Generation ຫຼື ທີ່ເອີ້ນສັ້ນໆວ່າ Gen ຄື ການແບ່ງກຸ່ມປະຊາກອນຕາມຫຼັກປະຊາກອນສາດ (Demography) ໂດຍມີການແບ່ງ Gen ຕາມຊ່ວງປີເກີດ ໂດຍຈະແບ່ງເປັນ 5 Gen ຄື Gen B, Gen X, Gen Y, Gen Z ແລະ Gen Alpha ຊຶ່ງແຕ່ລະກຸ່ມມີຂໍ້ດີ ແລະ ລັກສະນະພິເສດທີ່ແຕກຕ່າງກັນ. ສະນັ້ນ, ພວກເຮົາມາເບິ່ງຂໍ້ມູນຂອງຄົນແຕ່ລະ Gen ກັນວ່າມີຈຸດເດັ່ນແນວໃດແດ່ ແຕ່ລະ Gen ຢູ່ໃນກຸ່ມອາຍຸເທົ່າໃດ ແລ້ວທ່ານລະເປັນ Gen ໃດ.

Gen B (Baby Boom Generation)

Gen B ຄື ກຸ່ມຄົນທີ່ເກີດລະຫວ່າງປີ ພ.ສ.2489-2507 (1946-1964)

ບັນດາຄົນພວກນີ້ເກີດມາພາຍຫຼັງສົງຄາມໂລກຄັ້ງທີສອງສະຫງົບລົງ, ທີ່ເອີ້ນຄົນພວກນີ້ວ່າ: ເຈນບີ ເພາະວ່າໃນລະຫວ່າງສົງຄາມບັນດາຜູ້ຊາຍຕ້ອງຖືກເກນໄປເປັນທະຫານ, ເມື່ອສົງຄາມສະຫງົບລົງກໍເລີຍກັບມາແຕ່ງງານແລ້ວຮີບພາກັນມີລູກ ແບບວ່າອົດກັ້ນໄວ້ດົນ ຄົນທີ່ເປັນເຈນບີນີ້ມີຈຳນວນຫຼາຍເອີ້ນວ່າ: ບູມ! ຄືເດັກນ້ອຍເກີດກັນສະນັ່ນຫວັ່ນໄຫວແບບລະເບີດເລີຍລະ ພໍ່ແມ່ຂອງຄົນກຸ່ມນີ້ປະສົບຄວາມລຳບາກມາຕະຫຼອດຊີວິດ ຈາກວິກິດເສດຖະກິດຕົກຕໍ່າຄັ້ງໃຫຍ່ທົ່ວໂລກເມື່ອ ພ.ສ.2472 ທີ່ສົ່ງຜົນໃຫ້ເກີດສົງຄາມໂລກຄັ້ງທີສອງໃນທີ່ສຸດ.

 

   ຄົນເຈນບີ ເຕີບໃຫຍ່ຂຶ້ນມາດ້ວຍການຮັບຮູ້ຄວາມຍາກລຳບາກຂອງພໍ່ແມ່, ຈຶ່ງເປັນຄົນທີ່ມີຊີວິດເພື່ອການເຮັດວຽກ, ເຄົາລົບກົດເກນ, ກະຕິກາ, ອົດທົນໃຫ້ຄວາມສຳຄັນກັບຜົນງານ ແມ່ນວ່າຈະຕ້ອງໃຊ້ເວລາດົນກວ່າຈະປະສົບຄວາມສຳເລັດ. ອີກທັງຍັງມີແນວຄິດທີ່ຈະເຮັດວຽກໜັກ ເພື່ອສ້າງເນື້ອສ້າງຕົວ, ມີຄວາມທຸ້ມເທກັບການເຮັດວຽກ ແລະ ອົງກອນຫຼາຍ ໃຫ້ຄວາມສຳຄັນຂອງຄອບຄົວຮອງລົງມາຈາກວຽກ.

 

ຂໍ້ດີ Gen B ເປັນຍຸກສິ້ນສຸດສົງຄາມ ຄົນເຈນນີ້ຈະມີຊີວິດເພື່ອການເຮັດວຽກ ສຸຂຸມ, ຮອບຄອບ, ປະຢັດອົດອອມ, ສູ້ວຽກສູ້ງານ, ເຄົາລົບກົດເກນ, ອົດທົນສູງ, ມີປະສົບການສູງ, ມີຄວາມສາມາດທາງດ້ານການເຂົ້າສັງຄົມ, ຈົງຮັກພັກດີຕໍ່ນາຍຈ້າງ,  ໃຫ້ຄວາມສຳຄັນກັບຜົນງານ ຍິນດີເຮັດວຽກໜັກເພື່ອສ້າງເນື້ອສ້າງຕົວ ບໍ່ຄ່ອຍປ່ຽນວຽກ ເຄັ່ງຄັດໃນຈາລີດປະເພນີ.

 

Gen X

Gen X ຄື ກຸ່ມຄົນທີ່ເກີດລະຫວ່າງປີ ພ.ສ. 2508-2522 (1965-1979)

   ຄົນກຸ່ມນີ້ກໍຄືລູກຫຼານຂອງພວກເຈນບີນັ້ນເອງ. ຊຶ່ງຊ່ວງ ພ.ສ.2508-2522 ນີ້ເປັນຊ່ວງຂອງສັນຕິພາບ, ຄວາມມັ່ງຄັ່ງຂະຫຍາຍໄປທົ່ວໂລກ ແລະ ແນວຄວາມຄິດຄຸມກຳເນີດພ້ອມທັງຢາຄຸມກຳເນີດເກີດມີຂຶ້ນຫຼາກຫຼາຍ, ຈຳນວນການເກີດຂອງເດັກຊ່ວງນີ້ຈຶ່ງຫຼຸດລົງຫຼາຍ ບາງທີກໍເອີ້ນພວກນີ້ວ່າ: Baby Bust Generation (Bust ນີ້ກົງກັນຂ້າມກັບບູມ).

   ບັນດາເດັກທີ່ເກີດໃນຊ່ວງນີ້ ເຕີບໃຫຍ່ຂຶ້ນມາໄດ້ເຫັນການດຳເນີນຊີວິດຂອງພໍ່ແມ່,  ຊຶ່ງເດັກພວກນີ້ບໍ່ເຫັນດີ ເຮັດໃຫ້ຄົນທີ່ເຕີບໃຫຍ່ມາໃນຊ່ວງນີ້ມີລັກສະນະພຶດຕິກຳມັກອັນໃດງ່າຍໆ, ບໍ່ຕ້ອງເປັນທາງການ ໃຫ້ຄວາມສຳຄັນກັບເລື່ອງຄວາມສົມດຸນລະຫວ່າງວຽກກັບຄອບຄົວ (Work-life Balance)

 

ຂໍ້ດີ Gen X ເປັນລຸ້ນທີ່ມີຄວາມເຂັ້ມແຂງ ແລະ ປັບຕົວໄດ້ງ່າຍ ພວກເຂົາມີຄວາມຄິດເປັນລະບົບ ແລະ ມີຄວາມຮັບຜິດຊອບສູງໃນການເຮັດວຽກ ພວກເຂົາມີປະສົບການ ແລະ ຄວາມຮູ້ໃນອົງກອນຫຼາຍກວ່າລຸ້ນອື່ນ: ຈຶ່ງເໝາະທີ່ຈະເປັນຜູ້ນຳ ແລະ ສາມາດໃຫ້ຄຳປຶກສາແກ່ລຸ້ນອື່ນໄດ້.

 

Gen Y

Gen Y ຫຼື Millennials ຄື ກຸ່ມຄົນທີ່ເກີດລະຫວ່າງປີ ພ.ສ.2523-2540 (1980-1997)

ເປັນກຸ່ມຄົນທີ່ໃຫຍ່ມາພ້ອມກັບຄອມພິວເຕີ-ອິນເທີເນັດ ແລະ ເທັກໂນໂລຢີໄອທີ. ກຸ່ມນີ້ເປັນລູກຂອງພວກເຈນເອັກຊ໌, ທີ່ໄດ້ຊື່ວ່າເຈນວາຍ ກໍເນື່ອງຈາກເຫັນພໍ່ແມ່ກັບ ປູ່, ຍ່າ, ຕາ, ຍາຍຜິດຖຽງກັນໃນຄ່ານິຍົມທີ່ແຕກຕ່າງກັນ ແລະ ເມື່ອຜິດຖຽງກັນຫຼາຍເຂົ້າ ເລື່ອງກໍມາລົງທີ່ເດັກທີ່ບໍ່ຮູ້ເລື່ອງຫຍັງ.

 

ເຈເນວາຍເປັນໄວທີ່ຈັດວ່າພວມເລີ່ມເຂົ້າສູ່ໄວເຮັດວຽກ ມີລັກສະນະນິໄສມັກສະແດງອອກF, ມີຄວາມເປັນຕົວຂອງຕົວເອງສູງ, ບໍ່ມັກຢູ່ໃນກອບ ແລະ ບໍ່ມັກເງື່ອນໄຂ. ຄົນກຸ່ມນີ້ຕ້ອງການຄວາມຊັດເຈນໃນການເຮັດວຽກວ່າ ສິ່ງທີ່ເຮັດມີຜົນຕໍ່ຕົນເອງ ແລະ ຕໍ່ໜ່ວຍງານແນວໃດ, ອີກທັງຍັງມີຄວາມສາມາດໃນການເຮັດວຽກທີ່ກ່ຽວກັບການຕິດຕໍ່ສື່ສານ ແລະ ຍັງສາມາດເຮັດວຽກຫຼາຍໆ ຢ່າງໄດ້ໃນເວລາດຽວກັນ.

 

ຂໍ້ດີ Gen Y ເປັນລຸ້ນທີ່ເກັ່ງໃນເທັກໂນໂລຢີ ແລະ ການໃຊ້ສື່ສັງຄົມອອນລາຍ, ພວກເຂົາມີຄວາມຄິດສ້າງສັນ ແລະ ເປັນທີມງານທີ່ສາມາດເຮັດວຽກຮ່ວມກັບຜູ້ອື່ນໄດ້ດີ,  ມັກມີຄວາມສາມາດໃນການເຮັດວຽກແບບແຟລັກຊິເບິ້ລ ແລະ ຕ້ອງການການຕອບຮັບ ແລະ ການພັດທະນາຢູ່ເລື້ອຍໆ.

Gen Z

Gen Z ໝາຍເຖິງ ຄົນທີ່ເກີດຫຼັງ ພ.ສ. 2541-2565 (1998-2024)

   ກຸ່ມ Gen Z ນີ້ ຈະເຕີບໃຫຍ່ມາພ້ອມກັບສິ່ງອຳນວຍຄວາມສະດວກຫຼາຍຢ່າງທີ່ຢູ່ອ້ອມຮອບ ມີຄວາມສາມາດໃນການໃຊ້ງານເທັກໂນໂລຢີຕ່າງໆ ແລະ ຮຽນຮູ້ໄດ້ໄວ ເພາະພໍ່ແມ່ໃຊ້ສິ່ງເຫຼົ່ານີ້ຢູ່ໃນຊີວິດປະຈຳວັນ.

   ສິ່ງໜຶ່ງທີ່ເດັກລຸ້ນ Gen Z ແຕກຕ່າງຈາກລຸ້ນອື່ນໆ ສະໄໝທີ່ຍັງເປັນເດັກຢູ່ກໍຄື ເດັກລຸ້ນນີ້ຈະໄດ້ເຫັນພາບທີ່ພໍ່ ແລະ ແມ່ຕ້ອງອອກໄປເຮັດວຽກທັງຄູ່ ຕ່າງຈາກລຸ້ນກ່ອນໆ ທີ່ອາດຈະມີພໍ່ອອກໄປເຮັດວຽກຄົນດຽວ, ດ້ວຍເຫດຜົນນີ້ ເດັກ Gen Z ຫຼາຍໆ ຄົນຈຶ່ງໄດ້ຮັບການລ້ຽງດູຈາກຄົນອື່ນຫຼາຍກວ່າພໍ່ແມ່ຂອງຕົວເອງ

 

ຂໍ້ດີ Gen Z ເປັນລຸ້ນທີ່ເຕີບໃຫຍ່ມາພ້ອມກັບເທັກໂນໂລຢີ ແລະ ມີຄວາມຄຸ້ນເຄີຍກັບການໃຊ້ງານອຸປະກອນດິຈິຕອນຕ່າງໆ ພວກເຂົາມີຄວາມຄິດສ້າງສັນ ແລະ ມີຄວາມຮັບຜິດຊອບໃນການຮຽນຮູ້ ແລະ ພັດທະນາຕົນເອງ, ພວກເຂົາມີມຸມມອງທີ່ຫຼາກຫຼາຍແລະ ຮຽນຮູ້ໄດ້ຢ່າງວ່ອງໄວ.

Gen Alpha

Gen A ຫຼື Gen Alpha ໝາຍເຖິງ ກຸ່ມຄົນນີ້ຈະເກີດໃນຊ່ວງປີ ພ.ສ. 2566 ເປັນຕົ້ນໄປ ຫຼືເວົ້າງ່າຍໆ ຄືຄົນ ເຈນອັລຟ່ານັ້ນຈະເກີດໃນຊ່ວງ ສະຕະວັດທີ 21 ນັ້ນເອງ ຈຶ່ງເອີ້ນວ່າເປັນກຸ່ມຄົນລຸ້ນໃໝ່.

ເຈນອັລຟ່າເອີ້ນວ່າ: ເກີດໃນສະພາບແວດລ້ອມໃໝ່ ການຕິດຕໍ່ສື່ສານທີ່ປ່ຽນແປງຢ່າງກ້າວກະໂດດ ຈາກຜົນການສຳຫຼວດປະຊາກອນໂລກ ໃນປີ 2558 ນັ້ນ ມີຈຳນວນຄົນກວ່າ 2.5 ລ້ານຄົນເກີດໃນທຸກອາທິດທົ່ວໂລກ. ດັ່ງນັ້ນ, ເຈນອັລຟ່າ ຈຶ່ງມີແນວໂນ້ມວ່າ ຈະມີປະຊາກອນກວ່າ 2 ພັນລ້ານ ຄົນພາຍໃນປີ 2568.

 

    ການແບ່ງກຸ່ມຄົນຕາມ generation ນັ້ນ ມັກໃຊ້ເພື່ອອະທິບາຍລັກສະນະນິໄສ ແລະ ພຶດຕິກຳຂອງຄົນໃນແຕ່ລະກຸ່ມ ໂດຍກຸ່ມ Baby Boomer ມັກຖືກມອງວ່າເປັນຄົນທີ່ເຮັດວຽກໜັກ, ຍຶດໝັ້ນໃນກົດເກນ, ໃຫ້ຄວາມສຳຄັນກັບຄອບຄົວ. ກຸ່ມ Generation X ມັກຖືກມອງວ່າເປັນຄົນທີ່ມີຄວາມຍືດຫຍຸ່ນ, ປັບຕົວໄດ້ດີ, ໃຫ້ຄວາມສຳຄັນກັບອິດສະຫຼະເສລີ. ກຸ່ມ Generation Y ມັກຖືກມອງວ່າເປັນຄົນທີ່ມີຄວາມເປັນໃຫ້ຄວາມສຳຄັນກັບເປົ້າໝາຍຂອງໂຕເອງສູງ ແລະ ມັກຄວາມສັນໂດດ, ໃຫ້ຄວາມສຳຄັນກັບປະສົບການ. ກຸ່ມ Generation Z ມັກຖືກມອງວ່າເປັນຄົນທີ່ມີຄວາມຄ່ອງແຄ້ວດ້ານເທັກໂນໂລຢີ ໃຫ້ຄວາມສຳຄັນກັບການສື່ສານ ແລະ ການມີສ່ວນຮ່ວມ.

 

    ເຖິງຢ່າງໃດກໍຕາມ ການແບ່ງກຸ່ມຄົນຕາມ generation ນັ້ນ ເປັນພຽງການແບ່ງກຸ່ມຄ່າວໆ ເທົ່ານັ້ນ. ແຕ່ລະຄົນອາດມີຄວາມແຕກຕ່າງກັນໃນແຕ່ລະ generation ຂຶ້ນຢູ່ກັບປັດໄຈອື່ນໆ ເຊັ່ນ: ສະພາບແວດລ້ອມ, ການລ້ຽງດູ,ການສຶກສາ ເປັນຕົ້ນ.

 

 

 

ສະແດງຄຳຄິດເຫັນ