ແຂວງອຸດົມໄຊ ເປີດປ້າຍໂຄສະນາ ປູກຈິດສຳນຶກ ຫ້າມ ຊື້-ຂາຍ ສັດປ່າ ທີ່ຜິດກົດໝາຍ

    0
    102

    ຕອນເຊົ້າວັນທີ 18 ມັງກອນນີ້ ທີ່ກອງກວດກາປ່າໄມ້ ແຂວງອຸດົມຊ ໄດ້ຈັດພິທີເປີດປ້າຍໂຄສະນາ ປູກຈິດສຳນຶກ ກ່ຽວກັບການຢຸດຕິດການລ່າ, ຊື້-ຂາຍ ສັດປ່າ ພືດປ່າ ປະເພດຫວງຫ້າມ ໂດຍການເຂົ້າຮ່ວມຂອງ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ທ່ານ ບຸນເກີດ ສະຫນອງໄຊ ຮອງຫົວຫນ້າພະແນກ ກະສິກຳ ແລະ ປ່າໄມ້ແຂວງ, ທ່ານ ລໍລິດ ພາເລັນທີນີ ຫົວຫນ້າອົງການກອງທຶນອະນຸລັກ ທຳມະຊາດໂລກ ປະຈຳລາວ ( WWF ປະຈຳລາວ ), ມີຕາງຫນ້າກົມກວດກາປ່າໄມ້, ກະຊວງກະສິກຳ ແລະ ປ່າໄມ້, ພະແນກການ, ເມືອງໄຊ ແລະພາກສ່ວນທີ່ກ່ຽວຂ້ອງ ເຂົ້າຮ່ວມ.


    ໃນພິທີ ທ່ານ ບຸນເກີດ ສະຫນອງໄຊ ຮອງຫົວຫນ້າພະແນກ ກະສິກຳ ແລະ ປ່າໄມ້ ແຂວງອຸດົມໄຊ ໄດ້ມີຄຳເຫັນ ພ້ອມທັງກ່າວເປີດພິທີ ຢ່າງເປັນທາງການ ຈາກນັ້ນ ທ່ານ ລໍລິດ ພາເລັນທີນີ ຫົວຫນ້າອົງການກອງທຶນ ອະນຸລັກທຳມະຊາດໂລກ ປະຈຳລາວ ໄດ້ສະແດງຄວາມຄິດເຫັນ ທ່ານໄດ້ຍົກໃຫ້ເຫັນເຖິງຄວາມສຳຄັນ ແລະ ຄວາມຈຳເປັນ ໃນການປູກຈິດສຳນຶກ ໃຫ້ປະຊາຊົນ ໃນທົ່ວສັງຄົມ ເວົ້າລວມ, ເວົ້າສະເພາະ ໃນແຂວງອຸດົມໄຊ ໃຫ້ຮັບຮູ້ ແລະ ເຂົ້າໃຈ ກ່ຽວກັບການຢຸດຕິການລ່າ, ຊື້-ຂາຍ ສັດປ່າ ແລະ ພືດປ່າ ປະເພດຫວງຫ້າມ ດ້ວຍການໂຄສະນາ ຜ່ານຮູບການຕ່າງໆ ແລະ ອົງການ ກອງທຶນອະນຸລັກ ທຳມະຊາດໂລກ ປະຈຳລາວ ຍັງຈະສືບຕໍ່ໃຫ້ການຮ່ວມມື, ຊຸກຍູ້, ຊ່ວຍເຫຼືອ ແລະ ສະຫນັບສະຫນູນ ພາກລັດ ຢ່າງຕໍ່ເນື່ອງ.


    ເວົ້າລວມແລ້ວ ການເປີດປ້າຍໂຄສະນາ ປູກຈິດສຳນຶກ ກ່ຽວກັບການຫ້າມ ລ່າ, ຊື້-ຂາຍ ສັດປ່າ ແລະ ພືດປະເພດຫວງຫ້າມນີ້ ກໍເພື່ອປະຕິບັດຕາມສົນທິສັນຍາສາກົນ ວ່າດ້ວຍການຄ້າຂາຍ ຊະນິດພັນສັດປ່າ ແລະ ພືດປ່າ ລະຫວ່າງຊາດ, ນະໂຍບາຍ ຂອງລັດຖະບານ ແຫ່ງ ສປປ ລາວ ກ່ຽວກັບການປົກປັກຮັກສາ ແລະ ອະນຸລັກຊີວະນາໆພັນ, ກົດຫມາຍ ວ່າດ້ວຍ ສັດນ້ຳ – ສັດປ່າ ຂອງ ສປປ ລາວ ສະບັບປັບປຸງ ປີ 2021 ແລະ ລະບຽບການອື່ນໆ ຢ່າງເຂັ້ມງວດ. ທັງເປັນການ ຄຸ້ມຄອງຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມ ຊີວະນາໆພັນ ໃຫ້ມີຄວາມຍືນຍົງ, ເຮັດໃຫ້ປະຊາຊົນບັນດາເຜົ່າ ມີຄວາມຕື່ນຕົວເປັນເຈົ້າການຮ່ວມກັນ ຕໍ່ກັບການຕ້ານ ແລະ ສະກັດກັ້ນ ການລັກລອບທຳລາຍ ສັດນ້ຳ-ສັດປ່າ ແລະ ຊັບພະຍາກອນທໍາມະຊາດ, ເຄົາລົບ ແລະ ຈັດຕັ້ງປະຕິບັດຕາມລະບຽບກົດຫມາຍ ສັດນ້ຳ-ສັດປ່າ ຢ່າງເຄັ່ງຄັດ.


    ໂອກາດດັ່ງກ່າວ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ທ່ານ ບຸນເກີດ ສະຫນອງໄຊ ຮອງຫົວຫນ້າ ພະແນກ ກະສິກຳ ແລະ ປ່າໄມ້ແຂວງ ແລະ ທ່ານ ລໍລິດ ພາເລັນທີນີ ຫົວຫນ້າອົງການກອງທຶນ ອານຸລັກທຳມະຊາດໂລກ ປະຈຳລາວ ໄດ້ຮ່ວມກັນຕັດແທບຜ້າ ເປີດປ້າຍ ຢ່າງເປັນທາງການ. ຂ່າວ: ຄານມະນີ ຮຽນດໍຈັນ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.