ເຄີຍມີຄົນຮອບຂ້າງທັກວ່າ ພວກເຮົາອາດຈະເປັນ ໂລກໄທລອຍດ໌ ເພາະເຫັນວ່າຄໍໂປ່ງ, ຄໍບວມຜິດປົກກະຕິ, ລອງຍືດຄໍແລ້ວລູບຂຶ້ນລູບລົງຫຼາຍຮອບເລີຍທີດຽວ. ແຕ່ຄວາມເປັນຈິງແລ້ວນອກຈາກຄໍໂປ່ງ, ຍັງມີອາການອື່ນໆ ທີ່ເປັນອາການເລີ່ມຕົ້ນຂອງ ຕ່ອມໄທລອຍດ໌ເປັນພິດ ອີກຫຼາຍຢ່າງ.

 

ມີອາການຫຍັງແດ່, ມາເຊັກນຳກັນ.

 

ຮູ້ຈັກກັບຕ່ອມໄທລອຍດ໌

 

ຕ່ອມໄທລອຍດ໌ ເປັນຕ່ອມທີ່ມີຂະໜາດໃຫຍ່ທີ່ສຸດໃນລະບົບຂອງຕ່ອມບໍ່ມີທໍ່, ລັກສະນະກໍ່ຈະຄ້າຍໆ ກັບປີກແມງກະເບື້ອ ທີ່ກາງອອກແລ້ວຄອບຢູ່ບໍລິເວນດ້ານເທິງຂອງຫຼອດລົມ, ເຮັດໜ້າທີ່ສ້າງຮໍໂມນທີ່ຄວບຄຸມການເຜົາຜານພະລັງງານພາຍໃນຮ່າງກາຍ, ລະບົບຍ່ອຍອາຫານ, ລະດັບໄຂມັນໃນເລືອດ, ການເຮັດວຽກຂອງກ້າມຊີ້ນ, ຄວບຄຸມອຸນຫະພູມໃນຮ່າງກາຍ, ໄປຈົນເຖິງຄວບຄຸມເລື່ອງອາລົມ ແລະ ຄວາມຮູ້ສຶກ.

 

ໂດຍປົກກະຕິແລ້ວຕ່ອມໄທລອຍດ໌ຈະຜະລິດຮໍໂມນອອກມາໃນປະລິມານທີ່ເໝາະສົມ, ຊ່ວຍເສີມໃຫ້ລະບົບຕ່າງໆ ເຮັດວຽກໄດ້ຢ່າງເຕັມປະສິດທິພາບ, ແຕ່ເມື່ອວັນໃດທີ່ຕ່ອມໄທລອຍດ໌ເກີດເຮັດວຽກໜັກຈົນເກີນໄປ, ກໍ່ຈະສົ່ງຜົນໃຫ້ຮ່າງກາຍເມື່ອຍງ່າຍ, ມືສັ່ນ, ໃຈສັ່ນ, ນອນບໍ່ຫຼັບ, ນ້ຳໜັກລຸດ, ຫຼື ໃນຜູ້ຍິງກໍ່ອາດເກີດປະຈຳເດືອນມາຜິດປົກກະຕິໄດ້.

 

ໃນບາງລາຍຫາກມີອາການຮຸນແຮງກໍ່ຈະເຮັດໃຫ້ຜູ້ປ່ວຍເກີດອາການໂຄມ່າ, ຕາເຫຼືອງ, ຕົວເຫຼືອງ, ອາດເຮັດໃຫ້ເກີດພາວະຫົວໃຈວາຍ ແລະ ມີນ້ຳຖ້ວມປອດໄດ້. ລວມແລ້ວອາການທີ່ເກີດຂຶ້ນເຫຼົ່ານີ້ຈະເອີ້ນວ່າ ພາວະໄທລອຍດ໌ເປັນພິດ.

 

ສັນຍານເຕືອນໄພ ຕ່ອມໄທລອຍດ໌ເປັນພິດ

 

1. ອ່ອນເພຍ, ເມື່ອຍງ່າຍກວ່າປົກກະຕິ

 

1. ໃຈສັ່ນ, ອ່ອນແຮງ
2. ເຫື່ອອອກງ່າຍ, ຂີ້ຮ້ອນງ່າຍຂຶ້ນ
3. ຫງຸດຫງິດງ່າຍກວ່າເກົ່າ, ອາລົມແປປວນ
4. ນ້ຳໜັກລຸດລົງຢ່າງບໍ່ຮູ້ສາເຫດ
5. ປະຈຳເດືອນຜິດປົກກະຕິ
6. ຄໍໂຕ, ຄໍໂປ່ງ
7. ອາດມີອາການຕາໂປນຮ່ວມນຳ

 

ສາເຫດຂອງໂລກໄທລອຍດ໌ເປັນພິດ

 

ຄວາມຈິງ ແລ້ວສາເຫດຂອງໂລກໄທລອຍດ໌ເປັນພິດມີຢູ່ຫຼາຍສາເຫດ, ແຕ່ໂດຍສ່ວນໃຫຍ່ແລ້ວມາຈາກການທີ່ລະບົບພູມຄຸ້ມກັນໂລກເຮັດວຽກຜິດປົກກະຕິ, ໂດຍເຂົ້າໄປກະຕຸ້ນຕ່ອມໄທລອຍດ໌ໃຫ້ເຮັດວຽກໜັກເກີນໄປ.

 

ແລະ ຫາກຍາດຕິພີ່ນ້ອງມີປະຫວັດເຄີຍເປັນໂລກໄທລອຍດ໌ເປັນພິດ, ກໍ່ຍິ່ງເພີ່ມຄວາມສ່ຽງຫຼາຍຂຶ້ນ.

 

ນອກຈາກນີ້ຜູ້ຍິງຍັງມີໂອກາດເປັນໄທລອຍດ໌ເປັນພິດຫຼາຍກວ່າຜູ້ຊາຍອີກດ້ວຍ.

 

ດັ່ງນັ້ນຫາກໃຜມີອາການດັ່ງກ່າວ, ຮີບປຶກສາແພດ ເພື່ອເຮັດການປິ່ນປົວໃຫ້ທັນທ່ວງທີ ກ່ອນທີ່ຈະຊ້າເກີນໄປ.

 

 

ສະແດງຄຳຄິດເຫັນ