ທຳນຽບຂາວອອກມາຍອມຮັບເມື່ອວານນີ້ (24 ມີນາ) ວ່າ ເຈົ້າໜ້າທີ່ລະດັບສູງຂອງລັດຖະບານສະຫະລັດ ໄດ້ເປີດເຜີຍແຜນການຮົບໃນແຊັດກຸ່ມທີ່ມີນັກຂ່າວຢູ່ນຳໂດຍບໍ່ໄດ້ຕັ້ງໃຈ ກ່ອນທີ່ໃນເວລາບໍ່ນານສະຫະລັດ ຈະເຂົ້າໂຈມຕີກຸ່ມກະບົດຮູຕີໃນເຢເມນຕາມແຜນ

 

ຄວາມເຄື່ອນໄຫວດັ່ງກ່າວມີຂຶ້ນ ຫລັງເຈັຟຟຣີ ໂກລເບີກ ບັນນາທິການບໍລິຫານຂອງນິຕະຍະສານດິແອັດແລນຕິກ (The Atlantic) ອອກມາເປີດເຜີຍກ່ອນໜ້ານັ້ນບໍ່ດົນວ່າ ເຂົາໄດ້ຮັບເຊີນເຂົ້າແຊັດກຸ່ມທີ່ມີຊື່ວ່າ “Houthi PC small group” ຜ່ານແອັບຊິກແນລ (Signal) ເມື່ອວັນທີ 13 ມີນາ.

 

 

ໃນແຊັດກຸ່ມທີ່ວ່ານີ້, ໄມຄ໌ ວອລຊ໌ ທີ່ປຶກສາຄວາມໝັ້ນຄົງແຫ່ງຊາດຂອງສະຫະລັດ ໄດ້ສັ່ງການໃຫ້ຜູ້ຊ່ວຍຂອງເຂົາຈັດຕັ້ງທີມເພື່ອປະສານງານການດຳເນີນການຂອງສະຫະລັດຕໍ່ກຸ່ມຮູຕີ ໂດຍບັນຊີທີ່ປະກົດຢູ່ໃນແຊັດກຸ່ມດັ່ງກ່າວເບິ່ງຄືວ່າຈະເປັນຂອງເຈ.ດີ. ແວນຊ໌ ຮອງປະທານາທິບໍດີ,

 

ມາໂຄ ຣູບິໂອ ລັດຖະມົນຕີຕ່າງປະເທດສະຫະລັດ, ຈອນ ແຣັດຄລິຟຟ໌ ຜູ້ອຳນວຍການຊີໄອເອ, ທັລຊີ ແກັບບາດ ຜູ້ອຳນວຍການໜ່ວຍຂ່າວກອງແຫ່ງຊາດ, ສກັອດ ເບັສເຊັນ ລັດຖະມົນຕີຄັງ, ຊູຊີ ໄວລສ໌ ຫົວໜ້າເຈົ້າໜ້າທີ່ທຳນຽບຂາວ ແລະ ເຈົ້າໜ້າທີ່ລະດັບສູງຂອງສະພາຄວາມໝັ້ນຄົງແຫ່ງຊາດ.

 

ນອກຈາກນີ້, ໂກລເບີກລະບຸວ່າ ພີທ ເຮກເຊັທ ລັດຖະມົນຕີກະລາໂຫມສະຫະລັດ ໄດ້ໂພສຕ໌ລາຍລະອຽດຂອງປະຕິບັດການກ່ຽວກັບແຜນດັ່ງກ່າວໃນແຊັດກຸ່ມໃນເວລາບໍ່ເທົ່າາໃດຊົ່ວໂມງກ່ອນທີ່ການໂຈມຕີຈະເລີ່ມຂຶ້ນ ຊຶ່ງລວມເຖິງຂໍ້ມູນກ່ຽວກັບເປົ້າໝາຍ, ອາວຸດທີ່ສະຫະລັດຈະນຳໄປໃຊ້, ແລະ ລຳດັບການໂຈມຕີ.

 

ດ້ານໄບຣອັນ ຮິວຈ໌ ໂຄສົກສະພາຄວາມໝັ້ນຄົງແຫ່ງຊາດ ເຜີຍວ່າແຊັດກຸ່ມທີ່ຖືກກ່າວເຖິງນີ້ເບິ່ງຄືວ່າຈະເປັນຂອງຈິງ.

 

ສຳລັບປະຕິບັດການໂຈມຕີທີ່ແຜນຫຼຸດອອກໄປນັ້ນ, ສືບເນື່ອງຈາກເຫດການເມື່ອວັນທີ 15 ມີນາ ຊຶ່ງສະຫະລັດໄດ້ໂຈມຕີທາງອາກາດຂອງຕໍ່ຖານທີ່ໝັ້ນຂອງກຸ່ມຮູຕີໃນເຢເມນ ທັງຍັງປະກາດເດີນໜ້າປະຕິບັດການໂຈມຕີກຸ່ມຮູຕີໃນເຢເມນຢ່າງຕໍ່ເນື່ອງ;

 

ຈົນກວ່າກຸ່ມຮູຕີຈະຢຸດຕິການໂຈມຕີເຮືອສິນຄ້າ ໂດຍປະຕິບັດການທາງອາກາດຄັ້ງນີ້ນັບເປັນການປະຕິບັດການທາງທະຫານຄັ້ງໃຫຍ່ທີ່ສຸດຂອງສະຫະລັດໃນຕາເວັນອອກກາງ ນັບຕັ້ງແຕ່ປະທານາທິບໍດີໂດນັລດ໌ ທຣັມປ໌ ເຂົ້າດຳລົງຕຳແໜ່ງ.

 

ນອກຈາກນີ້, ປທ.ທຣັມປ໌ຍັງສົ່ງສານເຖິງອີຣ່ານ ຜູ້ຢູ່ເບື້ອງຫຼັງກຸ່ມຮູຕີ ໃຫ້ຢຸດຕິການສະໜັບສະໜູນໂດຍທັນທີ ພ້ອມເຕືອນວ່າ ຫາກອີຣ່ານຂູ່ສະຫະລັດ “ອາເມຣິກາຈະຖືວ່າເຈົ້າຮັບຜິດຊອບທັງໝົດ ແລະ ພວກເຮົາຈະບໍ່ໃຈດີກັບເລື່ອງນີ້!”

 

ທັງນີ້, ສະມາຊິກພັກເດໂມແຄຣັດອອກມາວິພາກວິຈານຄວາມຜິດພາດດັ່ງກ່າວຢ່າງວ່ອງໄວ ໂດຍລະບຸວ່າເປັນການລະເມີດຄວາມໝັ້ນຄົງແຫ່ງຊາດຂອງສະຫະລັດ ແລະ ລະເມີດກົດໝາຍ ຊຶ່ງສະພາຄອງເກຣສຈະຕ້ອງດຳເນີນການສອບສວນທັນທີ

ສະແດງຄຳຄິດເຫັນ