ມີລາຍງານເບີລິນກໍາລັງຢູ່ລະຫວ່າງການພິຈາລະນາທີ່ຈະເຄື່ອນຍ້າຍທອງຄໍາແທ່ງຈໍານວນມະຫາສານທີ່ຝາກໄວ້ໃນນິວຢອກຫຼັງວິຕົກຢ່າງໜັກເຖິງນະໂຍບາຍທີ່ບໍ່ສາມາດຄາດເດົາໄດ້ຂອງຜູ້ນໍາອາເມລິກັນຄົນໃໝ່

ເດລີເທເລກຣາຟຂອງອັງກິດລາຍງານວັນສຸກ 4 ເມສາ ວ່າ ໜັງສືພິມເຢຍລະມັນບິລດ໌ (Bild) ອອກມາເປີດເຜີຍວ່າ ລະດັບສູງໃນພັກຄຣິສເຕຍນເດໂມແຄຣດຢູເນຍນ CDU ທີ່ມີກໍານົດຈະເປັນລັດຖະບານເບີລິນຊຸດທີ່ກໍາລັງຈະເຂົ້າບໍລິຫານ ມີຂ່າວຫາລືການເຄື່ອນຍ້າຍທອງຄໍາແທ່ງຈໍານວນມະຫາສານຂອງເຢຍລະມັນທີ່ຝາກໄວ້ໃນຕູ້ເຊັບໃຕ້ດິນຂອງທະນາຄານກາງສະຫະລັດອາເມລິກາ ຫຼື ເຟດທີ່ແມນແຮັດຕັນກັບມາເກັບໃນປະເທດແທນ.

ເກີດຂຶ້ນຈາກຄວາມວິຕົກກັງວົນ ຕໍ່ພຶດຕິກໍາປະທານາທິບໍດີອາເມລິກັນຄົນໃໝ່ ໂດນັລດ໌ ທຣໍາ ທີ່ສ້າງຄວາມປັ່ນປ່ວນໄປທົ່ວໂລກ ແລະ ສະຫະລັດອາເມລິກາ.

ພາຍໃຕ້ລັດຖະບານທຣໍາກາຍເປັນຄວາມບໍ່ແນ່ນອນພາຍໃນເຫຼົ່າຊາດພັນທະມິດທັງຫຼາຍ, ຕັ້ງແຕ່ໃຊ້ວາທະຣັດເຊຍເລັ່ນງານນາໂຕ ແລະ ບໍ່ເຊື້ອເຊີນຢູໂຣບຕາເວັນຕົກເຂົ້າຮ່ວມໃນແຜນສັນຕິພາບຢູເຄຣນ.

ແຊັດພາຍໃນທີ່ເປີດເຜີຍອອກມາໂດຍນັກຂ່າວແອັດແລນຕິກຍັງສະແດງໃຫ້ເຫັນວ່າ ຮອງປະທານາທິບໍດີສະຫະລັດອາເມລິກາ ຈາກລັດໂອໄຮໂອ ເຈດີ ແວນຊ໌ ເປັນປະຕິປັກກັບຢູໂຣບ ແລະ ຫຼ້າສຸດທຣໍາຍັງຖິ້ມລະເບີດໂດຍການປະກາດຮຽກເກັບພາສີທຸກປະເທດທົ່ວໂລກ, ສະຫະພາບຢູໂຣບ EU ຖືກເກັບອັດຕາ 20% ທ່າມກາງຂ່າວຜູ້ນໍາອາເມລິກັນຄົນໃໝ່ຕິດຕໍ່ກັບປູຕິນຕະຫຼອດຫຼາຍຄັ້ງ ຂັດທໍາມະນຽມປະຕິບັດຊາດປີກໂລກເສລີທັງຫຼາຍ.

ແລະ ຫຼ້າສຸດພາຍໃນອາເມລິກາເກີດຄວາມວຸ້ນວາຍ, ປະຊາຊົນອາເມລິກັນປະທ້ວງໃຫຍ່ຕາມເມືອງຕ່າງໆທົ່ວສະຫະລັດອາເມລິກາວັນເສົາ 5 ເມສາ ບໍ່ອົດທົນກັບນະໂຍບາຍທຣໍາຫຼ້າສຸດໃຊ້ມາດຕະການພາສີທີ່ຈະກະທົບຕໍ່ຊີວິດຄວາມເປັນຢູ່ປະຊາຊົນໃນອາເມລິກາ,

ກ່ອນໜ້າໄຂ່ແພງທຣໍາຍັງສັ່ງຍຸບໜ່ວຍງານລັດ ເຮັດເຈົ້າໜ້າທີ່ລັດຕົກງານມະຫາສານ, ລາຄາໄຂ່ແພງຂຶ້ນ, ເນລະເທດຄັ້ງໃຫຍ່ລະເມີດອໍານາດຄໍາສັ່ງສານ, ປິດປາກການປະທ້ວງພາຍໃນມະຫາວິທະຍາໄລຊັ້ນນໍາ, ຊາດຕ່າງໆໃນຢູໂຣບອອກຄໍາເຕືອນພົນລະເມືອງເດີນທາງມາສະຫະລັດອາເມລິກາມີສິດຖືກສົ່ງຕົວກັບ, ເປັນຕົ້ນ.

ເດລີເທເລກຣາຟລາຍງານວ່າ ເປັນເວລານານຫຼາຍສິບປີທີ່ເຢຍລະມັນໄດ້ເກັບທອງຄໍາແທ່ງຈໍານວນ 1,200 ໂຕນ ຊຶ່ງເປັນກອງທຶນສໍາຮອງປະເທດ ແລະ ມີຈໍານວນຫຼາຍທີ່ສຸດເປັນອັນດັບ 2 ຮອງຈາກສະຫະລັດອາເມລິກາ.

ໂດຍທອງຄໍາແທ່ງເຫຼົ່ານີ້ເກັບໄວ້ໃນຫ້ອງນິລະໄພໃຕ້ດິນລັບສຸດຍອດຂອງທະນາຄານກາງສະຫະລັດອາເມລິກາ ຫຼື ເຟດ ທີ່ແມນແຮັດຕັນ.

ມາໂກ ວັນເດີວິດ (Marco Wanderwitz) ອະດີດລັດຖະມົນຕີເຢຍລະມັນພັກ CDU ໄດ້ເປີດເຜີຍກັບໜັງສືພິມບິລດ໌ວ່າ “ແນ່ນອນທີ່ສຸດ, ຄໍາຖາມເກີດຂຶ້ນມາ”.

ມາໂກ ວັນເດີວິດ (Marco Wanderwitz)

ວັນເດີວິດ ນັ້ນສະໜັບສະໜູນມາຢ່າງຍາວນານທີ່ຈະເປີດໂອກາດໃຫ້ເຈົ້າໜ້າທີ່ເຢຍລະມັນສາມາດກວດສອບທອງຄໍາແທ່ງເຫຼົ່ານີ້ຢ່າງສະໝໍ່າສະເໝີ ຫຼື ສາມາດຖອນອອກໄປໄດ້ທັງໝົດ.

ພົບວ່າກ່ອນໜ້າລາວເຄີຍພະຍາຍາມມາລັອບບີ້ເພື່ອເດີນທາງໄປຍັງຫ້ອງນິລະໄພໃຕ້ດິນຂອງເຟດສະຫະລັດອາເມລິກາ ແລະ ກວດສອບທອງຄໍາແທ່ງເຫຼົ່ານີ້ດ້ວຍຕົວເອງ, ແຕ່ເປັນທີ່ໜ້າເສຍດາຍວ່າຄໍາຂໍຂອງລາວຖືກປະຕິເສດໃນປີ 2012.

ເຢຍລະມັນກັບມາຮຸ່ງເຮືອງຫຼັງສົງຄາມໂລກຄັ້ງທີ 2 ສິ້ນສຸດເມື່ອການສົ່ງອອກຮຸ່ງເຮືອງສົ່ງຜົນເຮັດໃຫ້ເບີລິນມີການເກີນດຸນທາງການຄ້າຢ່າງມະຫາສານ ແລະ ເຮັດໃຫ້ການເກີນດຸນທາງການຄ້າກາຍເປັນທອງຄໍາແທ່ງສໍາລັບທຶນສໍາຮອງປະເທດພາຍໃຕ້ລະບົບເບຣດຕັນ ວູດສ໌ (Bretton Woods system).

ຂະນະທີ່ສະມາຊິກລັດຖະສະພາຢູໂຣບຈາກພັກ CDU ຂອງເຢຍລະມັນ, ມາກັສ ເຟີເບີ (Markus Ferber) ເປັນອີກຄົນຈາກພັກ CDC ທີ່ສະແດງຄວາມເຫັນວ່າ ເຈົ້າໜ້າທີ່ເຢຍລະມັນສົມຄວນໄດ້ຮັບອະນຸຍາດໃຫ້ເຂົ້າໄປກວດສອບທອງຄໍາແທ່ງຂອງຕົວເອງໄດ້.

ມາກັສ ເຟີເບີ (Markus Ferber)

“ລາວຮຽກຮ້ອງໃຫ້ມີການກວດສອບທອງຄໍາສໍາຮອງຂອງເຢຍລະມັນຢ່າງສະໝໍ່າສະເໝີ, ເຈົ້າໜ້າທີ່ຕົວແທນຈາກທະນາຄານກາງເຢຍລະມັນ Bundesbank ຕ້ອງເປັນຄົນໄປນັບທອງຄໍາແທ່ງເຫຼົ່ານັ້ນດ້ວຍຕົວເອງ ແລະ ບັນທຶກຜົນການກວດນັບ”.

ເດລີເທເລກຣາຟລາຍງານວ່າ ນັກການເມືອງທັງສອງຕ່າງໃຫ້ສໍາພາດກັບໜັງສືພິມບິລດ໌ກ່ອນປະທານາທິບໍດີທຣໍາຈະປະກາດຮຽກເກັບພາສີນໍາເຂົ້າດິນແດນສະຫະລັດອາເມລິກາຈາກທົ່ວໂລກ.

ທັງນີ້ມີການຄາດການວ່າ ທຶນສໍາຮອງເຢຍລະມັນທີ່ຝາກໄວ້ໃນຫ້ອງນິລະໄພໃຕ້ດິນໃນສະຫະລັດອາເມລິກາມີມູນຄ່າລວມກັນ 113 ພັນລ້ານຢູໂຣ ແລະ ຄິດເປັນ 30% ຂອງທອງຄໍາສໍາຮອງທົ່ວໂລກ.

ໄມເຄິນ ເຢເກີ (Michael Jäger) ສະມາຊິກສະມາພັນຜູ້ເສຍພາສີຢູໂຣບ (Taxpayers Association of Europe) ສະແດງຄວາມເຫັນເຊັ່ນກັນວ່າ: ຈະເປັນການດີກວ່າສໍາລັບເມືອງເບຍໃນການນໍາທອງຄໍາແທ່ງທຶນສໍາຮອງທັງໝົດຂອງເຢຍລະມັນມາເກັບໄວ້ໃນແຟຣງເຟີດ ຫຼື ຢ່າງໜ້ອຍຄວນເກັບໄວ້ທີ່ຢູໂຣບໂດຍເລັ່ງດ່ວນທີ່ສຸດເທົ່າທີ່ຈະເລັ່ງໄດ້.

ສະແດງຄຳຄິດເຫັນ