ລົດຍົນທີ່ທ່າເຮືອຂົນສົ່ງສິນຄ້າໃນເມືອງຊານດິເອໂກ ລັດແຄລິຟໍເນຍ ສະຫະລັດອາເມລິກາ ເມື່ອວັນທີ 26 ມີນາ 2025 (ຣອຍເຕີ).

ທຣັມປ໌ຂຶ້ນພາສີນຳເຂົ້າລົດຍົນເປັນ 25% ເລີ່ມເກັບວັນທີ 3 ເມສາ ຫຼັງປະກາດວັນທີ 2 ເມສາ ຄາດສ້າງລາຍໄດ້ໃໝ່ຕໍ່ປີ 1 ແສນລ້ານຫຼຽນ

ໂດນັລ ທຣັມປ໌ ປະທານາທິບໍດີສະຫະລັດ “ທຣັມປ໌” ລົງນາມເກັບພາສີນຳເຂົ້າລົດຍົນ 25%

ບລູມເບີກ (Bloomberg) ແລະ ຣອຍເຕີ (Reuters) ລາຍງານວ່າ ປະທານາທິບໍດີໂດນັລ ທຣັມປ໌ ຜູ້ນຳສະຫະລັດລົງນາມໃນປະກາດຮຽກເກັບພາສີນຳເຂົ້າລົດຍົນເປັນ 25% ຊຶ່ງເປັນການຂະຫຍາຍສົງຄາມການຄ້າທີ່ອອກແບບມາເພື່ອດຶງດູດງານຜະລິດມາຍັງສະຫະລັດຫຼາຍຂຶ້ນ ແລະ ປູທາງໄປສູ່ການຮຽກເກັບພາສີຕ່າງຕອບແທນ ຫຼື ຕ່າງຕອບໂຕ້ທີ່ຄອບຄຸມໃນວົງກວ້າງຫຼາຍຂຶ້ນໃນອາທິດໜ້າ

“ສິ່ງທີ່ພວກເຮົາຈະເຮັດຄືຮຽກເກັບພາສີ 25% ສຳລັບລົດຍົນທຸກຄັນທີ່ບໍ່ໄດ້ຜະລິດໃນສະຫະລັດ ພວກເຮົາຈະຮຽກເກັບພາສີຈາກປະເທດຕ່າງໆ ທີ່ເຮັດທຸລະກິດໃນປະເທດຂອງພວກເຮົາ ແລະ ຍຶດງານຂອງພວກເຮົາ ຍຶດຊັບຂອງພວກເຮົາ ແລະ ຍຶດສິ່ງຂອງຕ່າງໆ ຫຼາຍຢ່າງທີ່ພວກເຂົາຍຶດມາຫຼາຍປີກັບຄືນມາ” ທຣັມປ໌ກ່າວທີ່ທຳນຽບຂາວ 26 ມີນາ 2025

ພາສີລົດຍົນຈະມີຜົນບັງຄັບໃຊ້ໃນວັນທີ 2 ເມສາ ແລະ ສະຫະລັດຈະເລີ່ມເກັບພາສີໃນມື້ຖັດໄປ ຫຼື ທ່ຽງຄືນຂອງວັນທີ 3 ເມສາ ເວລາທ້ອງຖິ່ນ ແລະ ພາສີຈະໃຊ້ບໍ່ສະເພາະກັບລົດຍົນທີ່ປະກອບສົມບູນເທົ່ານັ້ນ ແຕ່ຍັງລວມເຖິງຊິ້ນສ່ວນລົດຍົນສຳຄັນໆເຊັ່ນ: ເຄື່ອງຈັກ, ເກຍ, ຊິ້ນສ່ວນລະບົບສົ່ງກຳລັງ ແລະ ສ່ວນປະກອບໄຟຟ້າ ລາຍການດັ່ງກ່າວອາດຂະຫຍາຍອອກໄປໃນອະນາຄົດເພື່ອລວມຊິ້ນສ່ວນເພີ່ມເຕີມອີກ

ທຣັມປ໌ລະບຸວ່າພາສີ-ອາກອນ ດັ່ງກ່າວເປັນການຖາວອນ ແລະ ບໍ່ສົນໃຈທີ່ຈະເຈລະຈາຂໍ້ຍົກເວັ້ນໃດໆ ແລະ ໃນຂະນະທີ່ທຣັມປ໌ກ່າວຢູ່ນີ້ ຮຸ້ນຂອງເຈນເນີຣອລ ມໍເຕີສ (General Motors), ຟອດ ມໍເຕີ (Ford Motor) ແລະ ສເຕລແລນທິສ (Stellantis) ຕົກລົງໃນການຊື້ຂາຍຫຼັງປິດຕະຫຼາດ

ວິລລ໌ ຊາຟ ເລຂາທິການຄະນະເຈົ້າໜ້າທີ່ປະຈຳທຳນຽບຂາວກ່າວວ່າພາສີນຳເຂົ້າດັ່ງກ່າວ ຈະລວມຢູ່ໃນພາສີທີ່ບັງຄັບໃຊ້ແລ້ວ ແລະ ຝ່າຍບໍລິຫານຄາດວ່າພາສີນຳເຂົ້າດັ່ງກ່າວຈະສົ່ງຜົນໃຫ້ສະຫະລັດມີລາຍໄດ້ໃໝ່ຕໍ່ປີ 1 ແສນລ້ານໂດລາ .

ສະແດງຄຳຄິດເຫັນ