ກອງກຳລັງຍີ່ປຸ່ນທົດສອບຍິງ “ຂີປະນາວຸດຈາກພື້ນຍິງໄປສູ່ເຮືອ” ເທິງດິນແດນຂອງຍີ່ປຸ່ນເປັນຄັ້ງທຳອິດ ຂະນະທີ່ປະເທດກຳລັງເລັ່ງເສີມກຳລັງທາງທະຫານເພື່ອຍັບຍັ້ງຈີນ

ມື້ນີ້ 25 ມິຖຸນາ ຍີ່ປຸ່ນປະກາດວ່າການທົດສອບຂີປະນາວຸດຈາກພື້ນສູ່ເຮືອຄັ້ງທຳອິດພາຍໃນດິນແດນຂອງຕົນເປັນສິ່ງຈຳເປັນໃນການຝຶກຝົນ ເນື່ອງຈາກປັດຈຸບັນມີ “ສະພາບແວດລ້ອມດ້ານຄວາມປອດໄພທີ່ເຂັ້ມງວດ” ແລະ ຕ້ອງການເພີ່ມສັກຢະພາບທາງທະຫານເພື່ອຕ້ານຕໍ່ຈີນ

ກອງພົນປືນໃຫຍ່ທີ່ 1 ຂອງກອງກຳລັງປ້ອງກັນຕົນເອງພາກພື້ນດິນຂອງຍີ່ປຸ່ນ (JGSDF) ຍິງຂີປະນາວຸດ “ໄທປ໌-88” (Type-88) ລູກໜຶ່ງໄປຍັງນ່ານນ້ຳມະຫາສະໝຸດແປຊິຟິກຈາກສະໜາມຝຶກເທິງເກາະຮອກໄກໂດ ໂດຍໃຊ້ຂີປະນາວຸດຝຶກໂຈມຕີເຮືອທີ່ບໍ່ມີລູກເຮືອ ຫ່າງຈາກຊາຍຝັ່ງທາງໃຕ້ຂອງເກາະໄປປະມານ 40 ກິໂລແມັດ

ເນື່ອງດ້ວຍຂໍ້ຈຳກັດດ້ານພື້ນທີ່ ແລະ ຂໍ້ກັງວົນດ້ານຄວາມປອດໄພ ຍີ່ປຸ່ນຈຶ່ງເຄີຍດຳເນີນການທົດສອບຂີປະນາວຸດໃນອະດີດທີ່ສະຫະລັດ ຊຶ່ງເປັນພັນທະມິດຕາມສົນທິສັນຍາ ແລະ ອົດສະຕາລີ ຊຶ່ງເປັນພັນທະມິດດ້ານການປ້ອງກັນຊັ້ນນຳຂອງຍີ່ປຸ່ນ ຊຶ່ງມີພື້ນທີ່ຝຶກຝົນທີ່ກວ້າງຂວາງ ແຕ່ການຝຶກຊ້ອມດັ່ງກ່າວມີຄ່າໃຊ້ຈ່າຍສູງ ເນື່ອງຈາກຈຳນວນບຸກຄະລາກອນທີ່ເຂົ້າຮ່ວມມັກມີຈຳກັດ

ໂຍຊິມາສະ ຮາຍາຊິ ໂຄສົກລັດຖະບານ ກ່າວໃນການຖະແຫຼງຂ່າວປະຈຳວັນພຸດວ່າ “ການຝຶກຊ້ອມຍິງແທ້ໆ ໃນປະເທດເຊັ່ນນີ້ເປັນໂອກາດໃຫ້ທະຫານໄດ້ຝຶກຊ້ອມໄດ້ຫຼາຍຂຶ້ນ” ລາວກ່າວວ່າ ການຝຶກຊ້ອມດັ່ງກ່າວ “ມີຄວາມສຳຄັນຢ່າງຍິ່ງສຳລັບເຮົາໃນການຮັກສາ ແລະ ປັບປຸງຄວາມສາມາດໃນການປ້ອງກັນເກາະ ແລະ ພື້ນທີ່ອື່ນໆ ເມື່ອພິຈາລະນາຈາກສະພາບແວດລ້ອມດ້ານຄວາມປອດໄພທີ່ເຂັ້ມງວດໃນປັດຈຸບັນ”

ລາວເນັ້ນຢ້ຳວ່າການຝຶກຊ້ອມບໍ່ໄດ້ມຸ່ງເປົ້າໄປທີ່ປະເທດໃດປະເທດໜຶ່ງໂດຍສະເພາະ ແຕ່ກ່ອນໜ້ານີ້ ຍີ່ປຸ່ນເຄີຍເອີ້ນຈີນຊຶ່ງເປັນປະເທດເພື່ອນບ້ານວ່າເປັນຄວາມທ້າທາຍດ້ານຄວາມໝັ້ນຄົງທີ່ຍິ່ງໃຫຍ່ທີ່ສຸດ ຂະນະທີ່ຈີນກຳລັງສ້າງຂີດຄວາມສາມາດທາງທະຫານໃນພູມິພາກ

ສື່ຍີ່ປຸ່ນລາຍງານວ່າຄ່າເງິນເຢັນຂອງຍີ່ປຸ່ນທີ່ອ່ອນຄ່າລົງເມື່ອທຽບກັບສະກຸນເງິນອື່ນ ຍັງເຮັດໃຫ້ຕົ້ນທຶນການໃຊ້ສະຖານທີ່ຝຶກອົບຮົມຂອງສະຫະລັດສູງຂຶ້ນອີກດ້ວຍ ຂະນະທີ່ຍີ່ປຸ່ນຢູ່ລະຫວ່າງກະບວນການເພີ່ມຄ່າໃຊ້ຈ່າຍດ້ານການປ້ອງກັນປະເທດເປັນເວລາຫຼາຍປີໃຫ້ເຖິງມາດຕະຖານຂອງອົງການນາໂຕ ທີ່ປະມານຮ້ອຍລະ 2 ຂອງຜະລິດຕະພັນມວນລວມໃນປະເທດ

ຍີ່ປຸ່ນຍັງເສີມຄວາມແຂງແກ່ງໃຫ້ກັບພັນທະມິດທາງທະຫານກັບສະຫະລັດ ໂດຍເຄື່ອນໄຫວເພື່ອໃຫ້ກອງກຳລັງຂອງສະຫະລັດ ແລະ ຍີ່ປຸ່ນ ມີຄວາມຄ່ອງຕົວຫຼາຍຂຶ້ນໃນການຕອບສະໜອງຕໍ່ໄພຄຸກຄາມ ເຊັ່ນ: ການຮຸກຮານໄຕ້ຫວັນຂອງຈີນ

ສະແດງຄຳຄິດເຫັນ