ປະທານາທິບໍດີໂດນັລ ທຣຳຂອງສະຫະລັດ ເປີດເຜີຍວ່າ ໄດ້ລົມກັບເຈົ້າໜ້າທີ່ໃນມຽນມາກ່ຽວກັບເຫດແຜ່ນດິນໄຫວຮຸນແຮງ ລະດັບ 7.7 ທີ່ເກີດຂຶ້ນແລ້ວ ແລະ ລັດຖະບານຈະໃຫ້ຄວາມຊ່ວຍເຫຼືອໃນຮູບແບບໃດຮູບແບບໜຶ່ງ

 

ປະທານາທິບໍດີໂດນັລ ທຣຳຂອງສະຫະລັດ ເປີດເຜີຍກັບຜູ້ສື່ຂ່າວທີ່ທຳນຽບຂາວ ໂດຍລະບຸວ່າ ລັດຖະບານວໍຊິງຕັນຈະມອບຄວາມຊ່ວຍເຫຼືອໃຫ້ມຽນມາໃນຮູບແບບໃດຮູບແບບໜຶ່ງ ຫຼັງຈາກລົມກັບເຈົ້າໜ້າທີ່ຂອງລັດຖະບານມຽນມາ ກ່ຽວກັບສະຖານະການແຜ່ນດິນໄຫວຮຸນແຮງ ລະດັບ 7.7 ເຊິ່ງເກີດຂຶ້ນທາງຕອນກາງຂອງປະເທດ

 

ສຳລັບຄວາມເສຍຫາຍສ່ວນໃຫຍ່ເກີດຂຶ້ນໃນເມືອງມັນດາເລ ເມືອງໃຫຍ່ອັນດັບ 2 ຂອງມຽນມາ ເນື່ອງຈາກຕັ້ງຢູ່ໃກ້ຈຸດສູນກາງຂອງການເກີດແຜ່ນດິນໄຫວຮຸນແຮງ ຕາມມາດ້ວຍອາຟເຕີຊັອກຮຸນແຮງ ແລະ ແຜ່ນດິນໄຫວ ລະດັບປານກາງອີກຫຼາຍລະຮອບ

 

 

ສົ່ງຜົນໃຫ້ບ້ານເຮືອນປະຊາຊົນ ແລະ ໂຄງສ້າງພື້ນຖານເປ່ເພ່ ແລະ ຖະຫຼົ່ມ ທ່າມກາງຄວາມພະຍາຍາມຂອງເຈົ້າໜ້າທີ່ກູ້ໄພ ທີ່ລະດົມກຳລັງກັນເລັ່ງເຮັດວຽກແຂ່ງກັບເວລາເພື່ອຄົ້ນຫາຜູ້ທີ່ອາດຈະຍັງຄົງຕິດຢູ່ພາຍໃຕ້ຊາກປັກຫັກພັງ ເຖິງແມ່ນວ່າຈະພົບກັບອຸປະສັກຈາກບັນຫາການຂາດແຄນອຸປະກອນຕັດຖ່າງ ແລະ ເຄື່ອງຈັກໃນການເຄື່ອນຍ້າຍ

 

ການແຖລງ ດັ່ງກ່າວຂອງທຣຳມີຂຶ້ນຫຼັງຈາກພົນເອກອາວຸໂສມິນ ອອງ ຫຼາຍ ຜູ້ນຳຄະນະລັດຖະປະຫານຂອງມຽນມາແຖລງຜ່ານທາງໂທລະພາບລວມການສະເພາະກິດ ໂດຍລະບຸວ່າ ມຽນມາເປີດຮັບຄວາມຊ່ວຍເຫຼືອລະຫວ່າງປະເທດ ແລະ ຍອມຮັບຂໍ້ສະເໜີສົ່ງຄວາມຊ່ວຍເຫຼືອຈາກອິນເດຍ ແລະ ຈາກຊາດພັນທະມິດໃນສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ ຫຼື ອາຊຽນ (ASEAN)

 

ນອກຈາກນີ້ຍັງອົງການລະຫວ່າງປະເທດ ແລະ ລັດຖະບານຫຼາຍຊາດ ລວມເຖິງ ສະຫະປະຊາຊາດ, ສະຫະພາບຢູໂລບ, ຝຣັ່ງ, ຈີນ ສະເໜີສົ່ງຄວາມຊ່ວຍເຫຼືອໃຫ້ມຽນມາແລ້ວ

 

ທາງການມຽນມາລາຍງານວ່າຜູ້ເສຍຊີວິດຈາກເຫດແຜ່ນດິນໄຫວ ລະດັບ 7.7 ຢູ່ທີ່ຢ່າງໜ້ອຍ 694 ຄົນ ແລະ ມີລາຍງານຜູ້ບາດເຈັບກວ່າ 1,600 ຄົນ ແຕ່ຄາດວ່າ ຕົວເລກຜູ້ເສຍຊີວິດ ແລະ ບາດເຈັບໜ້າຈະເພີ່ມສູງຂຶ້ນອີກ

 

ຂະນະທີ່ການວິເຄາະຂອງລັດຖະບານສະຫະລັດ ເຊິ່ງອີງຈາກຄວາມຮຸນແຮງ ແລະ ຄວາມເລິກຂອງແຜ່ນດິນໄຫວ ປະເມີນວ່າ ອາດມີຜູ້ເສຍຊີວິດຫຼາຍພັນຄົນ ແລະ ສ້າງຄວາມເສຍຫາຍໃຫ້ກັບເສດຖະກິດຂອງມຽນມາຢ່າງຮຸນແຮງ ໂດຍພູມິພາກສະກາຍ ແລະ ເມກຕິລາເປັນພື້ນທີ່ທີ່ໄດ້ຮັບຜົນກະທົບຮ້າຍແຮງທີ່ສຸດ

 

ສຳນັກຂ່າວບີບີຊີມຽນມາ ລາຍງານວ່າ ປະຊາຊົນໃນເມືອງໃຫຍ່ 2 ແຫ່ງຂອງມຽນມາ ໄດ້ແກ່ ມັນດາເລ ແລະ ຢ່າງກຸ້ງ ບໍ່ມີໄຟຟ້າ ແລະ ສັນຍານໂທລະສັບໃຊ້ບໍ່ໄດ້ ຫຼັງເກີດແຜ່ນດິນໄຫວຊາວເມືອງມັນດາເລຄົນໜຶ່ງບອກວ່າຕິດຕໍ່ກັບຄອບຄົວບໍ່ໄດ້ ເພາະບໍ່ມີໄຟຟ້າໃຫ້ຊາກໂທລະສັບ ແລະ ກໍບໍ່ສາມາດໃຊ້ອິນເຕີເນັດໄດ້ເລີຍ

 

ຢ່າງໃດກໍຕາມ ຫຼາຍຝ່າຍກັງວົນວ່າແຜ່ນດິນໄຫວຄັ້ງນີ້ມີແນວໂນ້ມທີ່ຈະເຮັດໃຫ້ສະຖານະການໃນມຽນມາທີ່ປະເຊີນກັບສົງຄາມກາງເມືອງໃນຊ່ວງບໍ່ເທົ່າໃດປີທີ່ຜ່ານມາ ມີຄວາມຊັບຊ້ອນຍິ່ງຂຶ້ນ ຫຼັງຈາກລັດຖະບານພະເດັດການທະຫານກຳລັງສູ້ຮົບຕິດພັນກັບກຸ່ມກະບົດ ແລະ ກຸ່ມຊາດພັນຕິດອາວຸດ

 

ຍັງບໍ່ລວມເຖິງ ວິກິດອາຫານຂັ້ນຮຸນແຮງ ແລະ ພາວະເສດຖະກິດຕົກຕ່ຳ ບັນຫາການຂາດເສລີພາບໃນການສື່ສານ ເຮັດໃຫ້ການລາຍງານສະຖານະການໃນພື້ນທີ່ເປັນໄປດ້ວຍຄວາມຍາກລຳບາກ

 

ການເປີດເຜີຍວ່າຈະສົ່ງຄວາມຊ່ວຍເຫຼືອໃຫ້ມຽນມາຂອງທຣຳມີຂຶ້ນໃນຂະນະທີ່ຝ່າຍບໍລິຫານແຈ້ງກັບສະພາຄອງເກຣສວ່າສະຫະລັດຈະດຳເນີນການປົດພະນັກງານເກືອບທັງໝົດທີ່ຍັງເຫຼືອຢູ່ໃນອົງການເພື່ອການພັດທະນາລະຫວ່າງປະເທດຂອງສະຫະລັດ ຫຼື ຢູເອສເອໄອດີ (USAID) ແລະ ປິດໜ່ວຍງານດັ່ງກ່າວເພື່ອຫຼຸດລາຍຈ່າຍກໍຕາມ

 

ດ້ານໂຄສົກກະຊວງຕ່າງປະເທດຂອງສະຫະລັດ ລະບຸວ່າ ການທີ່ລັດຖະບານຕັດງົບ ແລະ ປົດພະນັກງານຈະບໍ່ສົ່ງຜົນຕໍ່ການສົ່ງທີມຕອບສະໜອງຕໍ່ໄພພິບັດຂອງສະຫະລັດ (DART) ເຂົ້າໄປໃນມຽນມາ ແຕ່ຍັງບໍ່ໄດ້ລະບຸເວລາທີ່ແນ່ຊັດ

 

ທັງນີ້ ຢູເອສເອໄອດີ (USAID) ມີບົດບາດສຳຄັນໃນການປະສານຄວາມຊ່ວຍເຫຼືອປະເທດຕ່າງໆ ທີ່ປະເຊີນແຜ່ນດິນໄຫວທົ່ວໂລກ

ສະແດງຄຳຄິດເຫັນ