ປະທານາທິບໍດີໂດນັລ ທຣັມປ໌ ເລີ່ມສົງຄາມການຄ້າກັບສາມພັນທະມິດການຄ້າລາຍໃຫຍ່ຂອງສະຫະລັດ ເມື່ອວັນອັງຄານທີ່ຜ່ານມາ (4 ມີນາ 2025) ສົ່ງຜົນໃຫ້ເມັກຊິໂກ, ແຄນາດາ ແລະ ຈີນ ອອກມາຕອບໂຕ້ທັນທີ. ການເຮັດສົງຄາມການຄ້າຂອງທຣັມປ໌ໃນຄັ້ງນີ້ສົ່ງຜົນໃຫ້ຕະຫຼາດການເງິນຕົກຕໍ່າ ເນື່ອງຈາກສະຫະລັດຕ້ອງຜະເຊີນກັບການຄຸກຄາມຈາກເງິນເຟີ້ທີ່ອາດກັບມາ ແລະ ຄວາມບໍ່ແນ່ນອນທາງທຸລະກິດທີ່ອາດທະວີຄວາມຮຸນແຮງຂຶ້ນ.

 

ຫຼັງທ່ຽງຄືນ ທຣັມປ໌ໄດ້ກຳນົດພາສີ 25% ຫຼື ພາສີສຸນລະກາກອນສິນຄ້ານຳເຂົ້າຈາກເມັກຊິໂກ ແລະ ແຄນາດາ ແລະ ຫຼຸດພາສີລົງເຫຼືອ 10% ສຳລັບພະລັງງານຈາກແຄນາດາ. ນອກຈາກນີ້ຍັງເພີ່ມພາສີຈາກສິນຄ້າຈີນເປັນ 20% ຊຶ່ງເປັນການເພີ່ມຂຶ້ນສອງເທົ່າຈາກເດີມ.

 

ປັກກິ່ງຕອບໂຕ້ດ້ວຍການເກັບພາສີສູງສຸດເຖິງ 15% ກັບສິນຄ້າການກະເສດຂອງສະຫະລັດ ແລະ ຂະຫຍາຍຈຳນວນບໍລິສັດຂອງສະຫະລັດທີ່ຖືກຄວບຄຸມການສົ່ງອອກ ແລະ ຂໍ້ຈຳກັດອື່ນໆ ອີກປະມານຊາວລາຍ.

 

ດ້ານ ຈັສຕິນ ທຣູໂດ ນາຍົກລັດຖະມົນຕີແຄນາດາ ອອກມາລະບຸວ່າແຄນາດາຈະເກັບພາສີສິນຄ້າສະຫະລັດ ມູນຄ່າກວ່າ 100,000 ລ້ານໂດລາພາຍໃນ 21 ວັນ.

 

“ມື້ນີ້ສະຫະລັດໄດ້ເປີດສົງຄາມການຄ້າກັບແຄນາດາ ຊຶ່ງເປັນພັນທະມິດທີ່ໃກ້ຊິດທີ່ສຸດຂອງພວກເຂົາ. ໃນຂະນະດຽວກັນ, ພວກເຂົາກຳລັງເວົ້າເຖິງການເຮັດວຽກຮ່ວມກັບຣັດເຊຍ ໂດຍພະຍາຍາມເຮັດໃຫ້ວລາດິເມຍ ປູຕິນ ພໍໃຈ” ທຣູໂດກ່າວ.

 

ຮາວເວີດ ລັຕນິກ ລັດຖະມົນຕີພານິດຂອງສະຫະລັດກ່າວວ່າ ສະຫະລັດນ່າຈະມີການເຈລະຈາກັບແຄນາດາ ແລະ ເມັກຊິໂກ “ເພື່ອຫາຈຸດຕົງກາງ” ໂດຍອາດມີການປະກາດໃນວັນພຸດນີ້. ທັງນີ້, ລັຕນິກຍັງລະບຸວ່າຈະບໍ່ມີການລະງັບພາສີ ແຕ່ທຣັມປ໌ຈະຫາທາງປະນີປະນອມ.

 

ຂະນະທີ່ປະທານາທິບໍດີເມັກຊິໂກ ຄລອເດຍ ໄຊນ໌ບາມ ຊີ້ວ່າເມັກຊິໂກອາດພິຈາລະນາການຕອບໂຕ້ດ້ວຍການເກັບພາສີເຊັ່ນກັນ ແລະ ຈະປະກາດສິນຄ້າທີ່ຈະເກັບພາສີໃນວັນອາທິດນີ້. ເຖິງຢ່າງໃດກໍຕາມ, ການຊະລໍການປະກາດນີ້ອາດບົ່ງຊີ້ວ່າເມັກຊິໂກຍັງຄົງຫວັງທີ່ຈະຫຼຸດຄວາມຕຶງຄຽດໃນສົງຄາມການຄ້າຂອງທຣັມປ໌.

 

ທຣັມປ໌ກຳລັງລະເລີຍນະໂຍບາຍການຄ້າລະຫວ່າງປະເທດທີ່ສະຫະລັດໃຊ້ມານານຫຼັງສົງຄາມໂລກຄັ້ງທີ 2, ໂດຍອ້າງວ່າການຄ້າເສລີເຮັດໃຫ້ສູນເສຍງານໃນໂຮງງານຫຼາຍລ້ານຕຳແໜ່ງ ແລະ ເຊື່ອວ່າພາສີຈະນຳພາຄວາມຈະເລີນຮຸ່ງເຮືອງໃຫ້ແກ່ປະເທດ. ເຂົາປະຕິເສດຄວາມເຫັນຂອງນັກເສດຖະສາດທີ່ມອງວ່າການຄຸ້ມຄອງການຄ້າມີຄ່າໃຊ້ຈ່າຍສູງ ແລະ ບໍ່ມີປະສິດທິພາບ. ໂດຍກ່າວວ່າພາສີສຸນລະກາກອນເປັນ “ອາວຸດທີ່ມີພະລັງ” ທີ່ນັກການເມືອງບໍ່ເຄີຍໃຊ້ມາກ່ອນ.

ສະແດງຄຳຄິດເຫັນ