ແຜ່ນດິນໄຫວຫຼາຍກວ່າ 900 ຄັ້ງສັ່ນສະເທືອນ “ໝູ່ເກາະໂທຄາຣະ” ອັນຫ່າງໄກຂອງຍີ່ປຸ່ນໃນຊ່ວງ 2 ອາທິດທີ່ຜ່ານມາ

ທາງການຍີ່ປຸ່ນລະບຸວ່າກິດຈະກຳແຜ່ນດິນໄຫວໃນບໍລິເວນນີ້ເກີດຂຶ້ນ “ຫຼາຍຄັ້ງ” ຮອບໆ ໝູ່ເກາະໂທຄາຣະມາຕັ້ງແຕ່ວັນທີ 21 ມິຖຸນາທີ່ຜ່ານມາ ແລະ ລ່າສຸດມື້ວານນີ້ (2 ກໍລະກົດ) ກໍໄດ້ເກີດແຜ່ນດິນໄຫວຂະໜາດ 5.5 ຣິກເຕີ້ດ້ວຍ

ໂດຍແຜ່ນດິນໄຫວນັບຮ້ອຍຄັ້ງທີ່ສະເທືອນໝູ່ເກາະແຫ່ງນີ້ຍັງຄົງບໍ່ມີລາຍງານຄວາມເສຍຫາຍໃດໆ ແລະ ຍັງບໍ່ມີການເຕືອນສຶນາມິເກີດຂຶ້ນ ແຕ່ທາງການທ້ອງຖິ່ນໄດ້ຂໍໃຫ້ປະຊາຊົນກຽມຄວາມພ້ອມຕະຫຼອດເວລາສໍາລັບການອົບພະຍົບທີ່ອາດເກີດຂຶ້ນໄດ້ທຸກເມື່ອ

ໝູ່ເກາະໂທຄາຣະມີປະຊາຊົນອາໄສຢູ່ບໍ່ຫຼາຍ ຫວ່າ 700 ຄົນ ແລະ ບໍ່ມີໂຮງໝໍຕັ້ງຢູ່ເທິງເກາະແຫ່ງນີ້ ໂຮງໝໍທີ່ໃກ້ທີ່ສຸດຈະຕ້ອງເດີນທາງຈາກເກາະດ້ວຍເຮືອເຟີຣີ່ໂດຍໃຊ້ເວລາຢ່າງໜ້ອຍ 6 ຊົ່ວໂມງ ເພື່ອໄປເຖິງແຂວງຄະໂງະຊິມະ

ໜຶ່ງໃນຜູ້ທີ່ອາໄສຢູ່ເທິງໝູ່ເກາະໂທຄາຣະເປີດເຜີຍຄວາມຮູ້ສຶກກັບນັກຂ່າວທ້ອງຖິ່ນວ່າ ການເຄື່ອນຕົວຂອງເປືອກໂລກເຮັດໃຫ້ພວກເຂົາຢ້ານຫຼາຍຈົນເຖິງຂັ້ນນອນບໍ່ຫຼັບ ແລະ ຮູ້ສຶກຄືວ່າພື້ນດິນເກີດການສັ່ນໄຫວຢູ່ຕະຫຼອດເວລາ ເຊັ່ນດຽວກັບຊາຍຄົນໜຶ່ງທີ່ໄດ້ເປີດເຜີຍຄວາມຮູ້ສຶກກັບໜັງສືພິມ ອາຊາຮິ ຊິມບຸນ ວ່າໄດ້ຍິນສຽງຄໍາຮາມມາຈາກມະຫາສະມຸດກ່ອນທີ່ແຜ່ນດິນໄຫວຈະເກີດໂດຍສະເພາະໃນຕອນກາງຄືນຊຶ່ງມັນເຮັດໃຫ້ໜ້າຂົນລຸກ

ເປັນທີ່ຮູ້ກັນວ່າຍີ່ປຸ່ນຄືປະເທດໜຶ່ງເທິງໂລກທີ່ປະເຊີນກັບໄພຈາກແຜ່ນດິນໄຫວຫຼາຍທີ່ສຸດ ດ້ວຍພູມິປະເທດທີ່ຕັ້ງຢູ່ເທິງ Pacific Ring of Fire ຫຼື ວົງແຫວນໄຟໃນມະຫາສະມຸດແປຊິຟິກ

ຈຸດທີ່ແຜ່ນເປືອກໂລກຫຼາຍແຜ່ນມາບັນຈົບກັນ ຈົນເຮັດໃຫ້ຍີ່ປຸ່ນຕ້ອງປະເຊີນແຜ່ນດິນໄຫວບໍ່ຕໍ່າກວ່າ 1,500 ຄັ້ງທຸກໆ ປີ ແຕ່ນັກຂ່າວຍີ່ປຸ່ນລາຍງານວ່າ ເຖິງແມ່ນໃນອະດີດໝູ່ເກາະໂທຄາຣະຈະປະເຊີນກັບແຜ່ນດິນໄຫວຢູ່ຫຼາຍຄັ້ງ ແຕ່ການເກີດແຮງສັ່ນສະເທືອນຫຼາຍກວ່າ 900 ຄັ້ງໃນຊ່ວງ 2 ອາທິດນັ້ນ ຄື “ຄວາມຜິດປົກກະຕິ”

ແຜ່ນດິນໄຫວຕໍ່ເນື່ອງນີ້ເກີດຂຶ້ນ ທ່າມກາງຄວາມກັງວົນຈາກກະແສຂ່າວໃນຍີ່ປຸ່ນວ່າໃນອີກບໍ່ດົນຫຼັງຈາກນີ້ ຈະເກີດແຜ່ນດິນໄຫວຄັ້ງໃຫຍ່ທີ່ຈະພາກຊີວິດຜູ້ຄົນຈຳນວນຫຼາຍ

ແຕ່ກະແສຂ່າວຍິ່ງສ້າງຄວາມເຊື່ອທີ່ຮຸນແຮງຫຼາຍຂຶ້ນ ເມື່ອມີຜູ້ຍົກເລື່ອງລາວໃນໜັງສືມັງງະຂອງຍີ່ປຸ່ນທີ່ແຕ່ງໂດຍ ຣຽວ ທັດສຶກິ ໃນປີ 1999 ທີ່ກ່າວວ່າແຜ່ນດິນໄຫວຄັ້ງໃຫຍ່ຈະເກີດຂຶ້ນໃນວັນທີ 5 ກໍລະກົດປີນີ້

ຊຶ່ງຖ້ານັບຈາກມື້ນີ້ກໍຄືອີກ 2 ວັນ ຍິ່ງເພີ່ມຄວາມກັງວົນໃຫ້ກັບຊາວຍີ່ປຸ່ນ ໂດຍສະເພາະຜູ້ຄົນທີ່ອາໄສຢູ່ເທິງໝູ່ເກາະໂທຄາຣະ ແລະ ກະແສຄວາມກັງວົນທີ່ເກີດຂຶ້ນເຮັດໃຫ້ນັກທ່ອງທ່ຽວຈຳນວນຫຼາຍພາກັນຍົກເລີກທຣິບເດີນທາງໃນຫຼາຍໆ ພື້ນທີ່ຂອງຍີ່ປຸ່ນ ດ້ວຍຄວາມຍ້ານວ່າແຜ່ນດິນໄຫວຄັ້ງໃຫຍ່ຈະເກີດຂຶ້ນຕາມກະແສຂ່າວ

ບໍ່ແມ່ນແຕ່ຊາວຍີ່ປຸ່ນ ແລະ ນັກທ່ອງທ່ຽວເທົ່ານັ້ນ ເລື່ອງນີ້ເຮັດໃຫ້ລັດຖະບານຍີ່ປຸ່ນເກີດຄວາມຍ້ານ ແລະ ກັງວົນມາເປັນເວລາກວ່າທົດສະວັດ

ວ່າແຜ່ນດິນໄຫວຄັ້ງໃຫຍ່ໃນລະດັບທີ່ 100 ປີ ຈະເກີດຂຶ້ນຄັ້ງໜຶ່ງຈະເກີດຂຶ້ນແທ້ທີ່ຍີ່ປຸ່ນ ຊຶ່ງຄວາມກັງວົນຂອງລັດຖະບານໄດ້ກາຍເປັນແຜນຮັບມືດ້ວຍການຄາດການວ່າຄວາມເສຍຫາຍໃນລະດັບສູງທີ່ສຸດອາດພາກຊີວິດຜູ້ຄົນໄປກວ່າ 300,000 ຄົນ

ໂດຍເມື່ອຕົ້ນອາທິດທີ່ຜ່ານມາ ລັດຖະບານຍີ່ປຸ່ນໄດ້ຮຽກຮ້ອງໃຫ້ມີມາດຕະການໃໝ່ໆ ເຊັ່ນການສ້າງຄັນກັ້ນນ້ຳ ແລະ ອາຄານສຳລັບອົບພະຍົບເພື່ອເສີມຄວາມພ້ອມຂອງປະຊາຊົນໃນກໍລະນີທີ່ເກີດໄພພິບັດລັກສະນະນີ້ຂຶ້ນ

ຢ່າງໃດກໍ່ຕາມລັດຖະບານຍີ່ປຸ່ນເຕືອນວ່າ ຍັງມີຂັ້ນຕອນອີກຫຼາຍທີ່ຕ້ອງດຳເນີນການຕໍ່ໄປເພື່ອຮັບມືເຫດການບໍ່ຄາດຝັນທີ່ອາດເກີດຂຶ້ນ

ສະແດງຄຳຄິດເຫັນ