ສະຖານທູດລາວ ປະຈຳສະຫະລັດອາເມຣິກາ ແຈ້ງເຖິງພົນລະເມືອງລາວ ໃຫ້ພິຈາລະນາເດີນທາງກັບຄືນປະເທດແບບສະໝັກໃຈໂດຍທັນທີ ເພື່ອຫຼີກລ່ຽງການຖືກຈັບກຸມ, ຄຸມຂັງ ແລະ ຂຶ້ນບັນຊີເນຣະເທດອອກນອກປະເທດ

ອີງຕາມແຈ້ງການຂອງສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສະຫະລັດອາເມຣິກາ ສະບັບວັນທີ 25 ມີນາ 2025 ໄດ້ລະບຸວ່າ: ໃນຫຼາຍປີຜ່ານມາ, ພົນລະເມືອງລາວໄດ້ເດີນທາງເຂົ້າມາທ່ອງທ່ຽວ, ຢ້ຽມຢາມ ແລະ ສຶກສາຮໍ່າຮຽນຢູ່ ສ.ອາເມຣິກາ ເປັນຈຳນວນເພີ່ມຂຶ້ນໃນແຕ່ລະປີ,

ໂດຍໄດ້ຮັບວິຊາປະເພດຕ່າງໆອີງຕາມລະບຽບການຂອງລັດຖະບານ ສ.ອາເມຣິກາ. ພາຍຫຼັງການຢ້ຽມຢາມ ຫຼື ສຳເລັດພາລະກິດແລ້ວ, ພົນລະເມືອງລາວສ່ວນໃຫຍ່ແມ່ນໄດ້ເດີນທາງກັບຄືນປະເທດ,

ແຕ່ກໍມີຈຳນວນບໍ່ໜ້ອຍຍັງສືບຕໍ່ດຳລົງຊີວິດຢູ່ ສ.ອາເມຣິກາ ແລະ ບໍ່ກັບຄືນປະເທດຍ້ອນສະພາບໃນຕົວ ແລະ ນອກຕົວ.

ອີງໃສ່ມູນເຊື້ອອັນດີໃນການພົວພັນຮ່ວມມືສອງຝ່າຍລາວ-ອາເມຣິກາໃນໄລຍະຜ່ານມາ, ລັດຖະບານ ສ.ອາເມຣິກາ ກໍໄດ້ເຫັນໃຈ ແລະ ຜ່ອນຜັນໃຫ້ແກ່ພົນລະເມືອງລາວທີ່ຍັງຕົກຄ້າງຢູ່ອາເມຣິກາໄດ້ຢູ່ນຳຍາດຕິພີ່ນ້ອງ.

ນັບແຕ່ຕົ້ນປີ 2025 ເປັນຕົ້ນມາ, ລັດຖະບານໃໝ່ຂອງ ສ.ອາເມຣິກາ ໄດ້ຖືສຳຄັນການດຳເນີນນະໂຍບາຍເນຣະເທດຜູ້ຢູ່ອາໄສແບບຜິດກົດໝາຍອອກນອກປະເທດ, ເຊິ່ງເຮັດໃຫ້ສະພາບການພາຍໃນອາເມຣິກາມີການປ່ຽນແປງຢ່າງໄວວາ ເພາະພາກສ່ວນກ່ຽວຂ້ອງຂອງອາເມຣິກາໄດ້ດຳເນີນມາດຕະການຕ່າງໆ ເປັນຕົ້ນ ການຈັບກຸມ ແລະ ສົ່ງຕົວຄົນຕ່າງປະເທດທີ່ອາໄສຢູ່ແບບບໍ່ຖືກຕ້ອງອອກນອກປະເທດຕາມການອອກຂ່າວທາງສື່ມວນຊົນຕ່າງໆ.

ສະນັ້ນ, ເພື່ອຄວາມປອດໄພຂອງພົນລະເມືອງລາວ, ສະຖານເອກອັກຄະລັດຖະທູດແຫ່ງ ສປປ ລາວ ທີ່ນະຄອນຫຼວງວໍຊິງຕັນ ດີ.ຊີ ຈຶ່ງຮຽກຮ້ອງໃຫ້ພົນລະເມືອງລາວທີ່ອາໄສຢູ່ ສ.ອາເມຣິກາ ແບບບໍ່ຖືກຕ້ອງຕາມລະບຽບ ແລະ ກົດໝາຍ ໃຫ້ພ້ອມກັນທົບທວນ ແລະ ພິຈາລະນາເດີນທາງກັບຄືນປະເທດແບບສະໝັກໃຈໂດຍທັນທີ

ເພື່ອຫຼີກລ່ຽງການຖືກຈັບກຸມ, ຄຸມຂັງ ແລະ ຂຶ້ນບັນຊີເນຣະເທດອອກນອກປະເທດ, ຖືກບັງຄັບສົ່ງຕົວກັບປະເທດຂອງເຈົ້າໜ້າທີ່ທາງການຂອງ ສ.ອາເມຣິກາ ທັງນີ້ເພື່ອຄວາມປອດໄພ ແລະ ໃນອະນາຄົດຍັງອາດຈະມີໂອກາດເດີນທາງມາ ສ.ອາເມຣິກາໄດ້ອີກ ກໍຄືເພື່ອຮັກສາໂອກາດບໍ່ໃຫ້ຖືກຕົກຢູ່ໃນບັນຊີເປັນບຸກຄົນ, ກຸ່ມຄົນທີ່ບໍ່ເພິ່ງປາດຖະໜາທີ່ຖືກບັນທຶກເຂົ້າໃນບັນຊີຫ້າມເຂົ້າປະເທດ ສ.ອາເມຣິກາຕະຫຼອດຊີວິດ.

ສຳລັບທ່ານໃດທີ່ມີຈຸດປະສົງຂໍກັບຄືນປະເທດແບບສະໝັກໃຈ, ເຈົ້າໜ້າທີ່ ຫຼື ການຈັດຕັ້ງຈະບໍ່ປັບໃໝ, ໃສ່ໂທດແຕ່ປະການໃດ ເພາະຖືວ່າເປັນບຸກຄົນທີ່ໃຫ້ການຮ່ວມມືທີ່ດີ.

ສະຖານເອກອັກຄະລັດຖະທູດລາວ ກຽມພ້ອມຈະໃຫ້ຄຳປຶກສາ ແລະ ຊ່ວຍເຫຼືອທ່ານໃນການກັບຄືນປະເທດ, ເຊິ່ງທ່ານສາມາດຕິດຕໍ່ປະສານຫາພະນັກງານທີ່ຮັບຜິດຊອບໄດ້ດັ່ງລຸ່ມນີ້:

ເບີໂທ: 202 285-5395 ຫຼື 202 328-9239,

ອີເມວ: [email protected]

ດັ່ງນັ້ນ, ຈຶ່ງແຈ້ງມາຍັງພົນລະເມືອງລາວເພື່ອຊາບ ແລະ ພິຈາລະນາດ່ວນ.

ສະແດງຄຳຄິດເຫັນ