ວລາດິເມຍ ປູຕິນ ປະທານາທິບໍດີຣັດເຊຍ ຕົກລົງຢຸດໂຈມຕີໂຄງສ້າງພື້ນຖານດ້ານພະລັງງານຂອງຢູເຄຣນເປັນເວລາ 30 ວັນ ຫຼັງໂທລະສັບລົມກັບໂດນັລ ທຣໍາ

 

ສຳນັກຂ່າວຕ່າງປະເທດລາຍງານວ່າ, ເມື່ອວັນອັງຄານທີ 18 ມີນາ 2568 ປະທານາທິບໍດີ ໂດນັລ ທຣໍາ ແຫ່ງສະຫະລັດ ໂທລະສັບລົມກັບ ວລາດິເມຍ ປູຕິນ ຜູ້ນຳຣັດເຊຍເປັນເວລາປະມານ 90 ນາທີ ເພື່ອປຶກສາເລື່ອງການຢຸດຍິງໃນຢູເຄຣນ ຊຶ່ງຈະເປັນກ້າວທຳອິດເພື່ອນຳໄປສູ່ການຢຸດສົງຄາມທີ່ດຳເນີນມາເກີນ 3 ປີນີ້.

 

ນາງແຄໂຣໄລນ໌ ເລວິດ ເລຂາທິການຝ່າຍສື່ຂອງທຳນຽບຂາວສະຫະລັດ ເປີດເຜີຍວ່າ ຜູ້ນຳທັງສອງຄົນເວົ້າເຖິງຄວາມຈຳເປັນຂອງການຢຸດຍິງ ແລະ ການສ້າງສັນຕິພາບໃນຢູເຄຣນ ໂດຍເຫັນຕົງກັນວ່າຄວາມຂັດແຍ່ງຕ້ອງຢຸດລົງດ້ວຍສັນຕິພາບຢ່າງຍືນຍົງ, ຂະນະທີ່ສະຫະລັດ ກັບ ຣັດເຊຍ ຕ່າງຄາດຫວັງວ່າພວກເຂົາຈະມີຄວາມສຳພັນທີ່ດີຂຶ້ນ.

 

ດ້ານລັດຖະບານເຄຣມລິນຂອງຣັດເຊຍອອກຖະແຫຼງການລະບຸວ່າ ທ່ານປູຕິນສະໜັບສະໜູນຄວາມຄິດເລື່ອງຂອງທ່ານທຣໍາ ແລະ ຣັດເຊຍຈະຢຸດໂຈມຕີໂຄງສ້າງພື້ນຖານດ້ານພະລັງງານຂອງຢູເຄຣນເປັນເວລາ 30 ວັນ ທີ່ພວກເຂົາໂຈມຕີມາຕະຫຼອດຕັ້ງແຕ່ສົງຄາມເກີດຂຶ້ນເມື່ອເດືອນກຸມພາ 2565.

 

ເຖິງຢ່າງໃດກໍຕາມ, ປະທານາທິບໍດີຣັດເຊຍຍັງບໍ່ເຫັນດີກັບການຢຸດຍິງຢ່າງເຕັມຮູບແບບກວ່ານີ້ ໂດຍເຄຣມລິນລະບຸວ່າ ມີບັນຫາທີ່ມີນັຍສຳຄັນຫຼາຍເລື່ອງຖືກຍົກຂຶ້ນມາເວົ້າເຖິງໃນການສົນທະນາຄັ້ງນີ້.

 

ໃນຂະນະດຽວກັນ, ທຳນຽບຂາວສະຫະລັດລະບຸວ່າ ຜູ້ນຳທັງສອງຄົນຍັງເຫັນພ້ອມໃຫ້ມີການເຈລະຈາທາງເຕັກນິກ ເລື່ອງການບັງຄັບໃຊ້ມາດຕະການຢຸດຍິງທາງທະເລ ໃນທະເລດຳ, ການຢຸດຍິງຢ່າງເຕັມຮູບແບບ ແລະ ສັນຕິພາບຖາວອນ ໂດຍການເຈລະຈາເຫຼົ່ານີ້ຈະເລີ່ມຂຶ້ນທັນທີໃນຕາເວັນອອກກາງ.

ສະແດງຄຳຄິດເຫັນ