ອຍເຮືອພິຄາດລໍາທຳອິດລົ້ມເຫຼວ ຊຶ່ງເປັນເຮືອຮົບລໍາໃຫຍ່ທີ່ສຸດທີ່ເກົາຫຼີເໜືອເຄີຍສ້າງ ທ່ານຄິມຮຽກຮ້ອງໃຫ້ປະເທດເສີມກໍາລັງທະຫານທາງທະເລໃນມະຫາສະມຸດແປຊິຟິກເພື່ອຮັບມືກັບສິ່ງທີ່ລາວກ່າວວ່າເປັນການຊຸກຍູ້ໂດຍສະຫະລັດ ແລະ ພັນທະມິດ

 

ຕາມລາຍງານຂອງສໍານັກຂ່າວເຄຊີເອັນເອ ທ່ານຄິມກ່າວໃນຄຳປາໄສທີ່ພິທີປ່ອຍເຮືອພິຄາດ ວ່າ “ໃນບໍ່ຊ້ານີ້ ສັດຕູຈະສຳຜັດໄດ້ດ້ວຍຕົວເອງວ່າການນັ່ງເບິ່ງເຮືອຂອງສັດຕູອາລະວາດໄປທົ່ວບໍລິເວນແຄມຂອບນ່ານນ້ຳອະທິປະໄຕນັ້ນ ທ້າທາຍ ແລະບໍ່ໜ້າພໍໃຈພຽງໃດ” “ຂ້ອຍໝັ້ນໃຈວ່າໃນອະນາຄົດອັນໃກ້ ເສັ້ນທາງຂອງເຮືອຮົບຂອງພວກເຮົາ ຈະເປີດຂຶ້ນໃນມະຫາສະມຸດແປຊິຟິກເພື່ອມຸ່ງສູ່ຖານທີ່ໝັ້ນຂອງການຮຸກຮານ”

 

 

ຄິມ ຈອງອຶນ ຍັງກ່າວອີກວ່າຄົນງານໃນອູ່ຕໍ່ເຮືອເສຍຊີວິດລະຫວ່າງ “ການສ້າງເຮືອພິຄາດ” ບໍ່ເທົ່າໃດມື້ກ່ອນການປ່ອຍເຮືອ ແລະ ໄດ້ມອບໃບຮັບຮອງການເສຍສະລະເພື່ອຊາດໃຫ້ກັບຄອບຄົວຂອງຊາຍຄົນດັ່ງກ່າວ

 

ສະຖາບັນວິໄຈໃນສະຫະລັດ ລະບຸວ່າ ການປ່ອຍເຮືອຄັ້ງນີ້ ເກີດຂຶ້ນພຽງສາມອາທິດຫຼັງຈາກຄວາມລົ້ມເຫຼວຄັ້ງທຳອິດ ອາດເປັນສັນຍານວ່າຄວາມເສຍຫາຍຂອງເຮືອນັ້ນຄ່ອນຂ້າງເລັກນ້ອຍ

 

ສູນການສຶກສາກົນລະຍຸດ ແລະ ລະຫວ່າງປະເທດ (CSIS) ລະບຸໃນລາຍງານວ່າ ຮູບຖ່າຍດາວທຽມສະແດງໃຫ້ເຫັນວ່າປ້ອມປືນຂອງເຮືອຖືກລ້ອມໄວ້ ແຕ່ຊ່ອງສໍາລັບລະບົບຍິງແນວຕັ້ງຖືກປິດໄວ້ ເຮັດໃຫ້ບໍ່ຊັດເຈນວ່າລະບົບດັ່ງກ່າວໄດ້ຮັບການຕິດຕັ້ງສົມບູນຫຼືບໍ່

 

CSIS ກ່າວວ່າ ແຜນຂອງເກົາຫຼີເໜືອທີ່ຈະສ້າງເຮືອພິຄາດເພີ່ມເຕີມອາດເຮັດໃຫ້ການປ້ອງກັນຂີປະນາວຸດຂອງສະຫະລັດ ແລະ ພັນທະມິດໃນພາກພື້ນມີຄວາມຊັບຊ້ອນຫຼາຍຂຶ້ນ

ສະແດງຄຳຄິດເຫັນ