ເມື່ອວັນທີ 2 ເມສາ 2025 ທ່ານ ສະເລີມໄຊ ກົມມະສິດ ຮອງນາຍົກລັດຖະມົນຕີ ໄດ້ເຂົ້າຮ່ວມພິທີວາງສິລາລຶກ ໂຄງການກໍ່ສ້າງພະລັງງານຄວາມຮ້ອນຖ່ານຫີນ ເຊກອງ ຂອງກຸ່ມບໍລິສັດພອນສັກ ຈຳກັດ ທີ່ເມືອງ ກະລຶມ ແຂວງເຊກອງ

 

 

ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍເຈົ້າແຂວງເຊກອງ, ລັດຖະມົນຕີຊ່ວຍວ່າການກະຊວງບໍ່ແຮ່ແລະພະລັງງານແຫ່ງລາຊາອານາຈັກກຳປູເຈຍ ແລະ ລັດຖະມົນຕີຊ່ວຍກະຊວງ ໜ່ວຍງານຕ່າງໆ ເຂົ້າຮ່ວມ

 

ໃນພິທີ, ທ່ານ ພອນສັກ ວິໄລສັກ ປະທານກຸ່ມບໍລິສັດພອນສັກ ຈຳກັດໄດ້ລາຍງານວ່າ: ໂຄງການກໍ່ສ້າງໂຮງໄຟຟ້າຄວາມຮ້ອນພະລັງງານຖ່ານຫີນແຫ່ງນີ້ ມີກຳລັງການຜະລິດ 1800 ເມກະວັດ ປະກອບດ້ວຍ 6 ໂຮງໆລະ 300 ເມກະວັດ.

 

 

ມີເປົ້າໝາຍທີ່ຈະຂາຍໄຟຟ້າໃຫ້ກັບກຳປູເຈຍ ພາຍໃຕ້ສັນຍາຊື້-ຂາຍໄຟຟ້າ (PPA) ກັບລັດວິສາຫະກິດກຳປູເຈຍ.

 

ໂຄງການດັ່ງກ່າວມີມູນຄ່າກໍ່ສ້າງທັງໝົດ 4 ຕື້ ໂດລາສະຫະລັດ ໂດຍຈະເລີ່ມກໍ່ສ້າງຢ່າງເປັນທາງການໃນວັນທີ 1 ເມສາ 2025 ເຊິ່ງໂຮງໄຟຟ້າຖ່ານຫີນຫຼັງທຳອິດຈະເປີດດຳເນີນການຜະລິດໄຟຟ້າ ໃນເດືອນມັງກອນ 2028 ແລະຈະຜະລິດໄຟຟ້າເຕັມຮູບແບບທັງ 6 ໂຮງ ໃນເດືອນມັງກອນ 2030 ມີອາຍຸສຳປະທານ 30 ປີ (2030-2060) ເຊິ່ງຕ້ອງໃຊ້ຖ່ານຫີນເພື່ອຜະລິດພະລັງງານໄຟຟ້າປະມານ 10-11 ລ້ານໂຕນຕໍ່ປີ.

 

ນອກຈາກການກໍ່ສ້າງໂຮງຟ້າແລ້ວ ຍັງຈະມີການກໍ່ສ້າງສາຍສົ່ງໄຟຟ້າ 500 ກິໂລວັດ ຄວາມຍາວ 253 ກິໂລແມັດ ເຊື່ອມຕໍ່ຈາກໂຮງໄຟຟ້າໄປຍັງຊາຍແດນລາວ-ກຳປູເຈຍ ໂດຍບໍລິສັດພີເອສຈີເອສ (PSGS Thai) ຈະເປັນຜູ້ດຳເນີນການກໍ່ສ້າງໂຮງໄຟຟ້າ ແລະບໍລິສັດ CWPC ຈຳກັດຈະເປັນຜູ້ຮັບເໝົາການເຮັດສາຍສົ່ງໂຄງຂ່າຍໄຟຟ້າ.

 

 

ໂອກາດນີ້, ທ່ານເຈົ້າແຂວງໆເຊກອງ ກໍໄດ້ມີຄຳເຫັນຕໍ່ພິທີວ່າ: ໂຄງການໄຟຟ້າພະລັງງານຄວາມຮ້ອນຖ່ານຫີນແຫ່ງນີ້ ເປັນແຫ່ງທີ່ສອງ ຂອງ ສປປ ລາວ, ເປັນໂຄງການຂະໜາດໃຫຍ່ ເຊິ່ງຈະເປັນປັດໃຈພື້ນຖານໃຫ້ແກ່ການພັດທະນາອຸດສາຫະກໍາ, ດຶງດູດການລົງທຶນ, ປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມຂອງປະເທດ ໃຫ້ມີການຂະຫຍາຍຕົວຢ່າງໜັກແໜ້ນ, ເຂັ້ມແຂງ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.

 

ທ່ານເຈົ້າແຂວງເຊກອງ ຍັງໄດ້ສະເໜີພາກສ່ວນທີ່ກ່ຽວຂ້ອງແຂວງ ແລະ ເມືອງກະລຶມ ເອົາໃຈໃສ່ສ້າງເງື່ອນໄຂເອື້ອອໍານວຍຄວາມສະດວກໃຫ້ຜູ້ພັດທະນາໂຄງການ ສາມາດດໍາເນີນໂຄງການຕາມແຜນວຽກທີ່ກຳນົດໄວ້;

 

ປະສານສົມທົບກັບພາກສ່ວນກ່ຽວຂ້ອງຂັ້ນສູນກາງ ຕິດຕາມ, ກວດກາການຈັດຕັ້ງປະຕິບັດໂຄງການ ໃຫ້ມີຄວາມຄືບໜ້າ ແລະ ຮັບປະກັນຄຸນນະພາບ;

 

ເປັນເຈົ້າການຊຸກຍູ້-ສົ່ງເສີມປະຊາຊົນ, ຜູ້ປະກອບການປູກຝັງ-ລ້ຽງສັດເພື່ອເປັນສິນຄ້າສະໜອງໃຫ້ໂຄງການ ທັງເປັນການຫລຸດຜ່ອນການນໍາເຂົ້າສິນຄ້າ ຈາກພາຍນອກ;

 

ໃຫ້ຜູ້ພັດທະນາໂຄງການເອົາໃຈໃສ່ ຄຸ້ມຄອງພະນັກງານ-ກຳມະກອນຂອງຕົນ ເຄື່ອນໄຫວວຽກງານຖືກຕ້ອງຕາມລະບຽບ ແລະ ກົດໝາຍ ສປປ ລາວ ຢ່າງເຂັ້ມງວດ;

 

ສຸມທຶນຮອນ, ພາຫະນະ, ກົນຈັກ, ກໍາລັງແຮງ ແລະ ປະສົບປະການ ເພື່ອເຮັດໃຫ້ການກໍ່ສ້າງ ມີຄວາມຄືບໜ້າ, ຮັບປະກັນຄວາມປອດໄພ ແລະ ສໍາເລັດຕາມແຜນການທີ່ວາງໄວ້ ບົນພື້ນຖານການພັດທະນາໄປຄຽງຄູ່ກັບການປັບປຸງຊີວິດການເປັນຢູ່ຂອງປະຊາຊົນ ຜູ້ທີ່ໄດ້ຮັບຜົນກະທົບ ຢ່າງທັນການ ແລະ ທົ່ວເຖິງ.

 

 

ໃນໂອກາດດຽວກັນ, ທ່ານລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍໄດ້ມີຄຳເຫັນຕີລາຄາວ່າ: ການກໍ່ສ້າງໂຄງການນີ້ ເປັນການພັດທະນາອຸດສາຫະກໍາທີ່ສໍາຄັນ ແລະ ນອນຢູ່ໃນແຜນຍຸດທະສາດການພັດ ທະນາວຽກງານພະລັງງານ ແລະ ບໍ່ແຮ່ ຮອດປີ 2030, ເປັນໂຄງການໃຫຍ່ທີ່ມີການລົງທຶນສູງ, ນໍາໃຊ້ເຕັກ ນິກ-ເຕັກໂນໂລຊີທີ່ທັນສະໄໝ,

 

ພ້ອມທັງມີຄວາມເຊື່ອໝັ້ນວ່າ: ພາຍຫລັງກໍ່ສ້າງໂຄງການສຳເລັດ ຈະເປັນກາຍເປັນເງື່ອນໄຂທີ່ສໍາຄັນ ໃຫ້ແກ່ການພັດທະນາອຸດສາຫະກໍາພະລັງງານ, ປະກອບສ່ວນເຂົ້າໃນການພັດ ທະ ນາເສດຖະກິດ-ສັງຄົມຂອງ ສປປ ລາວ ໃນສະເພາະໜ້າ ແລະ ຍາວນານ, ສາມາດເຊື່ອມໂຍງພະລັງງານກັບປະເທດໃກ້ຄຽງໄດ້ຫລາຍຂຶ້ນ, ທັງເປັນການປະຕິບັດທິດທາງ ແລະ ຈຸດໝາຍ ”ຂຸດຄົ້ນທ່າແຮງບົ່ມຊ້ອນຂອງແຫລ່ງຊັບພະຍາກອນທໍາມະຊາດເພື່ອຜະລິດພະລັງງານສະອາດ, ມີສະຖຽນລະພາບ, ໝັ້ນຄົງ, ສາ ມາດສະໜອງກະແສໄຟຟ້າ ໃຫ້ພຽງພໍກັບຄວາມຕ້ອງການຊົມໃຊ້ຢູ່ພາຍໃນ ແລະ ມີການສົ່ງອອກ ໃຫ້ປາ ກົດຜົນເປັນຈິງ.

 

 

 

 

ສະແດງຄຳຄິດເຫັນ