ເພື່ອໃຫ້ບັນລຸຄາດໝາຍແຜນພັດທະນາເສດ ຖະກິດ-ສັງຄົມແຫ່ງຊາດຄັ້ງທີ IX (ໃນຂົງເຂດການສຶກສາ), ລັດຖະບານ ໄດ້ປະກາດເພີ່ມງົບປະມານທັງໝົດ 215.30 ຕື້ກີບ ເຂົ້າໃນວຽກງານບູລິມະສິດ ໃນຂະແໜງການສຶກສາ. ອີງຕາມບົດຊີ້ແຈງຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ IX  ເມື່ອວັນທີ 11 ມິຖຸນາ 2025 ງົບປະມານທັງໝົດ 215.30 ຕື້ກີບ ຈະຖືກຈັດສັນເຂົ້າໃນ 5 ວຽກງານບຸລິມະສິດ ໃນຂະແໜງການສຶກສາ ດັ່ງນີ້:

1. 1.ເພີ່ມງົບປະມານ 106.26 ຕື້ກີບ ເພື່ອເສີມສ້າງໃຫ້ນັກຮຽນ ໄດ້ຮັບໂພຊະນາການທີ່ດີ ແລະ ການພັດທະນາການຈະເລີນໄວຕາມເກນອາຍຸແຕ່ລະໄລຍະ, ໂດຍສະເພາະເພີ່ມອັດຕາກິນອາຫານທ່ຽງໃຫ້ນັກຮຽນປະຖົມຢູ່ເຂດຫ່າງໄກສອກຫຼີກ, ຈາກ 1,000 ກີບ ມາເປັນ 5,000 ກີບ/ຄົນ/ມື້.
2. ເພີ່ມເບ້ຍລ້ຽງນັກຮຽນສາມັນ 91.54 ຕື້ກີບ, ເປັນຕົ້ນ ນັກຮຽນອາຊີວະ ຈາກ 200,000 ກີບ ມາເປັນ 300,000 ກີບ, ນັກຮຽນພອນສະຫວັນ ຈາກ 250,000 ກີບ ມາເປັນ 300,000 ກີບ, ແລະ ນັກຮຽນສ້າງຄູ ຈາກ 200,000 ກີບ ມາເປັນ 700,000 ກີບ ເພື່ອຫຼຸດຜ່ອນ ການປະລະການຮຽນ ແລະ ຊຸກຍູ້ໃຫ້ນັກຮຽນສືບຕໍ່ຮຽນວິຊາຊີບຕາມເປົ້າໝາຍ ແຜນຍຸດທະສາດຂອງຂະແໜງສຶກສາ.
3.  ເພີ່ມງົບປະມານຈັດພີມປຶ້ມຫຼັກສູດການຮຽນ 5 ຕື້ກີບ ເພື່ອທົດແທນປຶ້ມທີ່ເສຍຫາຍ ຈາກໄພນໍ້າຖ້ວມໃນ 2 ແຂວງພາກເໜືອ.
4. ເພີ່ມເບ້ຍລ້ຽງໃຫ້ນັກສຶກສາ ສສ ຫວຽດນາມ ທີ່ມາຮຽນຢູ່ ສປປ ລາວ 4.55 ຕື້ກີບ, ເພື່ອໃຫ້ເທົ່າທຽມກັບເບ້ຍລ້ຽງນັກຮຽນ ລາວ ທີ່ຮຽນຢູ່ ສສ ຫວຽດນາມ.
5. ເພີ່ມງົບປະມານຊ່ວຍໜູນສຶກສາ ໃນ 148 ເມືອງໃນຂອບເຂດທົ່ວປະເທດ, ຈຳນວນ 8 ຕື້ກີບ ເພື່ອຕິດຕາມ, ຊຸກຍູ້ການຮຽນ-ການສອນ ຂອງຄູ ແລະ ກອງປະຊຸມຄູປະຈໍາປີ.

ສະແດງຄຳຄິດເຫັນ