ດມິທຣີ ເປສຄອຟ ໂຄສົກທຳນຽບເຄມລິນ ຂອງຣັດເຊຍ ຖະແຫຼງວ່າ ຣັດເຊຍຍັງຄົງ “ເຮັດວຽກຮ່ວມກັບສະຫະລັດອາເມລິກາ” ຫຼັງຈາກປະທານາທິບໍດີໂດນັລດ໌ ທຣຳ ຂອງສະຫະລັດອາເມລິກາ ກ່າວວ່າ ລາວ “ບໍ່ພໍ່ໃຈ” ປະທານາທິບໍດີວລາດິເມຍ ປູຕິນ ຜູ້ນຳຣັດເຊຍ.

 

ຖືເປັນການຕອບໂຕ້ຄັ້ງທຳອິດຂອງຣັດເຊຍຕໍ່ກໍລະນີທີ່ທຣຳວິພາກວິຈານປູຕິນ, ໂດຍເຄມລິນພະຍາຍາມທີ່ຈະຫຼຸດຄວາມຕຶງຄຽດລະຫວ່າງສອງຜູ້ນຳ.

 

ເປສຄອຟ ກ່າວວ່າ ຣັດເຊຍຍັງເຮັດວຽກຮ່ວມກັບຝ່າຍສະຫະລັດອາເມລິກາຕໍ່ໄປ ເພື່ອສ້າງຄວາມສຳພັນຂອງສອງປະເທດ.

 

ລາວຍັງບອກວ່າ ຍັງບໍ່ມີແຜນການສຳລັບການໂທລົມພູດກັນລະຫວ່າງປູຕິນ ແລະ ທຣຳໃນອາທິດນີ້, ແຕ່ວ່າປູຕິນກໍ່ພ້ອມທີ່ຈະລົມນຳ “ຫາກຈຳເປັນ”.

 

ຄວາມພະຍາຍາມທີ່ຈະປັບປຸງສະຖານະການໃຫ້ຮາບລື່ນ ແລະ ດີຂຶ້ນ ເກີດຂຶ້ນຫຼັງຈາກທຣຳກ່າວກັບ NBC News ເມື່ອວັນອາທິດທີ່ຜ່ານມາວ່າ ເຂົາໃຈຮ້າຍໃຫ້ປູຕິນທີ່ໂຈມຕີຄວາມໜ້າເຊື່ອຖືຂອງປະທານາທິບໍດີໂວໂລດິເມຍ ເຊເລນສກີ ຂອງຢູເຄຣນ ແລະ ຂູ່ວ່າຈະຮຽກເກັບພາສີຮ້ອຍລະ 50 ກັບປະເທດຕ່າງໆ ທີ່ຊື້ນ້ຳມັນຈາກຣັດເຊຍ ຫາກປູຕິນບໍ່ຕົກລົງຢຸດຍິງ.

 

ຖືເປັນການປ່ຽນທ່າທີທີ່ມີຕໍ່ປະທານາທິບໍດີຣັດເຊຍຢ່າງຊັດເຈນ.

 

ທັງນີ້, ເຈົ້າໜ້າທີ່ຂອງສະຫະລັດອາເມລິກາ ແລະ ຣັດເຊຍ ເຈລະຈາກັນມານານຫຼາຍອາທິດ ເພື່ອພະຍາຍາມບັນລຸຂໍ້ຕົກລົງຢຸດສົງຄາມໃນຢູເຄຣນ, ຊຶ່ງລະຫວ່າງການເຈລະຈາ, ປູຕິນມັກວິພາກວິຈານເຊເລນສກີ, ບໍ່ໄດ້ວິຈານປູຕິນ. ແຕ່ຄວາມບໍ່ພໍໃຈຂອງທຣຳຕໍ່ປູຕິນ ປະທຸຂຶ້ນເມື່ອປະທານາທິບໍດີຣັດເຊຍ ເສນີແນວຄິດທີ່ຈະຈັດຕັ້ງລັດຖະບານສະເພາະການໃນຢູເຄຣນພາຍໃຕ້ການສະໜັບສະໜູນຈາກສະຫະປະຊາຊາດ, ຊຶ່ງອາດເຂົ້າມາແທນທີ່ປະທານາທິບໍດີເຊເລນສກີ.

 

ທຣຳ ກ່າວກັບ NBC News ວ່າ ເຂົາບໍ່ພໍໃຈຫຼາຍ ແລະ ໂມໂຫ ເມື່ອປູຕິນເລີ່ມຕັ້ງແງ່ເລື່ອງຄວາມໜ້າເຊື່ອຖືຂອງເຊເລນສກີ ເພາະນັ້ນບໍ່ແມ່ນຈຸດທີ່ເໝາະສົມ, ຊຶ່ງກວ່າຈະໄດ້ຜູ້ນຳຄົນໃໝ່ ຕ້ອງໃຊ້ເວລາຍືດຍາວອອກໄປອີກໃນການບັນລຸຂໍ້ຕົກລົງຢຸດຍິງ.

 

ດ້ານໜັງສືພິມ ມອສຄອຟສກີ ຄອມໂຊໂມເລດສ໌ (Moskovsky Komsomolets) ຂອງຣັດເຊຍ ທີ່ສະໜັບສະໜູນເຄມລິນ ເຜີຍແຜ່ຄຳວິຈານຂອງປະທານາທິບໍດີສະຫະລັດອາເມລິກາ ບາງສ່ວນທີ່ບໍ່ຄ່ອຍເກີດຂຶ້ນບໍ່ເທົ່າໃດ, ໂດຍລະບຸວ່າ ທຣຳບໍ່ໄດ້ປະຕິບັດຕາມ “ພັນທະກຳນົດ” ຂອງຕົນໃນການຢຸດຢັ້ງຢູເຄຣນບໍ່ໃຫ້ໂຈມຕີໂຄງສ້າງພື້ນຖານດ້ານພະລັງງານຂອງຣັດເຊຍ.

ສະແດງຄຳຄິດເຫັນ