“ໝີ່ສຳເລັດຮູບ” ບໍ່ແມ່ນອາຫານອັນຕະລາຍ! ແພດຜູ້ຊ່ຽວຊານແນະນຳ 4 ວິທີ ກິນແບບບໍ່ທຳລາຍສຸຂະພາບ

 

ມີ 4 ປັດໄຈທີ່ເຮັດໃຫ້ໝີ່ສຳເລັດຮູບກາຍເປັນອາຫານທີ່ບໍ່ດີຕໍ່ສຸຂະພາບ ຊຶ່ງຜູ້ຊ່ຽວຊານໄດ້ແນະນຳວິທີກິນໝີ່ສຳເລັດຮູບຢ່າງປອດໄພ ໂດຍບໍ່ຈຳເປັນຕ້ອງຫຼີກຫຼ່ຽງອາຫານຊະນິດນີ້

 

ໝີ່ສຳເລັດຮູບຫຼາຍຄົນອາດຄິດວ່າເປັນ “ອາຫານອັນຕະລາຍ” ເພາະໃຫ້ພະລັງງານສູງ ແລະ ມີສານປຸງແຕ່ງຫຼາຍຊະນິດທີ່ອາດເປັນອັນຕະລາຍຕໍ່ຮ່າງກາຍ

 

 

 

ໃນໂພສໃນເຟສບຸກຂອງ “ໝໍເສີນ ເຈ່ຽເຫວິນ” ແພດຜູ້ຊ່ຽວຊານດ້ານເມຕາບໍລິຊຶມຈາກຈີນ ລະບຸວ່າ ໝີ່ສຳເລັດຮູບເກືອບຈະກາຍເປັນສ່ວນໜຶ່ງໃນຊີວິດຂອງຄົນຍຸກໃໝ່ ເຖິງແມ່ນທຸກຄົນຈະຮູ້ວ່າບໍ່ດີຕໍ່ສຸຂະພາບ ໂດຍລາວເປີດເຜີຍວ່າໝີ່ສຳເລັດຮູບມີ 4 ປັດໄຈຫຼັກທີ່ເປັນອັນຕະລາຍ ໄດ້ແກ່:

 

• ໂຊດ້ຽມສູງ: ປະລິມານໂຊດ້ຽມໃນໝີ່ໜຶ່ງຊອງອາດສູງເຖິງ 1,500–2,000 ມິນລິກຣາມ ຫຼື ຫຼາຍກວ່າ ຫາກຮັບປະທານໂຊດ້ຽມໃນປະລິມານຫຼາຍເປັນເວລານານ ອາດເພີ່ມຄວາມສ່ຽງຕໍ່ຄວາມດັນໂລຫິດສູງ ໂລກຫົວໃຈ ແລະ ໂລກໄຕ

 

• ນ້ຳມັນພືດທີ່ໃຊ້ທອດເສັ້ນ: ການທອດເສັ້ນດ້ວຍອຸນຫະພູມສູງເຮັດໃຫ້ເກີດໄຂມັນທີ່ຖືກອອກຊິໄດຊ໌ ແລະ ໄຂມັນທຣານສ໌ໃນບາງສ່ວນ ຊຶ່ງຫາກສະສົມຫຼາຍອາດເຮັດໃຫ້ເກີດການອັກເສບຊ້ຳເຮື້ອ ແລະ ບັນຫາກ່ຽວກັບໄຂມັນໃນເລືອດ

 

• ສານອາຫານຕ່ຳ: ເຖິງແມ່ນວ່າຈະໃຫ້ພະລັງງານສູງ ແຕ່ໝີ່ມັກຂາດວິຕາມິນ ແຮ່ທາດ ໄຟເບີ ແລະ ສານຕ້ານອະນຸມູນອິສະຫຼະ

 

• ເຮັດໃຫ້ນ້ຳຕານໃນເລືອດສູງ ແລະ ອິ່ມບໍ່ດົນ: ເພາະສ່ວນປະກອບຫຼັກແມ່ນແປ້ງຂັດຂາວຊຶ່ງຍ່ອຍງ່າຍ ເຮັດໃຫ້ນ້ຳຕານໃນເລືອດຂຶ້ນໄວ

 

ກິນໝີ່ສຳເລັດຮູບແນວໃດໃຫ້ປອດໄພ?

 

ໝໍເສີນແນະນຳ 4 ວິທີຫຼຸດຜົນເສຍຈາກໝີ່ ໄດ້ແກ່:

 

1. ຄວບຄຸມການໃຊ້ເຄື່ອງປຸງໃນຊອງ: ຫຼຸດປະລິມານເຄື່ອງປຸງລົງເຄິ່ງໜຶ່ງ ແລະ ຫຼີກຫຼ່ຽງການດື່ມນ້ຳຊຸບ ເພື່ອຄວບຄຸມປະລິມານໂຊດ້ຽມທີ່ເຂົ້າສູ່ຮ່າງກາຍ

2. ເພີ່ມໂປຣຕີນ ແລະ ໃຍອາຫານໃນຕົ້ມໝີ່: ເຊັ່ນ: ໃສ່ໄຂ່ (ລວກ/ຕົ້ມຍາງມະຕູມ), ເຕົ້າຫູ້, ຟອງເຕົ້າຫູ້, ເນື້ອບໍ່ຕິດມັນ ແລະ ຜັກຕ່າງໆ ເຊັ່ນ: ຜັກກວາງຕຸ້ງ, ເຫັດ ເປັນຕົ້ນ

3. ເລືອກໝີ່ສູດສຸຂະພາບ: ເຊັ່ນ: ໝີ່ບໍ່ຜ່ານການທອດ ຫຼື ໝີ່ສູດຫຼຸດໂຊດ້ຽມ ຫາກເປັນໝີ່ທີ່ຜ່ານການທອດ ແນະນຳໃຫ້ ລວກເສັ້ນ ຫຼື ແຊ່ນ້ຳກ່ອນ ແລ້ວຖອກນ້ຳຖິ້ມ ກ່ອນນຳໄປຕົ້ມແລ້ວຄ່ອຍປຸງ ວິທີນີ້ຈະຊ່ວຍຫຼຸດນ້ຳມັນທີ່ໃຊ້ທອດ ແລະສານອັນຕະລາຍທີ່ເກີດຈາກຄວາມຮ້ອນສູງ ລວມທັງຊ່ວຍຫຼຸດປະລິມານເກືອລົງອີກດ້ວຍ

4. ຄວບຄຸມຄວາມຖີ່: ໝໍແນະນຳວ່າຫາກຮັບປະທານພຽງອາທິດລະເທື່ອ ແລະ ເຮັດຕາມວິທີທີ່ແນະນຳ ກໍບໍ່ຕ້ອງກັງວົນຫຼາຍ

 

 

ໝໍເສີນຍັງກ່າວອີກວ່າ ໝີ່ສຳເລັດຮູບບໍ່ແມ່ນອາຫານຕ້ອງຫ້າມໂດຍສິ້ນເຊິງ ເຊັ່ນດຽວກັບຂອງວ່າງອື່ນໆ ສິ່ງສຳຄັນແມ່ນ “ກິນແນວໃດ ກິນຫຼາຍປານໃດ ແລະ ກິນຮ່ວມກັບອັນໃດ”

 

 

ສະແດງຄຳຄິດເຫັນ