ສະຫະລັດຯ ສັ່ງຮຽກຄືນລົດ “ໄຊເບີທຣັກ” ຂອງເທສລາຫຼາຍກວ່າ 46,000 ຄັນ ຫຼັງພົບຄວາມສ່ຽງທີ່ລາງເຫຼັກພາຍນອກອາດຫຼຸດລະຫວ່າງຂັບຂີ່ ຖືເປັນການຮຽກຄືນຄັ້ງທີ 8 ນັບຕັ້ງແຕ່ເລີ່ມສົ່ງມອບລົດໃຫ້ລູກຄ້າເມື່ອທ້າຍປີ 2023

 

ວັນນີ້ (21 ມີນາ 2025) ສຳນັກຂ່າວຕ່າງປະເທດ ລາຍງານວ່າ “ເທສລາ” ບໍລິສັດຜະລິດຍານພາຫະນະໄຟຟ້າຂອງມະຫາເສດຖີອີລອນ ມັສກ໌ ຮຽກຄືນລົດ “ໄຊເບີທຣັກ”

 

ບໍລິສັດລະບຸໃນເອກະສານທີ່ຍື່ນຕໍ່ອົງການບໍລິຫານຄວາມປອດໄພການຈະລາຈອນທາງຫຼວງແຫ່ງຊາດສະຫະລັດຯ ວ່າ:

 

ການຮຽກຄືນດັ່ງກ່າວຈະມີຜົນກັບລົດໄຊເບີທຣັກ ຫຼາຍກວ່າ 46,000 ຄັນທີ່ຜະລິດຕັ້ງແຕ່ເດືອນ ພະຈິກ 2023 ຈົນຮອດເດືອນ ກຸມພາ 2025 ຖືເປັນການຮຽກຄືນຄັ້ງທີ 8 ນັບຕັ້ງເດືອນ ມັງກອນ 2024 ແລະ ເປັນຄັ້ງໃຫຍ່ທີ່ສຸດ ຂະນະທີ່ນັກວິເຄາະປະເມີນວ່າ ອາດເປັນການຮຽກຄືນລົດຍົນຮຸ່ນນີ້ເກືອບທັງໝົດໃນສະຫະລັດຯ

 

 

ບໍລິສັດລະບຸວ່າ ເຫດຜົນໃນການຮຽກຄືນລົດຄັ້ງນີ້ ເນື່ອງຈາກພົບຄວາມສ່ຽງວ່າລາງເຫຼັກສ່ວນເທິງເໜືອກະຈົກຂ້າງທັງ 2 ເບື້ອງ ຊຶ່ງເປັນສະແຕນເລສ ຖືກຕິດຕັ້ງເຂົ້າກັບຕົວລົດດ້ວຍກາວ ເມື່ອປະເຊີນສະພາບແວດລ້ອມຕ່າງໆ ພາຍນອກ ອາດເສື່ອມ ແລະ ຫຼຸດອອກຈາກຕົວລົດ ຈົນສ່ຽງກໍ່ໃຫ້ເກີດອັນຕະລາຍ ແລະ ເພີ່ມໂອກາດໃນການເກີດອຸບັດຕິເຫດບົນທ້ອງຖະໜົນໄດ້

 

ທັງນີ້ ບໍລິສັດຈະດຳເນີນການປ່ຽນລາງເຫຼັກດັ່ງກ່າວ ດ້ວຍລາງທີ່ທົດສອບແລ້ວໄດ້ມາດຕະຖານດ້ານຄວາມທົນທານ ໂດຍບໍ່ມີຄ່າໃຊ້ຈ່າຍ ຊຶ່ງຄາດວ່າຈະເລີ່ມດຳເນີນການໄດ້ຕັ້ງແຕ່ວັນທີ 21 ມີນາ ນີ້ ນອກຈາກນີ້ບໍລິສັດຍັງລະບຸວ່າ ພົບການເຄມປະກັນປະມານ 150 ລາຍການທີ່ອາດກ່ຽວຂ້ອງກັບບັນຫານີ້ ແຕ່ຍັງບໍ່ໄດ້ຮັບລາຍງານການເກີດອຸບັດຕິເຫດ

 

 

ຄວາມເຄື່ອນໄຫວນີ້ເກີດຂຶ້ນຂະນະທີ່ຍອດຂາຍຂອງບໍລິສັດເທສລາຕົກຕ່ຳລົງ ທ່າມກາງກະແສຕໍ່ຕ້ານອີລອນ ມັສກ໌ ນັບຕັ້ງແຕ່ເຂົ້າມາມີບົດບາດດ້ານການຫຼຸດຄ່າໃຊ້ຈ່າຍໃນລັດຖະບານຂອງໂດນັລ ທຣຳ

ສະແດງຄຳຄິດເຫັນ