ຂອບໃຈເດີ້ ຫວຽດນາມ ສົ່ງເສີມທັບນັກກິລາລາວ ມອບເງິນ 100 ລ້ານດົງ ລ່າເປົ້າໝາຍ 5 ຫຼຽນຄຳ ໃນຮ່າໂນ້ຍເກມ 2021

    0
    64

    ສະມາຄົມສູນກາງມິດຕະພາບ ລາວ-ຫວຽດນາມ ໃຫ້ການສະໜັບສະໜູນທັບນັກກິລາລາວ ຈຳນວນເງິນສົດ 100 ລ້ານດົງ ຫຼື ປະມານ 60 ລ້ານກວ່າກີບ ເພື່ອເປັນກຳລັງໃຈໃຫ້ທັບນັກກິລາລາວ 28 ປະເພດ ລ່າຫຼຽນເປົ້າໝາຍ 5 ຫຼຽນຄຳ ໃນຮ່າໂນ້ຍ ເກມ 2021 ທີ່ ສສ ຫວຽດນາມ.

    ໃນຕອນບ່າຍວັນທີ 10 ພຶດສະພາ ຜ່ານມາ ພາຍຫຼັງທີ່ທ່ານ ຮສ.ປອ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະໄດ້ເດີນທາງມາເຖີງ ນະຄອນຫຼວງ ຮ່າໂນ້ຍ ສສ ຫວຽດນາມ ເພື່ອຮ່ວມພິທີເປີດງານກິລາ ຊີເກມ ຄັ້ງທີ່ 31 ຊຶ່ງຈະເປີດຂຶ້ນເປັນທາງການ ໃນວັນທີ 12 ພຶດສະພານີ້ ກໍໄດ້ເຂົ້າພົບປະສະມາຄົມສູນກາງມິດຕະພາບ ຫວຽດນາມ-ລາວ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ເຈີນ ວັນຕຸ້ຍ ປະທານສະມາຄົມສູນກາງມິດຕະພາບ ຫວຽດນາມ-ລາວ ພ້ອມດ້ວຍຄະນະ.

    ໂອກາດນີ້, ທ່ານ ເຈີນ ວັນຕຸ້ຍ ກ່າວວ່າ: ຕະຫຼອດໄລຍະຜ່ານມາ ສະມາຄົມສູນກາງມິດຕະພາບຫວຽດນາມ-ລາວ ຍາມໃດກໍໄດ້ເອົາໃຈໃສ່ເພີ່ມທະວີຄວາມສາມັກຄີສາຍພົວພັນຮັກແພງລະຫວ່າງຫວຽດນາມ-ລາວ ແລະ ລາວ-ຫວຽດນາມ ໂດຍສະເພາະແມ່ນການສົ່ງເສີມໃຫ້ນັກຮຽນນັກສຶກລາວທີ່ຮຽນຢູ່ ສສ ຫວຽດນາມ, ໃນນັ້ນ ກໍໄດ້ເນັ້ນໜັກໃຫ້ສະຖານທູດສືບຕໍ່ຈັດກິດຈະກຳຢ່າງເປັນປົກກະຕິ

    ເວົ້າສະເພາະການສອບເສັງນັກຮຽນເກັ່ງ ຫວັງວ່າທ່ານຈະເດີນທາງກັບມາຮ່ວມງານສຳຄັນນີ້ອີກຄັ້ງ. ແນວໃດກໍ່ດີ, ສຳລັບການມາຮ່ວມງານກິລາຊີເກມ ຄັ້ງນີ້ ຂອງທັບນັກກິລາລາວ ທາງສະມາຄົມພວກເຮົາກໍໄດ້ມີການປຸກລະດົມຮູບແບບທີ່ເໝາະສົມໃຫ້ບັນດາສະມາຄົມຢູ່ເຂດທ້ອງຖິ່ນໄປເຊຍນັກກິລາລາວ ເປັນພິເສດເໝືອນກັບເຊຍທີມຊາດຂອງຕົນເອງ ເພື່ອສົ່ງເສີມໃຫ້ສາມາດສ້າງຜົນງານໃຫ້ໄດ້ດີທີ່ສຸດ ແລະ ກໍ່ເຊື່ອວ່າການມາຄັ້ງນີ້ຂອງທ່ານລັດຖະມົນຕີ ສສກ ຈະເປັນກຳລັງໃຈດີໆ ໃຫ້ທັບນັກກິລາລາວ ຍາດເອົາໄຊຊະນະຕາມຈຸດປະສົງ ແລະ ເປົ້າໝາຍທີ່ວາງໄວ້.

    ໃນໂອກາດດຽວກັນ, ທ່ານ ຮສ.ປອ ພຸດ ສິມມາລາວົງ ກໍໄດ້ກ່າວສະແດງຄວາມຂອບໃຈມາຍັງສະມາຄົມສູນກາງມິດຕະພາບ ຫວຽດນາມ-ລາວ ທີ່ໃຫ້ການຕ້ອນຮັບຢ່າງອົບອຸ່ນ ການພົບປະຄັ້ງນີ້ເປັນຂີດໝາຍອັນສຳຄັນອັນໜຶ່ງໃນໂອກາດທີ່ຂ້າພະເຈົ້າໄດ້ມາເຄື່ອນໄຫວຮ່ວມການກິລາຊີເກມ ໃນນາມກະຊວງ ສສກ ກໍຂໍສະແດງຄວາມຊົມເຊີຍຢ່າງສຸດໃຈມາຍັງບັນດາສະຫາຍທີ່ໄດ້ເປັນຫວງເປັນໃຍເພີ່ມທະວີ

    ຄວາມຮັກແພງສາມັກຄີສາຍພົວພັນຂອງສອງຊາດຢ່າງແໜ້ນແຟ້ນ ເຖີງວ່າປັດຈຸບັນຈະມີສະພາບຂອງພະຍາດໂອຄິດ-19 ແຕ່ກໍ່ຂໍໃຫ້ ສສ ຫວຽດນາມເຮົາຈົ່ງມີຄວາມປອດໄພ ແລະ ສາມາດເປີດການກິລາຊີເກມ ໄປດ້ວຍດີ ພິເສດປີນີ້ທັງສອງພັກ-ລັດສອງຊາດເຮົາໄດ້ກຳນົດເປັນປີເສີມຂະຫຍາຍສາຍພົວພັນແຫ່ງຄວາມສາມັກຄີຮັກແພງ ຄົບຮອບ 60 ປີ ແຫ່ງສາຍພົວພັນທາງການທູດ ແລະ

    ຄົບຮອບ 45 ປີ ສະນັ້ນ ຢູ່ ສປປ ລາວ ກໍໄດ້ຈັດກິດຈະກຳຕ່າງໆຢ່າງຟົດຟື້ນ ເພື່ອເສີມຂະຫຍາຍມູນເຊື້ອອັນດີງາມຂອງສອງຊາດເຮົາທີ່ມີໃຫ້ກັນມາຢ່າງຍາວນານ ແລະ ທາງກະຊວງ ສສກ ກໍຈະໄດ້ຈົດບັນທຶກເພື່ອຈະຂຽນເປັນປື້ມກ່ຽວກັບຄວາມສາມັກຄີແບບພິເສດຂອງສອງຊາດລາວ-ຫວຽດນາມ ແລະ ຫວຽດນາມລາວ ອີກເທື່ອໜຶ່ງຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງທີ່ ສສ ຫວຽດນາມ ໄດ້ໃຫ້ການຊ່ວຍເຫຼືອສະໜັງສະໜຸນທັບນັກກິລາລາວໄດ້ມາຝຶກແອບຝຶກຊ້ອມ ແລະ ເຂົ້າຮ່ວມງານກິລາຊີເກມ ໃນຄັ້ງນີ້ໄປດ້ວຍດີ.

    ຫຼັງຈາກນັ້ນ ທາງສະມາຄົມດັ່ງກ່າວ ກໍຍັງໄດ້ມອບເງິນສົດ ຈຳນວນ 100 ລ້ານດົງ ເພື່ອຊຸກຍູ້ສົ່ງເສີມທັບນັກກິລາລາວ ຮ່ວມສ້າງຜົນງານ ຮ່າໂນ້ຍ ເກມ 2021 ອີກດ້ວຍ. ແນວໃດກໍດີ, ໃນໂອກາດທີ່ມາ ສສ ຫວຽດນາມ ເພື່ອຮ່ວມງານກິລາຊີເກມ ທ່ານລັດຖະມົນຕີ ພ້ອມດ້ວຍຄະນະກໍ່ຍັງຈະເຄື່ອນໄຫວເຮັດວຽກນຳບັນດາພາກສ່ວນທີ່ນອນໃນຂະແໜງການສຶກສາ ແລະ ກິລາ ໂດຍສະເພາະເຂົ້າພົບປະກັບກະຊວງສຶກສາ ແລະ ກິລາ ຫວຽດນາມ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.