ກະຊວງການພັດທະນາສັງຄົມ ແລະ ຄວາມໝັ້ນຄົງຂອງມະນຸດ ພ້ອມຄະນະ ຮ່ວມປະຊຸມທະວິພາຄີ ໄທ – ສປປ.ລາວ ມຸ່ງເພີ່ມປະສິດທິພາບ ຄຸ້ມຄອງ-ຊ່ວຍເຫຼືອຜູ້ເສຍຫາຍຈາກການຄ້າມະນຸດ

 

ເມື່ອວັນທີ 12 ມີນາ 2025 ທ່ານນາງ ຈະຕຸພອນ ໂຣດຈະນະພານິດ ຮອງປະລັດກະຊວງການພັດທະນາສັງຄົມ ແລະ ຄວາມໝັ້ນຄົງຂອງມະນຸດ ຫົວໜ້າຄະນະຜູ້ແທນຝ່າຍໄທ ພ້ອມຄະນະເຈົ້າໜ້າທີ່ກະຊວງການພັດທະນາສັງຄົມ ແລະ ຄວາມໝັ້ນຄົງຂອງມະນຸດ;

 

ສຳນັກງານຕຳຫຼວດແຫ່ງຊາດ, ກະຊວງແຮງງານ, ກົມຄຸ້ມຄອງສິດ ແລະ ເສລີພາບ, ກົມການປົກຄອງ, ສຳນັກງານໄອຍະການສູງສຸດ ແລະ ສະຖານເອກອັກຄະລາດຊະທູດ ນະຄອນຫຼວງວຽງຈັນ. ເຂົ້າຮ່ວມການປະຊຸມຫາລືການບໍລິຫານຈັດການກ່ຽວກັບການຄຸ້ມຄອງ ແລະ ຊ່ວຍເຫຼືອຜູ້ເສຍຫາຍຈາກການຄ້າມະນຸດ ຄັ້ງທີ 4 (Case Management Meeting : CMM 04) ລະຫວ່າງລາຊະອານາຈັກໄທ ແລະ ສາທາລະນະລັດ ປະຊາທິປະໄຕ ປະຊາຊົນລາວ (ສປປ.ລາວ)

 

ໂດຍມີ ພົນຈັດຕະວາ ກອງສະຫວັດ ບຸນລ້ຽງ ຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ ຫົວໜ້າຄະນະຜູ້ແທນຝ່າຍ ສປປ.ລາວ ເຂົ້າຮ່ວມ ທີ່ໂຮງແຮມລາວພລາຊ່າ ນະຄອນຫຼວງວຽງຈັນ ສາທາລະນະລັດ ປະຊາທິປະໄຕ ປະຊາຊົນລາວ

 

 

ທ່ານນາງຈະຕຸພອນ ກ່າວວ່າ ການປະຊຸມຫາລືຄັ້ງນີ້ ທັງສອງປະເທດໄດ້ນຳສະເໜີເຖິງຄວາມກ້າວໜ້າໃນການດຳເນີນງານຕາມແຜນປະຕິບັດການຕາມບົດບັນທຶກຄວາມເຂົ້າໃຈລະຫວ່າງລັດຖະບານແຫ່ງລາຊະອານາຈັກໄທ ແລະ ລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍຄວາມຮ່ວມມືເພື່ອຕໍ່ຕ້ານການຄ້າມະນຸດ ພ.ສ. 2023 – 2025 (ໄລຍະທີ 2);

 

ແລະ ຫາລືເຖິງສະຖານະການການຄ້າມະນຸດໃນປັດຈຸບັນ ລວມເຖິງສະພາບບັນຫາ ແລະ ຂໍ້ທ້າທາຍຕ່າງໆ. ນອກຈາກນີ້, ມີການຕົກລົງແນວທາງການພັດທະນາແຜນປະຕິບັດການຯ ໄລຍະທີ 3 ຮ່ວມກັນ ໂດຍຝ່າຍໄທຈະຍົກຮ່າງແຜນປະຕິບັດການຯ ຊຶ່ງຈະຊ່ວຍໃຫ້ການເຮັດວຽກໃນການຕໍ່ຕ້ານການຄ້າມະນຸດຂອງທັງສອງປະເທດເກີດປະສິດທິພາບຫຼາຍຂຶ້ນ ໃນດ້ານການຄຸ້ມຄອງຊ່ວຍເຫຼືອຜູ້ເສຍຫາຍ, ການປ້ອງກັນ, ການດຳເນີນຄະດີ, ຕະຫຼອດຈົນການສົ່ງກັບຄືນ ແລະ ການກັບສູ່ສັງຄົມ.

 

ທັງນີ້, ທີ່ປະຊຸມເຫັນດີ Action points ແລະ ຫົວໜ້າຄະນະທັງສອງຝ່າຍໄດ້ລົງນາມໃນບັນທຶກການປະຊຸມຮ່ວມກັນສຳລັບການປະຊຸມ CMM 04

ສະແດງຄຳຄິດເຫັນ