ສິນຄ້າ ອາຫານ ກະປ໋ອງ ລາວ 3 ລາຍການ ກຽມຖືກສົ່ງໄປຈຳໜ່າຍຕະຫຼາດ ປະເທດ ຈີນ

    0
    779

    ໃນວັນທີ 27 ມັງກອນ 2022 ຢູ່ທີ່ໂຮງແຮມແລນມາກຣີເວີຊາຍ ນະຄອນຫຼວງວຽງຈັນ, ໃຫ້ກຽດເຂົ້າຮ່ວມງານຂອງ ທ່ານ  ເພັດ ພົມພິພັກ, ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ປອ. ທອງຈັນ ມະນີໄຊ, ລັດຖະມົນຕີກະຊວງພາຍໃນ, ທ່ານ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ-ການຄ້າ, ມີທູດເສດຖະກິດ ສປ ຈີນ ປະຈໍາປະເທດລາວ, ປະທານສະມາຄົມເສດຖະກິດ ແລະ ວັດທະນະທໍາ ລາວ-ຈີນ, ປະທານບໍລິສັດ ເນັກສະຕ໋ອບວິນເລກ (ຫົວເປີຍ) ວາງແຜນ ແລະ ອອກແບບ ຈໍາກັດ (ສປ ຈີນ), ບໍລິສັດ ລາວອຸດສະຫະກໍາ – ກະສິກໍາ ຈໍາກັດ ພ້ອມດ້ວຍແຂກຖຶກເຊີນເຂົ້າຮ່ວມ.

    ບໍລິສັດ ລາວອຸດສະຫະກໍາ-ກະສິກໍາ ຈໍາກັດ, ຜູ້ຜະລິດ ແລະ ປຸງແຕ່ງຜະລິດຕະພັນ ສໍາເລັດຮູບເພື່ອສະໜອງຕະຫຼາດພາຍໃນ ແລະ ສົ່ງອອກຕ່າງປະເທດອັນດັບຕົ້ນໆຂອງລາວ ໄດ້ລົງນາມເຊັນສັນຍາຮ່ວມມືທຸລະກິດກັບ ບໍລິສັດ ເນັກສະຕ໋ອບ ວິນເລກ (ຫົວເປີຍ) ວາງແຜນ ແລະ ອອກແບບ ຈໍາກັດ ສປ ຈີນ ເພື່ອສົ່ງເສີມການປູກຝັງ ແລະ ເກັບຊື້ຜົນຜະລິດຈາກປະຊາຊົນມາແປຮູບເປັນສິນຄ້າສໍາເລັດຮູບ ແລ້ວສົ່ງອອກໄປຈໍາໜ່າຍຢູ່ ສປ ຈີນ ໃນເບື້ອງຕົ້ນກໍານົດມີ 3 ຜະລິດຕະພັນຄື: ນໍ້າໝາກນັດ, ໝາກຕາວ ແລະ ກະທຽມໂທນ, ທັງເປັນການຕອບສະໜອງທິດທາງນະໂຍບາຍ ຂອງພັກ-ລັດຖະບານ ທີ່ຊຸກຍູ້ສົ່ງເສີມໃຫ້ສິນຄ້າລາວໃຫ້ກ້າວສູ່ຕະຫຼາດສາກົນ ກໍ່ຄືຕະຫຼາດ ສປ ຈີນ.


    ຜູ້ບໍລິຫານຂອງບໍລິສັດ ລາວອຸດສະຫະກໍາ – ກະສິກຳ ຈໍາກັດ ກ່າວວ່າ: ໂດຍອີງໃສ່ທ່າແຮງການຂົນສົ່ງສິນຄ້າຈາກລາວໄປ ສປ ຈີນ ທີ່ສະດວກຂື້ນກວ່າເກົ່າໂດຍຜ່ານເສັ້ນທາງລົດໄຟ ລາວ-ຈີນ ຕາມແນວທາງນະໂຍບາຍຂອງພັກ ແລະ ລັດຖະບານ ທີ່ຕ້ອງການຊຸກຍູ້ສິນຄ້າຂອງລາວອອກສູ່ ສາກົນ ກໍ່ຄື ສປ ຈີນ. ດັ່ງນັ້ນ, ເປັນໂອກາດອັນດີທີ່ບໍລິສັດລາວອຸດສະຫະກໍາ-ກະສິກໍາ ຈໍາກັດ ແລະ ບໍລິສັດ ເນັກສະຕ໋ອບວິນເລກ (ຫົວເປີຍ) ວາງແຜນ ແລະ ອອກແບບ ຈໍາກັດ (ສປ ຈີນ) ໄດ້ຮ່ວມມືກັນ ເພື່ອສົ່ງເສີມການປູກຝັງ, ເກັບຊື້ຜົນຜະລິດຈາກປະຊາຊົນມາແປຮູບເປັນສິນຄ້າສໍາເລັດຮູບ ເພື່ອຈໍາໜ່າຍຢູ່ ສປ ຈີນ ໃນເບື້ອງຕົ້ນປີ 2022 ໂດຍອີງໃສ່ວັດຖຸດິບທີ່ມີໃນ ສປປ ລາວ ເບື້ອງຕົ້ນ ກໍານົດມີ 03 ຜະລິດຕະພັນຄື:


    1). ນໍ້າໝາກນັດ ຈໍານວນ 3.000,000 ກະປ່ອງ ວັດຖຸດິບຕ້ອງການນໍາໃຊ້ຜະລິດ 800 ໂຕນ (ມູນຄ່າວັດຖຸດິບ 2 ຕື້ກີບ) ເປັນມູນຄ່າທີ່ປະຊາຊົນໄດ້ຮັບໂດຍກົງ; 2). ໝາກຕາວ 300.000 ຕຸກ ວັດຖຸດິບທີ່ຕ້ອງການນໍາໃຊ້ຜະລິດ 400 ໂຕນ (ມູນຄ່າວັດຖຸດິບ 2,4 ຕື້ກີບ); 3). ກະທຽມໂທນ 30.000 ຕຸກ.

    ໂດຍຈະເລີ່ມລົງມືຜະລິດປີ 2022 ເປັນຕົ້ນໄປ. ໃນອະນາຄົດຈະໄດ້ລົງສົ່ງເສີມການປຸກຂອງປະຊາຊົນໃຫ້ຫລາຍຂື້ນ ດ້ວຍການວາງແຜນກໍານົດເຂດການສົ່ງເສີມຊັດເຈນ ສົມທົບກັບກະຊວງທີ່ກ່ຽວຂ້ອງວາງແຜນສົ່ງເສີມໃຫ້ປະຊາຊົນໃຫ້ໄດ້ຮັບຫມາກຜົນທີ່ດີຂື້ນ ເພື່ອໃຫ້ໄດ້ວັດຖຸດິບທີ່ມີຄຸນນະພາບແລະປະລິມານຍິ່ງໆຂື້ນຕາມປະລິມານຄວາມຕ້ອງການຂອງຕະຫຼາດໃນອະນາຄົດຕໍ່ໄປ.


    ບໍລິສັດລາວອຸດສາຫະກໍາ-ກະສິກໍາ ຈໍາກັດ, ສ້າງຕັ້ງແຕ່ປີ 1995 ຕັ້ງຢູ່ບ້ານເກິນ, ເມືອງທຸລະຄົມ ແຂວງ ວຽງຈັນ ມາເຖິງປັດຈຸບັນໄດ້ຄົບ 27 ປີ ເຕັມ, ເປັນຕະຫຼາດຮອງຮັບເກັບຊື້ຜົນຜະລິດຂອງປະຊາຊົນລາວ 100 ເປີເຊັນ ແຫລ່ງຮັບຊື້ວັດຖຸດິບມີ 05 ແຂວງຄື: ແຂວງວຽງຈັນ, ແຂວງບໍລິຄໍາໄຊ, ແຂວງໄຊສົມບຸນ, ແຂວງຊຽງຂວາງ ແລະ ນະຄອນຫຼວງວຽງຈັນ, ເພື່ອນໍາມາຜະລິດປຸງແຕ່ງເປັນສິນຄ້າກະສິກໍາ ສໍາເລັດຮູບຈໍາຫນ່າຍພາຍໃນປະເທດ ແລະ ສົ່ງອອກຕ່າງປະເທດ.ໂດຍປັດຈຸບັນຜະລິດຕະພັນຂອງບໍລິສັດປະກອບມີ 07 ຊະນິດຄື: (ນົມສາລີຫວານບ້ານເກິນ, ໜາກນັດບ້ານເກິນ, ນ້ໍາໝາກພ້າວບ້ານເກິນ, ກະທຽມດອງ, ກະທຽມໂທນ, ໝາກຕາວເຊື່ອມ ແລະ ສາລີຫວານກະປ໋ອງ).


    ສິນຄ້າຜະລິດເພື່ອສົ່ງອອກ ປະກອບມີ: 1. ສາລີຫວານອັດກະປ໋ອງ: ຜະລິດ ແລະ ສົ່ງອອກປະເທດອັງກິດ ປະລິມານ 5.000 ໂຕນຕໍ່ປີ; 2. ໝາກຕາວເຊື່ອມປິດ: ຜະລິດ ແລະ ສົ່ງອອກໄປປະເທດໄທ, ຫວຽດນາມ ແລະ ມາເລເຊຍ ເຊິ່ງມີ ປະລິມານການຜະລິດ 1,200 ໂຕນຕໍ່ປີ; 3. ນົມສາລີຫວານ: ສົ່ງໄປຈໍາຫນ່າຍທີ່ປະເທດໄທບາງສ່ວນ.


    ສຳລັບສິນຄ້າທີ່ຜະລິດຈໍາໜ່າຍພາຍໃນ: 1. ສາລີຫວານກະປ໋ອງ; 2. ໜາກຕາວເຊືອມບັນຈຸປິດ, ບັນຈຸຕຸກ; 3. ຫົວກະທຽມດອງ ບັນຈຸຕຸກ; 4. ກະທຽມໂທນດອງ ບັນຈຸຕຸກ; 5. ນົມສາລີຫວານ ບ້ານເກິນ; 6. ນ້ໍາໜາກນັດບ້ານເກິນ; 7. ນໍ້າໜາກພ້າວ ບ້ານເກິນ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.