ແຂວງກຸ້ຍໂຈວ ທາງຕາເວັນຕົກສຽງໃຕ້ຂອງຈີນ ກຳລັງປະເຊີນກັບວິກິດການນ້ຳຖ້ວມຄັ້ງໃຫຍ່ ຫຼັງຈາກເກີດຝົນຕົກໜັກຢ່າງຕໍ່ເນື່ອງ ສົ່ງຜົນໃຫ້ເມືອງຫຣົງຈຽງ (Rongjiang) ແລະເມືອງສົງຫຽງ (Congjiang) ຕ້ອງປະກາດສະຖານະສຸກເສີນລະດັບສູງສຸດ ພ້ອມອົບພະຍົບປະຊາຊົນກວ່າ 83,000 ຄົນອອກຈາກພື້ນທີ່ສ່ຽງເພື່ອຄວາມປອດໄພ

 

ລັດຖະບານຈີນໄດ້ຍົກລະດັບການເຕືອນໄພນ້ຳຖ້ວມຈາກລະດັບ 1 ເປັນລະດັບ 4 ຊຶ່ງເປັນລະດັບສູງສຸດຂອງປະເທດ ໂດຍສະຖານະການໃນ “ຫຣົງຈຽງ” ໜ້າເປັນຫ່ວງຢ່າງຍິ່ງ ເນື່ອງຈາກຝົນຕົກບໍ່ຢຸດຕັ້ງແຕ່ຄືນວັນຈັນທີ່ຜ່ານມາ ສົ່ງຜົນໃຫ້ລະດັບນ້ຳໃນແມ່ນ້ຳຕູຫຼິ່ວ (Duliu River) ເພີ່ມສູງເກີນລະດັບເຕືອນໄພເຖີງ 6.68 ແມັດ ພາຍໃນໄລຍະເວລາພຽງ 18 ຊົ່ວໂມງ

 

 

ໜ່ວຍກູ້ໄພຈາກກອງທັບຈີນ ນັກດັບເພີງ ແລະ ອາສາສະໝັກຕ່າງໆ ເລັ່ງເຂົ້າພື້ນທີ່ພ້ອມເຮືອ ແລະ ອຸປະກອນກູ້ຊີບ ເພື່ອຊ່ວຍເຫຼືອປະຊາຊົນທີ່ຕິດຄ້າງຢູ່ໃນພື້ນທີ່ນ້ຳຖ້ວມ ລວມເຖິງຂົນຍ້າຍສິ່ງຂອງຈຳເປັນອອກຈາກພື້ນທີ່ສ່ຽງຢ່າງເລັ່ງດ່ວນ

 

ດ້ານຄະນະກຳມະການພັດທະນາ ແລະ ປະຕິຮູບແຫ່ງຊາດຈີນ (NDRC) ໄດ້ອະນຸມັດງົບປະມານຊ່ວຍເຫຼືອສຸກເສີນຈຳນວນ 100 ລ້ານຫຍວນ ເພື່ອໃຊ້ໃນການຟື້ນຟູໂຄງສ້າງພື້ນຖານທີ່ໄດ້ຮັບຄວາມເສຍຫາຍຈາກນ້ຳຖ້ວມ ບໍ່ວ່າຈະເປັນຖະໜົນຫົນທາງ ລະບົບຄວບຄຸມນ້ຳຖ້ວມ ໂຮງໝໍ ແລະ ໂຮງຮຽນໃນພື້ນທີ່ປະສົບໄພ

 

ສະຖານະການນ້ຳຖ້ວມຄັ້ງນີ້ສະແດງເຖິງຄວາມທ້າທາຍທີ່ຈີນຕ້ອງປະເຊີນຈາກພາວະອາກາດປ່ຽນແປງສຸດຂັ້ນໃນປະຈຸບັນ ໂດຍສະເພາະໃນພື້ນທີ່ຊົນນະບົດທີ່ມີພູມິປະເທດຊັບຊ້ອນ ແລະ ຍັງຂາດລະບົບປ້ອງກັນໄພທີ່ຄຸ້ມຄອງ ລັດຖະບານຈີນຈຶ່ງເລັ່ງເດີນໜ້າດຳເນີນມາດຕະການຟື້ນຟູຄວບຄູ່ກັບການກຽມຄວາມພ້ອມຮັບມືກັບໄພທຳມະຊາດທີ່ອາດເກີດຂຶ້ນໃນອະນາຄົດ

 

ທັງນີ້ ເຈົ້າໜ້າທີ່ໄດ້ຂໍໃຫ້ປະຊາຊົນຕິດຕາມປະກາດເຕືອນໄພຈາກທາງການຢ່າງໃກ້ຊິດ ແລະ ຫຼີກຫຼ່ຽງການເດີນທາງເຂົ້າສູ່ພື້ນທີ່ສ່ຽງຈົນກວ່າສະຖານະການຈະຄີ່ຄາຍ

ສະແດງຄຳຄິດເຫັນ