ປະທານາທິບໍດີ ໂດນັລ ທຣຳ ເປີດເຜີຍມີ “ກຸ່ມມະຫາເສດຖີ” ພ້ອມຈະຊື້ TikTok ທີ່ເຄີຍຖືກສັ່ງແບນໃນສະຫະລັດ

ເຊື່ອໝັ້ນວ່າ ປະທານາທິ ສີ ຈິ້ນຜິງ ຈະອະນຸຍາດໃຫ້ຂາຍ ພ້ອມກັນນີ້ຜູ້ນຳສະຫະລັດ ໄດ້ເລື່ອນການບັງຄັບໃຊ້ກົດໝາຍສັ່ງໃຫ້ຂາຍ TikTok ອອກໄປເປັນຄັ້ງທີ 3 ກຳນົດເສັ້ນຕາຍ 17 ກັນຍາ ນີ້

ວັນນີ້ 30 ມິຖຸນາ 2025 ຕາມເວລາທ້ອງຖິ່ນ BBC ລາຍງານ ປະທານາທິບໍດີ ໂດນັລ ທຣຳ ຜູ້ນຳສະຫະລັດ ໄດ້ປະກາດວ່າມີຜູ້ຊື້ແອັບພລິເຄຊັນວິດີໂອສັ້ນຍອດນິຍົມເຊັ່ນ TikTok ແລ້ວ

ແອັບພລິເຄຊັນທີ່ເຄີຍຖືກສັ່ງແບນໃນສະຫະລັດ ຈາກຂໍ້ກ່າວອ້າງທີ່ວ່າອາດເປັນໄພຄຸກຄາມຕໍ່ຄວາມໝັ້ນຄົງຂອງຊາດ ໃນການສຳພາດກັບ Fox News ທຣຳກ່າວວ່າລາວມີ “ກຸ່ມບຸກຄົນທີ່ຮັ່ງມີຫຼາຍ” ທີ່ພ້ອມຈະເຂົ້າຊື້ແພລັດຟອມນີ້ ໂດຍບອກບາງສ່ວນວ່າຈະເປີດເຜີຍຂໍ້ມູນເພີ່ມເຕີມພາຍໃນປະມານ 2 ອາທິດຕໍ່ໄປ

ການຂາຍ TikTok ຄັ້ງນີ້ ຈຳເປັນຕ້ອງໄດ້ຮັບການອະນຸມັດຈາກລັດຖະບານຈີນ ແຕ່ທຣຳສະແດງຄວາມເຊື່ອໝັ້ນວ່າ ປະທານາທິບໍດີ ສີ ຈິ້ນຜິງ ໜ້າຈະດຳເນີນການໃຫ້ ໃນເດືອນນີ້ ທຣຳໄດ້ເລື່ອນການບັງຄັບໃຊ້ກົດໝາຍທີ່ສັ່ງໃຫ້ບໍລິສັດແມ່ ByteDance ຕ້ອງຂາຍ TikTok ອອກໄປເປັນຄັ້ງທີ 3 ແລ້ວ ການຂະຫຍາຍເວລາລ່າສຸດນີ້ກຳນົດໃຫ້ ByteDance ຕ້ອງເຮັດຂໍ້ຕົກລົງຂາຍແພລັດຟອມໃຫ້ໄດ້ພາຍໃນວັນທີ 17 ກັນຍາ ນີ້

ກ່ອນໜ້ານີ້ ເຄີຍມີຂໍ້ຕົກລົງທີ່ຈະຂາຍ TikTok ໃຫ້ກັບຜູ້ຊື້ຄົນອາເມລິກັນ ແຕ່ດີລດັ່ງກ່າວລົ່ມລົງໄປໃນເດືອນເມສາ ເນື່ອງຈາກເກີດຄວາມຂັດແຍ້ງລະຫວ່າງທຳນຽບຂາວກັບຈີນກ່ຽວກັບມາດຕະການພາສີຂອງທຣຳ

ເຖິງວ່າຈະຍັງບໍ່ຊັດເຈນວ່າຜູ້ຊື້ປັດຈຸບັນທີ່ທຣຳກ່າວຮອດນັ້ນ ເປັນກຸ່ມດຽວກັບຜູ້ທີ່ເຄີຍກຽມພ້ອມຈະຊື້ເມື່ອ 3 ເດືອນກ່ອນຫຼືບໍ່ ແຕ່ລັດຖະສະພາສະຫະລັດ ໄດ້ຜ່ານກົດໝາຍບັງຄັບໃຫ້ TikTok ຕ້ອງຂາຍກິດຈະການໄປຕັ້ງແຕ່ເດືອນ ເມສາ 2024 ໂດຍສະມາຊິກສະພາ ໄດ້ອ້າງຄວາມກັງວົນວ່າແອັບ ຫຼື ບໍລິສັດແມ່ ອາດສົ່ງມອບຂໍ້ມູນຜູ້ໃຊ້ຄົນສະຫະລັດ ໃຫ້ກັບລັດຖະບານຈີນ ເຊິ່ງທາງ TikTok ໄດ້ປະຕິເສດຂໍ້ກ່າວຫານີ້

ສິ່ງທີ່ໜ້າສົນໃຈຄື ທຣຳເຄີຍວິພາກວິຈານແອັບນີ້ຢ່າງໜັກ ໃນຊ່ວງວາລະທຳອິດຂອງການດຳລົງຕຳແໜ່ງປະທານາທິບໍດີ ແຕ່ປັດຈຸບັນກັບເບິ່ງວ່າມັນເປັນ ປັດໄຈສຳຄັນທີ່ຊ່ວຍໃຫ້ລາວຊະນະການເລືອກຕັ້ງເມື່ອປີທີ່ຜ່ານມາ ແລະ ຕອນນີ້ຈຶ່ງສະໜັບສະໜູນການໃຊ້ງານ TikTok ຢ່າງຕໍ່ເນື່ອງໃນສະຫະລັດ

ກົດໝາຍດັ່ງກ່າວມີກຳນົດຈະເລີ່ມບັງຄັບໃຊ້ຕັ້ງແຕ່ວັນທີ 19ມັງກອນ ແຕ່ທຣຳໄດ້ເລື່ອນການບັງຄັບໃຊ້ຊ້ຳແລ້ວຊ້ຳອີກ ຜ່ານຄຳສັ່ງບໍລິຫານ ເຊິ່ງການກະທຳດັ່ງກ່າວໄດ້ຖືກວິພາກວິຈານຢ່າງໜັກວ່າ ເປັນການລົ້ມລ້າງອຳນາດຂອງສະມາຊິກສະພາ  ໃນລັດຖະສະພາ ທາງ TikTok ເອງກໍ່ໄດ້ພະຍາຍາມຂັດແຍ້ງໃນປະເດັນດ້ານລັດຖະທຳມະນູນຂອງກົດໝາຍນີ້ ແຕ່ໄດ້ແພ້ການອຸທອນຕໍ່ສານຍຸດຕິທຳສູງສຸດສະຫະລັດໄປແລ້ວ

ສະແດງຄຳຄິດເຫັນ