ລັດຖະບານຍີ່ປຸ່ນກຽມສົ່ງອອກເຮືອພິຄາດມືສອງໃຫ້ແກ່ຟີລິບປິນ ເພື່ອຍົກລະດັບຕ້ານການຂະຫຍາຍອິດທິພົນທາງທະເລຂອງຈີນ ໃນຄວາມເຄື່ອນໄຫວທີ່ສະທ້ອນຄວາມພະຍາຍາມຂອງ 2 ປະເທດພັນທະມິດສະຫະລັດທີ່ຈະຮ່ວມກັນຮັບມືໄພຄຸກຄາມຈາກປັກກິ່ງ

ຫນັງສືພິມໂຍມິອິຣິຊິມບຸນລາຍງານໂດຍອ້າງແຫຼ່ງຂ່າວໃນລັດຖະບານທີ່ບໍ່ເປີດເຜີຍຊື່ວານນີ້ 6 ກໍລະກົດ ວ່າ ແຜນການສົ່ງອອກນີ້ກ່ຽວຂ້ອງກັບເຮືອພິຄາດຄຸ້ມກັນຊັ້ນອາບຸຄຸມະ (Abukuma) ຈຳນວນ 6 ລຳ ທີ່ປະຈຳການໃນກອງກຳລັງປ້ອງກັນຕົນເອງທາງທະເລຂອງຍີ່ປຸ່ນມາດົນກວ່າ 3 ທົດສະວັດແລ້ວ

ເກນ ນາກາທານິ ລັດຖະມົນຕີກະຊວງປ້ອງກັນປະເທດຍີ່ປຸ່ນ ແລະ ກິລເບີໂຕ ທີໂອໂດໂຣ ລັດຖະມົນຕີກະຊວງປ້ອງກັນປະເທດຟີລິບປິນ ໄດ້ບັນລຸຂໍ້ຕົກລົງເລື່ອງການສົ່ງອອກເຮືອພິຄາດລະຫວ່າງພົບກັນທີ່ສິງຄະໂປເມື່ອເດືອນ ມິຖຸນາ ຕາມລາຍງານຂອງໂຍມິອຸຣິ ທີ່ເສີມວ່າກອງທັບຟີລິບປິນຈະເຮັດການກວດເຊັກສະພາບເຮືອໃນຊ່ວງລະດູຮ້ອນປີນີ້ເພື່ອກຽມການໃນຂັ້ນສຸດທ້າຍ

ກອງທັບເຮືອຟີລິບປິນຖະແຫຼງເມື່ອວັນອາທິດ (ວັນທີ6) ວ່າ ຄະນະຜູ້ຊ່ຽວຊານທາງເຮືອຈາກຟີລິບປິນຈະເຮັດການກວດປະເມີນສະພາບເຮືອເຫຼົ່ານີ້ໃນເຊິງເລິກ ຫຼັງຈາກໄດ້ຮັບຄຳເຊີນຢ່າງເປັນທາງການຈາກກະຊວງປ້ອງກັນປະເທດຂອງຍີ່ປຸ່ນ

“ຜົນການກວດສອບຈະຖືກນຳໄປປະກອບການພິຈາລະນາເພີ່ມເຕີມກ່ຽວກັບການຈັດຊື້ ແລະ ຄວາມສອດຄ່ອງກັບແຜນການປັບປຸງກອງທັບເຮືອຟີລິບປິນ” ກອງທັບເຮືອຟີລິບປິນລະບຸ ພ້ອມເສີມວ່າຄວາມຄິດລິເລີ່ມນີ້ສະທ້ອນໃຫ້ເຫັນເຖິງຄວາມເປັນຫຸ້ນສ່ວນເຊິງຍຸດທະສາດທີ່ເລິກເຊິ່ງຍິ່ງກວ່າເກົ່າລະຫວ່າງຟີລິບປິນກັບຍີ່ປຸ່ນ

ໂຄສົກກະຊວງປ້ອງກັນປະເທດຍີ່ປຸ່ນປະຕິເສດທີ່ຈະໃຫ້ຄວາມເຫັນກ່ຽວກັບລາຍງານຂອງໂຍມິອຸຣິ ຂະນະທີ່ກະຊວງຕ່າງປະເທດຈີນກໍຍັງບໍ່ຕອບກັບການຂໍຄວາມເຫັນຂອງຣອຍເຕີ

ໂຕກຽວ ແລະ ມະນິລາລະບຸຕົງກັນວ່າ ພວກເຂົາກຳລັງພົບກັບຄວາມທ້າທາຍຈາກການກະທຳທີ່ແຂງກ້າວຫຼາຍຂຶ້ນຂອງຈີນໃນນ່ານນ້ຳຕ່າງໆ ລວມທັງທະເລຈີນໃຕ້ສຳລັບຟີລິບປິນ ແລະ ທະເລຈີນຕາເວັນອອກສຳລັບຍີ່ປຸ່ນ

ຄວາມຮ່ວມມືທາງທະຫານທະວິພາຄີລະຫວ່າງຍີ່ປຸ່ນກັບຟີລິບປິນຍັງລວມທັງການຝຶກຊ້ອມຮ່ວມ ແພັກເກດຄວາມຊ່ວຍເຫຼືອດ້ານເຣດາຈາກຍີ່ປຸ່ນ ແລະ ການເຈລະຈາເຊິງຍຸດທະສາດລະດັບສູງ

ປີທີ່ຜ່ານມາ ຟີລິບປິນ ແລະ ຍີ່ປຸ່ນໄດ້ລົງນາມຂໍ້ຕົກລົງການເຂົ້າເຖິງແບບຕ່າງຕອບແທນ ທີ່ຖືເປັນຄັ້ງທຳອິດສຳລັບຍີ່ປຸ່ນໃນເອເຊຍ ໂດຍຈະອະນຸຍາດໃຫ້ທັງ 2 ຝ່າຍສົ່ງກອງກຳລັງເຂົ້າໄປຍັງດິນແດນຂອງກັນແລະກັນໄດ້

ເພື່ອກຳຈັດອຸປະສັກໃນການສົ່ງອອກເຮືອພິຄາດພາຍໃຕ້ລັດຖະທຳມະນູນສັນຕິພາບຂອງຍີ່ປຸ່ນ ໂຕກຽວຈະຖືວ່າການຕິດຕັ້ງອຸປະກອນ ແລະ ລະບົບສື່ສານທີ່ມະນິລາຮ້ອງຂໍເປັນໂຄງການພັດທະນາຮ່ວມກັນ ຕາມລາຍງານຂອງຫນັງສືພິມໂຍມິອຸຣິ

ສຳລັບເຮືອພິຄາດຄຸ້ມກັນຊັ້ນອາບູຄຸມະທີ່ຖືເປັນເຮືອພິຄາດຂະໜາດນ້ອຍ ທີ່ມີລະວາງຂັບນ້ຳມາດຕະຖານ 2,000 ໂຕນ ປະຕິບັດການໂດຍລູກເຮືອປະມານ 120 ຄົນ ແລະ ມີການຕິດຕັ້ງຂີປະນາວຸດຕ້ານເຮືອດຳນ້ຳ ຂີປະນາວຸດຕ້ານເຮືອ ທໍ່ຕໍຣະປິໂດ ແລະ ປືນ ຕາມຂໍ້ມູນຈາກເວັບໄຊຂອງກອງກຳລັງປ້ອງກັນຕົນເອງທາງທະເລຍີ່ປຸ່ນ

ທັງນີ້ ກອງທັບເຮືອຟີລິບປິນຍັງບໍ່ມີເຮືອພິຄາດປະຈຳການ ມີພຽງເຮືອຟິຣິເກດ ແລະ ເຮືອຄໍເວດທີ່ໂດຍທົ່ວໄປຈະມີຂະໜາດນ້ອຍ ແລະ ຕິດຕັ້ງພຽງອາວຸດເບົາ

ສະແດງຄຳຄິດເຫັນ