ຜູ້ປະທ້ວງຫຼາຍພັນຄົນຮວມຕົວກັນໃນນະຄອນວໍຊິງຕັນ ດີ.ຊີ. ແລະ ເມືອງຕ່າງໆທົ່ວສະຫະລັດອາເມລິກາໃນວັນເສົາທີ່ຜ່ານມາ (5 ເມສາ) ໂດຍເປັນສ່ວນໜຶ່ງຂອງການປະທ້ວງກວ່າ 1,200 ຄັ້ງ ທີ່ຄາດວ່າຈະເປັນການປະທ້ວງໃນໜຶ່ງວັນທີ່ໃຫຍ່ທີ່ສຸດຕໍ່ຕ້ານປະທານາທິບໍດີໂດນັລ ທຣໍາ ແລະ ເພື່ອນຮ່ວມອຸດົມການຢ່າງ ອີລອນ ມັສກ໌ ນັບຕັ້ງແຕ່ພວກເຂົາເລີ່ມດຳເນີນການຢ່າງວ່ອງໄວເພື່ອປະຕິຮູບລັດຖະບານ ແລະ ຂະຫຍາຍອຳນາດຂອງປະທານາທິບໍດີ.

 

 

ຜູ້ປະທ້ວງຈຳນວນຫຼາຍຫຼັ່ງໄຫຼມາຍັງພື້ນທີ່ຫຍ້າທີ່ລ້ອມຮອບອະນຸສາວະລີວໍຊິງຕັນພາຍໃຕ້ທ້ອງຟ້າທີ່ມືດຄຶ້ມ ແລະ ຝົນຕົກ.

 

ຜູ້ຈັດງານກ່າວກັບສຳນັກຂ່າວຮອຍເຕີສວ່າຄາດວ່າຈະມີຜູ້ເຂົ້າຮ່ວມການຊຸມນຸມທີ່ມອນແຫ່ງຊາດຫຼາຍກວ່າ 20,000 ຄົນ ໂດຍຜູ້ຄົນຮອບໆອະນຸສາວະລີເລີ່ມຮວມຕົວກັນຫຼາຍຂຶ້ນຕະຫຼອດໝົດມື້. ບາງຄົນຖືທຸງຢູເຄຣນ, ບາງຄົນສວມຜ້າຄຸມຄາຟິຢະຫ໌ຂອງປາເລສໄຕນ໌ ແລະ ຖືປ້າຍ ‘Free Palestine’ ໃນຂະນະທີ່ສະມາຊິກພັກເດໂມແຄຣດຈາກສະພາຜູ້ແທນລາສະດອນສະຫະລັດອາເມລິກາ ວິຈານນະໂຍບາຍຂອງທຣໍາເທິງເວທີ.

 

ກຸ່ມນັກກິດຈະກຳປະມານ 150 ກຸ່ມໄດ້ລົງທະບຽນເຂົ້າຮ່ວມການປະທ້ວງ ຕາມຂໍ້ມູນຈາກເວັບໄຊຂອງງານ.

 

ການປະທ້ວງຈັດຂຶ້ນໃນ 50 ລັດທົ່ວສະຫະລັດອາເມລິກາ, ລວມເຖິງໃນແຄນາດາ ແລະ ເມັກຊິໂກ.

 

ຫຼາຍຊົ່ວໂມງກ່ອນທີ່ການປະທ້ວງໃນສະຫະລັດອາເມລິກາຈະເລີ່ມຂຶ້ນ, ຊາວອາເມລິກັນທີ່ຕໍ່ຕ້ານທຣໍາຫຼາຍຮ້ອຍຄົນໃນຢູໂຣບໄດ້ຮ່ວມການປະທ້ວງເພື່ອຕໍ່ຕ້ານຜູ້ນຳສະຫະລັດອາເມລິກາ.

 

ນອກເໜືອຈາກໃນນະຄອນປາຣີຂອງຝຣັ່ງແລ້ວ, ຍັງຈັດຂຶ້ນໃນນະຄອນເບີລິນ ແລະ ນະຄອນແຟຣງເຟີດຂອງເຢຍລະມັນ, ນະຄອນລິສບອນຂອງໂປຕຸເກດ ແລະ ນະຄອນລອນດອນຂອງອັງກິດ.

 

ການຊຸມນຸມປະທ້ວງຍັງມີແຜນຈັດຂຶ້ນໃນແຄນາດາ ແລະ ເມັກຊິໂກອີກດ້ວຍ ເພື່ອແສດງການຄັດຄ້ານການປ່ຽນໂສມນະໂຍບາຍຕ່າງປະເທດ ແລະ ພາຍໃນປະເທດຂອງສະຫະລັດອາເມລິກາຂອງປະທານາທິບໍດີທຣໍາ.

 

ດ້ານປະທານາທິບໍດີໂດນັລ ທຣໍາຂອງສະຫະລັດອາເມລິກາ ໂພສຂໍ້ຄວາມໃນສື່ສັງຄົມອອນໄລນ໌ທຣູທ ໂຊຊຽລ, ລະບຸໃຫ້ປະຊາຊົນຢືນຢັດຕໍ່ສູ້ເຜີຊິນບັນຫາວຸ້ນວາຍທາງເສດຖະກິດທີ່ເກີດຈາກມາດຕະການທາງພາສີ-ອາກອນຕອບໂຕ້ທີ່ເຂົາປະກາດອອກມາເມື່ອຊ່ວງຕົ້ນອາທິດ, ພ້ອມກັບໃຫ້ຄຳສັນຍາວ່າຈະເກີດຜົນລັບຄັ້ງປະຫວັດສາດຈາກສິ່ງທີ່ລາວເອີ້ນວ່າ ການປະຕິວັດທາງເສດຖະກິດ.

 

ການອອກມາໃຫ້ຄຳໝັ້ນຂອງທຣໍາມີຂຶ້ນຫຼັງເກີດຄວາມປັ່ນປ່ວນໃນຕະຫຼາດການເງິນໂລກ ຫຼັງລາວປະກາດມາດຕະການພາສີ-ອາກອນຕອບໂຕ້, ຂະນະທີ່ຂີດລະດັບຄວາມກົວຂອງຕະຫຼາດຮຸ້ນວໍລ໌ ສະຕຣີດ ຂຶ້ນໄປຢູ່ລະດັບສູງທີ່ສຸດໃນຮອບ 5 ປີ.

 

ສ່ວນບັນດາຜູ້ບໍລິຫານດ້ານການເງິນຕ່າງແສດງຄວາມຕົກໃຈ ແລະ ເປັນຫ່ວງເລື່ອງການເຕີບໂຕທາງເສດຖະກິດ.

 

ມາດຕະການທາງພາສີສິນຄ້ານຳເຂົ້າຂອງທຣໍາຍັງເຮັດໃຫ້ມູນຄ່າຕະຫຼາດຮຸ້ນຫາຍໄປເປັນລ້ານລ້ານໂດລາ ເມື່ອນັກລົງທຶນບອກວ່າຮູ້ສຶກຍ້ານເລື່ອງຄວາມສ່ຽງທີ່ຈະເກີດພາວະຖົດຖອຍທາງເສດຖະກິດ.

ສະແດງຄຳຄິດເຫັນ