ນ້ຳມັນໝູ ອາດຈະເຄີຍເປັນສ່ວນປະສົມຫຼັກໃນເຮືອນຄົວຂອງຫຼາຍຄົວເຮືອນ, ແຕ່ຕໍ່ມາກໍ່ຄ່ອຍໆ ເສື່ອມຄວາມນິຍົມລົງ, ເມື່ອການຕະຫຼາດຂອງໄຂມັນຈາກໂຮງງານ, ເຊັ່ນ: ນ້ຳມັນພືດ ແລະ ມາກາລີນ, ຊັກຈູງໃຫ້ຜູ້ຄົນປ່ຽນພຶດຕິກຳການບໍລິໂພກແລະ ສ່ວນປະສົມທີ່ໃຊ້ໃນຄົວ.

ເຖິງຢ່າງໃດກໍຕາມ, ພວກເຮົາກຳລັງຄ່ອຍໆ ຄົ້ນພົບວ່າການຮັບປະທານອາຫານທີ່ປະກອບດ້ວຍອາຫານທຳມະຊາດ ແລະ ໄຂມັນດີມີປະໂຫຍດຕໍ່ສຸຂະພາບ.

ຮ່າງກາຍຂອງພວກເຮົາຕ້ອງການໄຂມັນເພື່ອດູດຊຶມວິຕາມິນທີ່ຈຳເປັນ, ແລະ ນ້ຳມັນໝູຈາກໝູທີ່ລ້ຽງແບບປ່ອຍອິດສະຫຼະກໍ່ເປັນໜຶ່ງໃນໄຂມັນດີທີ່ມີປະໂຫຍດຫຼາຍ.

ນອກຈາກນີ້ຍັງສາມາດນຳໄປໃຊ້ໃນການປຸງອາຫານໄດ້ຫຼາກຫຼາຍວິທີ.

1.ນ້ຳມັນໝູເປັນອາຫານທຳມະຊາດ

ນ້ຳມັນໝູຄືນ້ຳມັນທີ່ໄດ້ຈາກການຈຽວມັນໝູ, ຊຶ່ງໝາຍຄວາມວ່າຜ່ານຂະບວນການແປຮູບໜ້ອຍທີ່ສຸດ, ບໍ່ມີສ່ວນປະສົມ, ສານເຕີມແຕ່ງ, ຫຼື ສານກັນບູດອື່ນໆ, ແຕກຕ່າງຈາກອາຫານແປຮູບທີ່ພົບໄດ້ທົ່ວໄປຕາມຊັ້ນວາງສິນຄ້າໃນຮ້ານຂາຍເຄື່ອງ.

ຮ່າງກາຍຂອງພວກເຮົາຖືກອອກແບບມາໃຫ້ຮູ້ວ່າຈະຕ້ອງເຮັດແນວໃດເມື່ອພວກເຮົາກິນອາຫານທຳມະຊາດ.

2.ນ້ຳມັນໝູທົນຄວາມຮ້ອນ

ນ້ຳມັນໝູມີຈຸດເກີດຄວັນຢູ່ທີ່ 187.78 ອົງສາເຊວຊຽດ, ຊຶ່ງໝາຍຄວາມວ່ານ້ຳມັນໝູບໍ່ສະຫຼາຍຕົວ ແລະ ເກີດປະຕິກິລິຍາອອກຊີເດຊັນໄດ້ໄວເທົ່າກັບໄຂມັນຊະນິດອື່ນໆ ທີ່ໃຊ້ກັນໃນຄົວ, ເຊັ່ນ: ນ້ຳມັນພືດ. ເມື່ອໄຂມັນບໍ່ເກີດປະຕິກິລິຍາອອກຊີເດຊັນໄດ້ໄວ, ກໍ່ຈະສ້າງອະນຸມູນອິດສະຫຼະໜ້ອຍລົງ.

ອະນຸມູນອິດສະຫຼະມີຄວາມເຊື່ອມໂຍງກັບອາການອັກເສບແລະການທຳລາຍເຊວ, ດັ່ງນັ້ນ ການມີອະນຸມູນອິດສະຫຼະໃນອາຫານຂອງພວກເຮົາໜ້ອຍລົງຈຶ່ງເປັນສິ່ງທີ່ດີ.

3.ນ້ຳມັນໝູຈາກໝູລ້ຽງແບບປ່ອຍອິດສະຫຼະມີວິຕາມິນດີສູງ

ໝູທີ່ລ້ຽງແບບປ່ອຍອິດສະຫຼະຊຶ່ງໃຊ້ຊີວິດທ່າມກາງແສງແດດແລະອາກາດບໍລິສຸດ, ຈະສະສົມວິຕາມິນດີຈາກແສງອາທິດໄວ້ໃນເນື້ອເຍື່ອໄຂມັນຂອງມັນ, ເຮັດໃຫ້ໄຂມັນໝູ (ຫາກຈຽວຈາກໝູລ້ຽງແບບປ່ອຍອິດສະຫຼະ) ເປັນໜຶ່ງໃນແຫຼ່ງວິຕາມິນດີຈາກທຳມະຊາດທີ່ດີທີ່ສຸດໃນອາຫານ, ເປັນຮອງພຽງນ້ຳມັນຕັບປາຄອດເທົ່ານັ້ນ.

ຫາກທ່ານຕ້ອງການເພີ່ມວິຕາມິນດີໃນອາຫານ, ການປຸງອາຫານດ້ວຍນ້ຳມັນໝູຈາກໝູລ້ຽງແບບປ່ອຍອິດສະຫຼະໃນປະລິມານທີ່ພໍເໝາະກໍ່ເປັນຕົວຊ່ວຍທີ່ດີ. ນອກຈາກນີ້ຍັງມີສານອາຫານທີ່ເປັນປະໂຫຍດອື່ນໆ ເຊັ່ນ: ວິຕາມິນບີລວມ, ວິຕາມິນຊີ, ແລະ ທາດເຫຼັກ, ອີກທັງຍັງມີໄຂມັນບໍ່ອິ່ມຕົວເຊີງດ່ຽວສູງແລະຄໍເລສເຕີຣອວ “ດີ” ຊຶ່ງເປັນປະໂຫຍດຕໍ່ສຸຂະພາບຫົວໃຈແລະຫຼອດເລືອດ.

4.ນ້ຳມັນໝູມີລົດຊາດທີ່ເປັນກາງ

ນ້ຳມັນຫຼາຍຊະນິດທີ່ໄດ້ຮັບຄວາມນິຍົມໃນປັດຈຸບັນ ແລະ ມີຈຸດເກີດຄວັນສູງ, ມັກຈະເຮັດໃຫ້ລົດຊາດຂອງອາຫານທີ່ປຸງປ່ຽນໄປ. ເມື່ອທ່ານປຸງອາຫານດ້ວຍນ້ຳມັນໝູ, ອາຫານຂອງທ່ານຈະບໍ່ມີລົດຊາດຂອງໝູ, ແຕ່ທ່ານຈະໄດ້ແປ້ງພາຍທີ່ຮ່ວນກອບທີ່ສຸດ, ແປ້ງໂດວ໌ທີ່ນຸ່ມທີ່ສຸດ, ແລະ ໄກ່ຫຼືປາທອດທີ່ກອບທີ່ສຸດ.

ສະແດງຄຳຄິດເຫັນ