ວັນທີ 2 ເມສາ, ປະທານາທິບໍດີສະຫະລັດອາເມລິກາ ໂດນັລ ທຣໍາ ໄດ້ປະກາດກໍານົດພາສີສຸນລະກາກອນຕອບໂຕ້ (Reciprocal Tariff) ໂດຍໃຫ້ເຫດຜົນວ່າພາສີເຫຼົ່ານີ້ຈະເຮັດໃຫ້ສະຫະລັດອາເມລິກາປະສົບຜົນສໍາເລັດ.

 

ພາສີ-ອາກອນຂອງທຣໍາ ເຊິ່ງໄດ້ລົງນາມໃນຄໍາສັ່ງຝ່າຍບໍລິຫານເປັນທີ່ຮຽບຮ້ອຍແລ້ວ, ຄາດວ່າຈະສົ່ງຜົນກະທົບທາງເສດຖະກິດໄປທົ່ວໂລກ ໂດຍທໍານຽບຂາວໄດ້ເປີດເຜີຍລາຍຊື່ປະເທດ/ດິນແດນ 185 ແຫ່ງ ແລະ ອັດຕາພາສີ-ອາກອນທີ່ສະຫະລັດອາເມລິກາຈະກໍານົດຕໍ່ປະເທດ/ດິນແດນເຫຼົ່ານັ້ນ.

 

ໂດນັລ ທຣໍາ ກຳນົດມາດຕະການພາສີສຸນລະກາກອນຕອບໂຕ້ຕໍ່ 60 ປະເທດ/ດິນແດນທົ່ວໂລກ

 

ອັດຕາພາສີສຸນລະກາກອນພື້ນຖານ 10%

 

ປະທານາທິບໍດີທຣໍາໄດ້ກຳນົດ “ພາສີ-ອາກອນພື້ນຖານ” ກັບປະເທດສ່ວນໃຫຍ່ທີ່ບໍ່ໄດ້ຈັດໃຫ້ເປັນ “ປະເທດທີ່ເອົາປຽບສະຫະລັດອາເມລິກາ” ໂດຍຈະກຳນົດອັດຕາພາສີສຸນລະກາກອນໄວ້ທີ່ 10% ແລະ ຈະມີຜົນບັງຄັບໃຊ້ໃນວັນທີ 5 ເມສາ.

 

ມີຢູ່ 125 ປະເທດ/ດິນແດນທີ່ຖືກຮຽກເກັບພາສີ-ອາກອນໃນອັດຕານີ້ ເຊັ່ນ: ສະຫະລາດຊະອານາຈັກ, ສິງກະໂປ, ບຣາຊິນ, ອົດສະຕາລີ, ນິວຊີແລນ, ຕຸລະກີ, ໂຄລົມເບຍ, ອາເຈນຕິນາ, ເອວຊານວາດໍ, ສະຫະລັດອາຣັບເອມິເລັດ, ຊາອຸດິອາຣະເບຍ ແລະ ອື່ນໆ.

 

ພາສີ-ອາກອນສຳລັບ “ຜູ້ກະທຳຜິດຮ້າຍແຮງທີ່ສຸດ”

 

ທຣໍາໄດ້ຮຽກເກັບພາສີ-ອາກອນຕອບໂຕ້ຕໍ່ “ປະເທດທີ່ກະທຳຜິດຮ້າຍແຮງທີ່ສຸດຕໍ່ສະຫະລັດອາເມລິກາ” ຊຶ່ງມີຢູ່ 60 ລາຍ ລວມເຖິງ “ປະເທດລາວ” ຂອງເຮົາ ໂດຍຈະມີຜົນບັງຄັບໃຊ້ໃນວັນທີ 9 ເມສາ.

 

ສະຫະລັດອາເມລິກາລະບຸວ່າ ປະເທດ/ດິນແດນເຫຼົ່ານີ້ຮຽກເກັບພາສີ-ອາກອນ ທີ່ສູງສຳລັບສິນຄ້າຂອງສະຫະລັດອາເມລິກາ, ມີການໃຊ້ມາດຕະການທີ່ບໍ່ແມ່ນພາສີຕໍ່ການຄ້າຂອງສະຫະລັດອາເມລິກາ ຫຼື ກະທຳການໃນລັກສະນະອື່ນທີ່ລັດຖະບານສະຫະລັດອາເມລິກາຮູ້ສຶກວ່າເປັນການທຳລາຍເປົ້າໝາຍທາງເສດຖະກິດຂອງສະຫະລັດອາເມລິກາ.

 

ທຣໍາກ່າວວ່າ “ເຮົາຈະຮຽກເກັບພາສີຈາກພວກເຂົາປະມານເຄິ່ງໜຶ່ງຂອງພາສີທີ່ພວກເຂົາຮຽກເກັບ ແລະ ເຄີຍຮຽກເກັບຈາກເຮົາ, ດັ່ງນັ້ນພາສີຈະບໍ່ແມ່ນອັດຕາເຕັມຈຳນວນ.

 

ລາວຈະເຮັດແບບນັ້ນກໍໄດ້ ແຕ່ຈະເປັນເລື່ອງຍາກສຳລັບຫຼາຍປະເທດ ແລະ ເຮົາບໍ່ຢາກເຮັດເຊັ່ນນັ້ນ.” ປະເທດ/ດິນແດນທີ່ເຈອພາສີຕອບໂຕ້ແບບໜັກໜ່ວງນີ້ ເຊັ່ນ:

 

• ກໍາປູເຈຍ: 49%
• ສປປ ລາວ: 48%
• ຫວຽດນາມ: 46%
• ມຽນມາ: 44%
• ໄທ: 36%
• ຈີນ: 34%
• ໄຕ້ຫວັນ: 32%
• ອາຟຣິກາໃຕ້: 30%
• ຍີ່ປຸ່ນ: 24%
• ສະຫະພາບຢູໂຣບ: 20%

 

ບໍ່ມີພາສີ-ອາກອນເພີ່ມເຕີມສຳລັບແຄນາດາ ແລະ ເມັກຊິໂກ

ແຄນາດາ ແລະ ເມັກຊິໂກ ບໍ່ໄດ້ຖືກກ່າວເຖິງໃນປະກາດມາດຕະການພາສີອາກອນໃໝ່ເຫຼົ່ານີ້

 

ທໍານຽບຂາວກ່າວວ່າ ພວກເຂົາຈະຈັດການກັບທັງສອງປະເທດໂດຍໃຊ້ກອບທີ່ກໍານົດໄວ້ໃນຄໍາສັ່ງຝ່າຍບໍລິຫານສະບັບກ່ອນໜ້ານີ້ ຊຶ່ງກໍານົດພາສີ-ອາກອນສໍາລັບແຄນາດາ ແລະ ເມັກຊິໂກເປັນສ່ວນໜຶ່ງຂອງຄວາມພະຍາຍາມຂອງລັດຖະບານໃນການແກ້ໄຂບັນຫາເຟນທານິນ ແລະ ບັນຫາຊາຍແດນ.

 

ກ່ອນໜ້ານີ້ ເຂົາກໍານົດພາສີ-ອາກອນ ດັ່ງກ່າວໄວ້ທີ່ 25% ກ່ອນທີ່ຈະປະກາດຂໍ້ຍົກເວັ້ນແລະເລື່ອນກໍານົດໄປ.

 

ພາສີ-ອາກອນສໍາລັບການນໍາເຂົ້າລົດຍົນ 25%

 

ນອກຈາກນີ້, ປະທານາທິບໍດີທຣໍາຍັງປະກາດວ່າສະຫະລັດອາເມລິກາຈະຮຽກເກັບ “ພາສີ-ອາກອນ 25% ສໍາລັບລົດຍົນທີ່ຜະລິດໃນຕ່າງປະເທດທັງໝົດ” ໂດຍພາສີເຫຼົ່ານັ້ນຈະມີຜົນບັງຄັບໃຊ້ເກືອບຈະທັນທີ, ໃນກາງຄືນຂອງວັນທີ 3 ເມສາ ຕາມເວລາທ້ອງຖິ່ນ.

 

ບໍ່ມີຊື່ຣັດເຊຍ

ສິ່ງທີ່ໜ້າສົນໃຈຈາກການປະກາດພາສີຄັ້ງນີ້ຂອງທຣໍາຄື ບໍ່ມີການກໍານົດພາສີ-ອາກອນຕໍ່ຣັດເຊຍ ທັງທີ່ມີການຮຽກເກັບຈາກຢູເຄຣນ 10%.

ສະແດງຄຳຄິດເຫັນ