ຄິມ ຈອງອຶນ ຊົມການທົດສອບໂດຣນ ໂດຣນລະເບີດຕົວເອງໄດ້  (ໂດຣນປິດຊີບ) ທີ່ໃຊ້ເທັກໂນໂລຊີເອໄອ ສັ່ງໃຫ້ການພັດທະນາອາວຸດສະໄໝໃໝ່ຕ້ອງມຸ່ງເນັ້ນຄວາມສາມາດຂອງເອໄອ

ສຳນັກຂ່າວກາງເກົາຫຼີ (KCNA) ຂອງເກົາຫຼີເໜືອ ລາຍງານວ່າ ເມື່ອວັນທີ 26 ມີນາ;

ຜູ້ນຳສູງສຸດ ຄິມ ຈອງອຶນ ໄດ້ເດີນທາງໄປກຳກັບດູແລການທົດສອບໂດຣນປິດຊີບເທັກໂນໂລຊີປັນຍາປະດິດ (AI) ດ້ວຍຕົວເອງ ພ້ອມກ່າວວ່າ ການຄວບຄຸມແບບໄຮ້ຄົນຂັບ ແລະ ຄວາມສາມາດຂອງເອໄອຈະຕ້ອງເປັນລຳດັບຄວາມສຳຄັນສູງສຸດໃນການພັດທະນາອາວຸດສະໄໝໃໝ່

ໂດຍຜູ້ນຳຄິມກວດສອບໂດຣນລາດຕະເວນຮຸ່ນໃໝ່ທີ່ປັບປຸງແລ້ວ ຊຶ່ງສາມາດກວດຈັບເປົ້າໝາຍຍຸດທະວິທີຕ່າງໆ ແລະ ກິດຈະກຳຂອງສັດຕູເທິງບົກ ແລະ ໃນທະເລໄດ້

ເກົາຫຼີເໜືອທົດສອບ ໂດຣນປິດຊີບທີ່ໃຊ້ເທັກໂນໂລຊີປັນຍາປະດິດ

ຄຳເວົ້າຂອງຄິມ ຈອງອຶນ “ອຸປະກອນໄຮ້ຄົນຂັບ ແລະ ປັນຍາປະດິດຄວນໄດ້ຮັບການໃຫ້ຄວາມສຳຄັນສູງສຸດ ແລະ ພັດທະນາໃນການປັບປຸງກອງທັບໃຫ້ທັນສະໄໝ”

ຮູບຖ່າຍສະແດງໃຫ້ເຫັນໂດຣນປີກຕຶງຂອງເກົາຫຼີເໜືອໂຈມຕີເປົ້າທີ່ເຮັດເປັນຮູບລົດຖັງ-ລົດຫຸ້ມເກາະ ຈາກນັ້ນກໍລະເບີດເປັນແປວໄຟ ໂດຍມີຮູບຄິມຍ່າງໄປກັບຜູ້ຊ່ວຍພ້ອມກັບສິ່ງທີ່ເບິ່ງຄືເຄື່ອງບິນກວດການໄຮ້ຄົນຂັບຊຶ່ງມີລັກສະນະຄ້າຍກັບເຄື່ອງບິນກວດການລະດັບສູງ RQ-4 Global Hawk ຂອງສະຫະລັດ ທີ່ຈອດຢູ່ເທິງລານຈອດເຄື່ອງບິນ

ເຊື່ອກັນວ່າຄວາມເຄື່ອນໄຫວນີ້ເກີດຈາກກອງທະຫານເກົາຫຼີເໜືອທີ່ປະຈຳການໃນສົງຄາມຣັດເຊຍ-ຢູເຄຣນ ໄດ້ຮັບປະສົບການ ການຮົບອັນລ້ຳຄ່າຈາກສົງຄາມໂດຣນທີ່ຢູເຄຣນມັກໃຊ້ ແລະ ສົ່ງຂໍ້ມູນກັບມາໃຫ້ເກົາຫຼີເໜືອ

ເກົາຫຼີເໜືອຍັງໄດ້ເປີດເຜີຍເຄື່ອງບິນແຈ້ງເຕືອນໄພທາງອາກາດລ່ວງໜ້າ (AEW) ຢ່າງເປັນທາງການເປັນຄັ້ງທຳອິດ ຊຶ່ງຈະຊ່ວຍປັບປຸງລະບົບປ້ອງກັນໄພທາງອາກາດທີ່ເກົ່າແກ່ຂອງປະເທດໄດ້

ຮູບທີ່ສື່ຂອງລັດເຜີຍແຜ່ສະແດງໃຫ້ເຫັນ ຄິມ ຈອງອຶນ ກຳລັງປີນຂັ້ນໄດໄປຍັງປະຕູຂອງເຄື່ອງບິນຂະໜາດໃຫຍ່ທີ່ມີເຄື່ອງຈັກສີ່ເຄື່ອງ ແລະ ໂດມເຣດາທີ່ຕິດຕັ້ງເທິງລຳຕົວເຄື່ອງບິນ ແລະ ເບິ່ງເຄື່ອງບິນຂະນະບິນໃນລະດັບຄວາມສູງຕ່ຳ

ນັກວິເຄາະລາຍງານກ່ອນໜ້ານີ້ວ່າ ເກົາຫຼີເໜືອໄດ້ດັດແປງເຄື່ອງບິນຂົນສົ່ງສິນຄ້າ Il-76 ທີ່ຜະລິດໂດຍຣັດເຊຍໃຫ້ເຮັດໜ້າທີ່ແຈ້ງເຕືອນລ່ວງໜ້າໂດຍໃຊ້ຮູບຖ່າຍດາວທຽມ

ສະຖາບັນລະຫວ່າງປະເທດເພື່ອການສຶກສາກົນລະຍຸດແຫ່ງລອນດອນລະບຸໃນລາຍງານເມື່ອເດືອນ ກັນຍາ ວ່າ ເຄື່ອງບິນດັ່ງກ່າວຈະຊ່ວຍເສີມລະບົບເຣດາພາກພື້ນດິນທີ່ມີຢູ່ຂອງເກົາຫຼີເໜືອ ຊຶ່ງບາງຄັ້ງຖືກຈຳກັດດ້ວຍພູມປະເທດທີ່ເປັນພູເຂົາ

ລາຍງານລະບຸວ່າ “ຄວາມສາມາດຂອງເຄື່ອງບິນ AEW ຈະຊ່ວຍບັນເທົາຄວາມທ້າທາຍບາງປະການຂອງພູມປະເທດ ແລະ ສິ່ງລົບກວນເທິງພື້ນດິນທີ່ກັບມາຕິດຕາມເຄື່ອງບິນທີ່ບິນຕ່ຳ ແລະ ຂີປະນາວຸດຮ່ອນ”

ສະແດງຄຳຄິດເຫັນ