ສານລັດຖະທຳມະນູນເກົາຫຼີໃຕ້ ຕັດສິນວ່າ ຖອດຖອນ ຢຸນ ຊັອກຢອລ ຈາກປະທານາທິບໍດີເກົາຫຼີໃຕ້ ກໍລະນີການປະກາດກົດໄອຍະການເສິກເມື່ອປາຍປີ 2024 ຈົນເຮັດໃຫ້ເກົາຫຼີໃຕ້ຈົມດິ່ງສູ່ວິກິດການທາງການເມືອງ

 

ຄຳພິຈາລະນາໂດຍສັງເຂບຂອງສານຯ ມີດັ່ງນີ້:

 

• ຢຸນ ບໍ່ໄດ້ດຳເນີນຕາມຂະບວນການທີ່ຖືກຕ້ອງ
• ຢຸນ ໃຊ້ອຳນາດປະກາດພາວະສຸກເສີນລະດັບປະເທດໂດຍບໍ່ຖືກຕ້ອງ
• ຢຸນ ສັ່ງໃຫ້ກອງທັບດຳເນີນການປະເຊີນໜ້າກັບຜູ້ທີ່ຕົນເອງມີໜ້າທີ່ຕ້ອງພິທັກຮັກສາ ຖືວ່າເປັນການເຮັດໜ້າທີ່ໂດຍບໍ່ຖືກຕ້ອງ
• ກົດໄອຍະການເສິກຂອງຢຸນ ທຳລາຍສິດທາງການເມືອງຂອງປະຊາຊົນ ແລະ ລະເມີດກົດໝາຍແລະປະຊາທິປະໄຕ

 

ຜົນຈາກສານລັດຖະທຳມະນູນມີມະຕິເອກະສັນຖອດຖອນ “ຢຸນ ຊັອກ ຢອລ” ຈາກປະທານາທິບໍດີ ປະກາດກົດໄອຍະການເສິກ ເຮັດໃຫ້ລາວພົ້ນອຳນາດທັນທີ ແລະ ເກົາຫຼີໃຕ້ຕ້ອງຈັດເລືອກຕັ້ງໃໝ່ໃນ 60 ວັນ

 

ການຖອດຖອນຢຸນ ເຮັດໃຫ້ລາວຖືເປັນປະທານາທິບໍດີຄົນທີ 2 ທີ່ຖືກຖອດຖອນ ຫຼັງຈາກປາຣ໌ກ ກຶນຮເຢ ໃນປີ 2016

 

ຄຳຕັດສິນນີ້ຖືກຈັບຕາຈາກປະຊາຊົນເກົາຫຼີໃຕ້ທັງປະເທດ ມີຜູ້ສະໜັບສະໜູນ ແລະ ຕໍ່ຕ້ານ ຢຸນ ຊັອກຢອລ ອອກມາຊຸມນຸມ ເພື່ອລໍຟັງຄຳຕັດສິນເທິງທ້ອງຖະໜົນເປັນຈຳນວນຫຼາຍ

 

ທີ່ມາຂອງການພິຈາລະນາຖອດຖອນ ຍ້ອນໄປ ເມື່ອເດືອນທັນວາປີທີ່ແລ້ວ ປະທານາທິບໍດີ ຢຸນ ຊອກຢອລ ຂອງເກົາຫຼີໃຕ້ ປະກາດປະກາດກົດໄອຍະການເສິກໂດຍບໍ່ແຈ້ງລ່ວງໜ້າ ໂດຍຖະແຫຼງຂ່າວກາງຄືນຜ່ານການຖ່າຍທອດສົດທາງໂທລະພາບ YTN ທົ່ວປະເທດ ໂດຍລະບຸວ່າ ມາດຕະການດັ່ງກ່າວມີຄວາມຈຳເປັນເພື່ອປົກປ້ອງເກົາຫຼີໃຕ້ຈາກໄພຂົ່ມຂູ່ຈາກກອງກຳລັງຄອມມິວນິສຂອງເກົາຫຼີເໜືອ ແລະ ເພື່ອກຳຈັດກຸ່ມຕໍ່ຕ້ານລັດ ດ້ວຍເຫດຜົນນີ້ ລາວຈຶ່ງປະກາດກົດໄອຍະການເສິກສຸກເສີນ

 

ເຮັດໃຫ້ສະມາຊິກລັດຖະສະພາແຫ່ງຊາດຂອງເກົາຫຼີໃຕ້ ເຊິ່ງມາລວມຕົວກັນໄດ້ 190 ຄົນ ຈາກ 300 ຄົນ ລົງມະຕິດ້ວຍຄະແນນສຽງ 190 ຕໍ່ 0 ຄັດຄ້ານກົດໄອຍະການເສິກ ແລະ ຮຽກຮ້ອງໃຫ້ປະທານາທິບໍດີຍົກເລີກຄຳສັ່ງ

 

ຕາມລັດຖະທຳມະນູນຂອງເກົາຫຼີໃຕ້ ເມື່ອສຽງສ່ວນໃຫຍ່ໃນສະພາຮຽກຮ້ອງໃຫ້ຍົກເລີກກົດໄອຍະການເສິກ ປະທານາທິບໍດີກໍຕ້ອງປະຕິບັດຕາມ ບໍ່ສະນັ້ນອາດຕ້ອງປະເຊີນກັບການຟ້ອງຮ້ອງຖອດຖອນ

 

ຕໍ່ມາ ປະທານາທິບໍດີຢຸນ ກໍຍອມຍົກເລີກກົດໄອຍະການເສິກ ແລະ ຖືກຟ້ອງຮ້ອງ ແລະ ອອກໝາຍຈັບ ຕໍ່ການປະກາດກົດໄອຍະການເສິກດັ່ງກ່າວ

ສະແດງຄຳຄິດເຫັນ