ພາກັນແຕກຕື່ນ!!! ຖ້ຽວບິນຊຽງໄຮ້-ໂຕກຽວດິ່ງລົງຢ່າງກະທັນຫັນ 8,000 ແມັດ ຜູ້ໂດຍສານຂຽນຈົດໝາຍລາ!

ເຈແປນແອລໄລນ໌ຢືນຢັນເຫດຂັດຂ້ອງລະບົບປັບຄວາມດັນ ຕ້ອງລົງຈອດສຸກເສີນທີ່ຄັນໄຊ 191 ຊີວິດປອດໄພ ສື່ມວນຊົນຍີ່ປຸ່ນລາຍງານ 1 ກໍລະກົດ 2025 ເມື່ອຄືນມື້ວັນຈັນ 


ອ້າງຂໍ້ມູນຈາກສຳນັກງານການບິນພົນລະເຮືອນໂອຊາກ້າ ວ່າຖ້ຽວບິນ JL8696/IJ004 ຖ້ຽວບິນສາຍການບິນສະປະຣິງແອລໄລນ໌ 


ເຊິ່ງເປັນບໍລິສັດສາຍການບິນໃນເຄື່ອເຈແປນແອລໄລນ໌ ລົດລະດັບສຸກເສີນ 8,000 ແມັດ ຜູ້ໂດຍສານຂຽນຈົດໝາຍລາ

ຖ້ຽວບິນຈາກຊຽງໄຮ້ໄປສະໜາມບິນນາຣິຕະຂອງໂຕກຽວ ປະສົບເຫດການທີ່ໜ້າສັ່ນສະເທືອນ

ເມື່ອເຄື່ອງບິນລົດລະດັບລົງຢ່າງໄວຈາກລະດັບຄວາມສູງປະມານ 11,000 ແມັດເຫຼືອປະມານ 3,200 ແມັດພາຍໃນເວລາປະມານ 10 ນາທີ ຜູ້ໂດຍສານໄດ້ຮັບແຈ້ງໃຫ້ສວມໜ້າກາກອອກຊິເຈນລະຫວ່າງການລົງຈອດສຸກເສີນ

ລາຍງານລະບຸວ່າຜູ້ໂດຍສານແລະລູກເຮືອທັງໝົດ 191 ຄົນປອດໄພດີ ສາຍການບິນເຈແປນແອລໄລນ໌ຢືນຢັນກັບໂກລບອນໄທມສ໌ເມື່ອວັນອັງຄານວ່າ ເຄື່ອງບິນທີ່ເກີດເຫດເປັນຂອງສະປະຣິງແອລໄລນ໌ເຈແປນ ບໍລິສັດມີສາຍການບິນເຈແປນແອລໄລນ໌ເປັນຜູ້ຖືຫຸ້ນລາຍໃຫຍ່ທີ່ສຸດ

ດ້ານກຽວໂດນິວສ໌ ລາຍງານວ່າມີການແຈ້ງເຕືອນທີ່ບົ່ງຊີ້ເຖິງຄວາມຜິດປົກກະຕິໃນລະບົບປັບຄວາມດັນຂອງເຄື່ອງບິນ ເຊິ່ງເຮັດໜ້າທີ່ຮັກສາຄວາມດັນໃນຫ້ອງໂດຍສານ ນັກບິນສົງໄສວ່າອາດມີຄວາມດັນໃນຫ້ອງໂດຍສານຫຼຸດລົງ ຈຶ່ງແຈ້ງເຫດສຸກເສີນຕໍ່ສູນຄວບຄຸມການຈະລາຈອນທາງອາກາດ ແລະ ປ່ຽນເສັ້ນທາງການບິນໄປທີ່ສະໜາມບິນຄັນໄຊ

ຜູ້ໃຊ້ໂຊຊຽວມີເດຍຊື່ Cyue ໂພສວ່າເຄື່ອງບິນຈະເລີ່ມລົດລະດັບຢ່າງໄວກວ່າ 8,000 ແມັດ ເມື່ອເວລາປະມານ 18.40 ໂມງ ຫຼັງຈາກລົດລະດັບລົງໄດ້ປະມານ 10 ນາທີ ລູກເຮືອຄົນຫນຶ່ງປະກາດຜ່ານລະບົບອິນເຕີຄອມວ່າຈຳເປັນຕ້ອງລົດລະດັບລົງສຸກເສີນ

ສະຖານະການໃນເຄື່ອງບິນເຮັດໃຫ້ບັນຍາກາດຕຶງຄັດ ຜູ້ໂດຍສານຕ້ອງພຶ່ງພາໜ້າກາກອອກຊິເຈນເພື່ອຊ່ວຍຫາຍໃຈ ຜູ້ໂດຍສານບາງຄົນເຖິງກັບຂຽນຈົດໝາຍອຳລາ

ນາງຫວາງ ຜູ້ໂດຍສານຄົນຫນຶ່ງເລົ່າວ່າໃນຕອນທຳອິດນາງບໍ່ໄດ້ຄຳນຶງເຖິງຄວາມຮຸນແຮງຂອງສະຖານະການດັ່ງກ່າວ ຈົນສັງເກດເຫັນຄວາມເລັ່ງດ່ວນຂອງເຈົ້າໜ້າທີ່ຕ້ອນຮັບໃນເຄື່ອງບິນ ເຊິ່ງເຮັດໃຫ້ນາງຮູ້ສຶກກັງວົນຫຼາຍ ໂດຍສະເພາະຢ່າງຍິ່ງເມື່ອເຫັນເດັກນ້ອຍໄຫ້ໃນເຄື່ອງບິນ

ນາງຫວາງບັນຍາຍເຖິງຄວາມມິດງຽບທີ່ໜ້າວິຕົກກັງວົນພາຍໃນເຄື່ອງບິນຫຼັງຈາກທີ່ໜ້າກາກອອກຊິເຈນຖືກເປີດອອກ

ຢ່າງໃດກໍ່ຕາມ ຖ້ຽວບິນດັ່ງກ່າວເຊິ່ງມີຜູ້ໂດຍສານແລະລູກເຮືອລວມ 191 ຄົນ ສາມາດລົງຈອດສຸກເສີນທີ່ສະໜາມບິນຄັນໄຊ ໂດຍທັງໝົດບໍ່ໄດ້ຮັບບາດເຈັບຫຼືບໍ່ສະບາຍໃດໆ

ຂະນະນີ້ລາຍງານລະບຸວ່າສາເຫດຂອງບັນຫາຢູ່ລະຫວ່າງການສອບສວນ, ຕໍ່ມາສາຍການບິນໄດ້ສະເໜີຄ່າຊົດເຊີຍການເດີນທາງເປັນເງິນ 15,000 ເຢນ (93 ໂດລາ) ແລະ ຈັດທີ່ພັກໃຫ້ຫນຶ່ງຄືນດ້ວຍ

ສະແດງຄຳຄິດເຫັນ