ກະຊວງສາທາລະນະສຸກ ເນັ້ນໃຫ້ພະນັກງານແພດໝໍ ມີຈັນຍາທໍາວິຊາຊີບ ແລະ ຄວາມຊໍານານງານດ້ານວິຊາສະເພາະເພື່ອເປັນນັກຮົບເສື້ອຂາວປະຕິວັດຂອງພັກ, ກາຍເປັນແພດແຫ່ງຊາດ ແລະ ແພດປະຊາຊົນຢ່າງສົມກຽດສັກສີ.

ເມື່ອບໍ່ດົນມານີ້, ທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ກ່າວຄໍາເຫັນເນື່ອງໃນວັນແພດລາວ 18 ມິຖຸນາ ຄົບຮອບ 60 ປີ (18 ມິຖຸນາ 1965-18 ມິຖຸນາ 2025) ວ່າ: ການສະເຫຼີມສະຫຼອງ ວັນແພດລາວ 18 ມີຖຸນາ ເປັນການປູກຈິດສໍານຶກ ໃຫ້ແກ່ພະນັກງານແພດໝໍ, ພະຍາບານ, ພະນັກງານສາທາລະນະສຸກລາວ ຮຸ່ນສືບທອດ ໄດ້ຮໍ່າຮຽນເອົາແບບຢ່າງອັນດີງາມ ຂອງແພດໝໍ ແລະ ພະນັກງານສາທາລະນະສຸກ ຮຸ່ນກ່ອນ, ອອກແຮງຝຶກຝົນຫຼໍ່ຫຼອມ ສ້າງຕົນເອງ ໃຫ້ພຽບພ້ອມ ໄປດ້ວຍຄຸນສົມບັດ ສິນທໍາປະຕິວັັດ, ຈັນຍາທໍາວິຊາຊີບ ແລະ ຄວາມຊໍານານງານ ດ້ານວິຊາສະເພາະ ເພື່ອເປັນນັກຮົບເສື້ອຂາວປະຕິວັດ ຂອງພັກ, ກາຍເປັນແພດແຫ່ງຊາດ ແລະ ແພດປະຊາຊົນ ຢ່າງສົມກຽດສັກສີ.

ທ່ານ ດຣ ບຸນແຝງ ພູມມະໄລສິດ ໄດ້ກ່າວອີກວ່າ: ວັນແພດລາວ ແມ່ນວັນໜຶ່ງ ທີ່ມີຄວາມໝາຍ ເປັນປະຫວັດສາດ ອັນລໍ້າຄ່າ ຂອງຂະແໜງການສາທາລະນະສຸກ ເປັນ ວັນສ້າງຂະບວນການກິດຈະກໍາຕ່າງໆ ເພື່ອລະນຶກເຖິງຜົນງານ ແລະ ຍ້ອງຍໍສັນລະເສີນຄຸນງາມ ຄວາມດີ ຂອງແພດລາວ ໃນສະໄໝຕໍ່ສູ້ກູ້ຊາດ ກໍ່ຄື ສະໄໝປົກປັກຮັກສາ ແລະ ສ້າງສາປະເທດຊາດ.

ການແພດລາວ ໄດ້ກໍາເນີດຂຶ້ນ ຜ່ານຂະບວນວິວັດ ແຫ່ງການເຕີບໃຫຍ່ຂອງການແພດ ໃນແຕ່ລະສະໄໝ ມາແຕ່ດຶກດໍາບັນ ແລະ ຕິດພັນກັບ ການຕໍ່ສູ້ກູ້ຊາດ ແຕ່ລະໄລຍະ. ໃນປີ 1963 ສະໜາມຮົບຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບໃໝ່ ໄດ້ເປີດກວ້າງອອກທົ່ວປະເທດ, ເຂດປົດປ່ອຍ ກໍ່ນັບມື້ນັບຂະຫຍາຍຕົວ, ແພດໝໍ ໃນໄລຍະນັ້ນ ແມ່ນນອນຢູ່ໃນການຈັດຕັ້ງຂອງເສນາຮັກ ແລະ ໄດ້ເຮັດໜ້າທີ່ຂອງຕົນ ໃນການຮັກສາ ແລະ ປິ່ນປົວພະຍາດ ໃຫ້ແກ່ພະນັກງານນັກຮົບ ແລະ ປະຊາຊົນ ບັນດາເຜົ່າ.

ເມື່ອສູນກາງພັກ ມີນະໂຍບາຍ “ສ້າງເຂດປົດປ່ອຍ ໃຫ້ເປັນລັດໜຶ່ງ”ໃນວັນທີ 18 ມີຖຸນາ1965 ໄດ້ຕົກລົງ ແຍກຂະແໜງສາທາລະນະສຸກ ອອກເປັນ 2 (ສອງ) ການຈັດຕັ້ງ ຄື: ເສນາຮັກ ເພື່ອຮັບໃຊ້ກອງທັບ ແລະ ສາທາລະນະສຸກສູນກາງ ເພື່ອຮັບໃຊ້ພົນລະເຮືອນ.

ກອງປະຊຸມສາທາລະນະສຸກທົ່ວປະເທດ ຄັ້ງທີ II ວັນທີ 11 ມີນາ 1987, ທ່ານ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ໄດ້ສະເໜີ ໃຫ້ຄະນະເລຂາທິການສູນກາງພັກ ແລະ ສະພາລັດຖະມົນຕີ ເລືອກເອົາມື້ໃດມື້ໜຶ່ງ ທີ່ມີຄວາມໝາຍປະຫວັດສາດ ເປັນ“ວັນແພດລາວ”.

ຈາກແນວຄິດຊີ້ນໍາ ຂອງປະທານໄກສອນ ພົມວິຫານ ແລະ ເຫດຜົນ ທີ່ໄດ້ກ່າວມາຂ້າງເທິງນັ້ນ ກະຊວງສາທາລະນະສຸກ ໄດ້ນໍາສະເໜີ ລັດຖະບານ ແລະ ສະພາແຫ່ງຊາດ ຊຸດທີ VII ແລະ ໄດ້ຮັບການເຫັນດີ ໃຫ້ບັນຈຸເຂົ້າໃນກົດໝາຍວ່າດ້ວຍການປິ່ນປົວ ສະບັບປັບປຸງ ເລກທີ 58/ສພຊ, ລົງວັນທີ 24 ທັນວາ 2014, ໝວດ 10 ມາດຕາ 76  ເຊີ່ງໄດ້ກໍານົດ ເອົາ ວັນທີ 18 ມີຖຸນາ ເປັນ “ວັນແພດລາວ” ແລະ ຕໍ່ມາຕາມກົດໝາຍວ່າດ້ວຍສາທາລະນະສຸກ ສະບັບເລກທີ 38/ສພຊ, ລົງວັນທີ 17 ກໍລະກົດ 2023 ພາກທີ IX ມາດຕາ 56 ລັດ ກຳນົດເອົາວັນແພດລາວ ວັນທີ 18 ມິຖຸນາ ເປັນ “ວັນ ສາທາລະນະສຸກ”.

ສະແດງຄຳຄິດເຫັນ