ນັກວິໄຈເລີ່ມພົບຫຼັກຖານຫຼາຍຂຶ້ນເລື້ອຍໆ ກ່ຽວກັບຜົນຈາກການດື່ມນ້ຳອັດລົມແບບໄດເອັດ ທີ່ມັກໃຊ້ສານໃຫ້ຄວາມຫວານແທນນ້ຳຕານ ກັບປະສິດທິພາບໃນການຫຼຸດນ້ຳໜັກ, ຫຼັງຈາກທີ່ກ່ອນໜ້ານີ້ ອົງການອະນາໄມໂລກໄດ້ອອກຄຳເຕືອນກ່ຽວກັບແອສປາແຕມ ຊຶ່ງເປັນສານໃຫ້ຄວາມຫວານທົດແທນນ້ຳຕານຊະນິດໜຶ່ງ ວ່າອາດກໍ່ມະເຮັງໃນມະນຸດ.

ການສຶກສາໃໝ່ຫຼ້າສຸດ ສຶກສາການບໍລິໂພກສານໃຫ້ຄວາມຫວານທຽມອີກປະເພດ ທີ່ຊື່ວ່າ “ຊູຄຣາໂລສ” ໃນປະລິມານທີ່ຫຼາຍເກີນໄປ.

ແທນທີ່ສະໝອງຈະສົ່ງສັນຍານໃຫ້ກິນໜ້ອຍລົງ, ຊູຄຣາໂລສກັບກະຕຸ້ນໃຫ້ເກີດຄວາມຢາກອາຫານເພີ່ມຂຶ້ນ ຊຶ່ງບໍ່ເປັນຜົນດີຕໍ່ການຄວບຄຸມນ້ຳໜັກໃນໄລຍະຍາວ.

ຊູຄຣາໂລສ ໃນນ້ຳອັດລົມແບບໄດເອັດ

ຊູຄຣາໂລສ ເປັນສານທີ່ໃຫ້ຄວາມຫວານແທນນ້ຳຕານທີ່ມີລົດຊາດຄ້າຍນ້ຳຕານຫຼາຍທີ່ສຸດ ແຕ່ມີຄວາມຫວານສູງຫຼາຍ, ຫວານກວ່ານ້ຳຕານປົກກະຕິທົ່ວໄປເຖິງ 600 ເທົ່າ.

ເມື່ອທຽບລະດັບຄວາມຫວານດຽວກັນກັບນ້ຳຕານຈຶ່ງມີລາຄາທີ່ຕ່ຳກວ່າ, ສາມາດໃຊ້ຫຼຸດຕົ້ນທຶນຜະລິດຕະພັນໄດ້, ອີກທັງຍັງມີລົດຊາດທີ່ຄ້າຍຄືກັບນ້ຳຕານຊາຍ, ເຮັດໃຫ້ຜູ້ບໍລິໂພກມີຄວາມຄຸ້ນເຄີຍຫຼາຍກວ່າ.

ຊູຄຣາໂລສ ສາມາດພົບໄດ້ໃນເຄື່ອງດື່ມທີ່ໂຄສະນາວ່ານ້ຳຕານ 0 ເປີເຊັນ ຫຼື ເຄື່ອງດື່ມນ້ຳອັດລົມປະເພດໄດເອັດ ທີ່ມັກໂຄສະນາວ່າແຄລໍລີຕ່ຳ ເໝາະສຳລັບຄົນທີ່ຕ້ອງການຫຼຸດນ້ຳໜັກ.

ນັກວິໄຈກ່າວວ່າ ຜູ້ທີ່ດື່ມນ້ຳທີ່ມີສ່ວນປະສົມຂອງຊູຄຣາໂລສ ພົບວ່າ ຈະມີຄວາມຢາກອາຫານເພີ່ມຂຶ້ນເກືອບ 20% ເມື່ອທຽບກັບການດື່ມນ້ຳທີ່ມີນ້ຳຕານຊາຍ.

ເຖິງສານໃຫ້ຄວາມຫວານທີ່ມີແຄລໍລີຕ່ຳ ຫຼື ບໍ່ມີແຄລໍລີ ເຊັ່ນ: ຊູຄຣາໂລສ ໄດ້ຮັບການແນະນຳໂດຍຜູ້ຊ່ຽວຊານດ້ານການດູແລສຸຂະພາບ, ຜູ້ຊ່ຽວຊານດ້ານຄວາມປອດໄພຂອງອາຫານ ແລະ ອົງກອນສຸຂະພາບທີ່ໜ້າເຊື່ອຖື ສຳລັບການຈັດການໂລກເບົາຫວານ ແລະ ນ້ຳໜັກ ໂດຍອີງຈາກງານວິໄຈທາງວິທະຍາສາດທີ່ເຊື່ອຖືໄດ້, ແຕ່ການບໍລິໂພກຕໍ່ເນື່ອງ ແລະ ໃນປະລິມານຫຼາຍເກີນໄປ ບໍ່ສົ່ງຜົນດີຕໍ່ສຸຂະພາບໃນໄລຍະຍາວ, ຍິ່ງກັບຄົນທີ່ຕ້ອງຄວບຄຸມນ້ຳໜັກ.

ງານວິໄຈຄົ້ນພົບຫຍັງ

ການສຶກສາໃໝ່ຊຶ່ງຕີພິມເມື່ອວັນພຸດໃນວາລະສານ Nature Metabolism ໄດ້ຂໍໃຫ້ຜູ້ເຂົ້າຮ່ວມ 75 ຄົນບໍລິໂພກເຄື່ອງດື່ມແຕກຕ່າງກັນ 3 ປະເພດ ໄດ້ແກ່: ນ້ຳດື່ມ, ນ້ຳທີ່ໃສ່ນ້ຳຕານຊາຍ (ຊູໂຄຣສ) ແລະ ນ້ຳທີ່ໃສ່ຊູຄຣາໂລສ.

ນັກວິໄຈພົບວ່າ ຄວາມແຕກຕ່າງຂອງປະເພດສານໃຫ້ຄວາມຫວານໃນເຄື່ອງດື່ມ ສົ່ງຜົນຕໍ່ສະໝອງຕ່າງກັນ ໂດຍເຄື່ອງດື່ມທີ່ມີຊູຄຣາໂລສເພີ່ມຄວາມຮູ້ສຶກຫິວຂຶ້ນປະມານ 17% ແລະ ສົ່ງຜົນຕໍ່ສະໝອງທີ່ມີຜົນຕໍ່ການຕັດສິນໃຈ.

ການທົດສອບເລືອດສະແດງໃຫ້ເຫັນວ່າຊູຄຣາໂລສບໍ່ມີຜົນຕໍ່ຮໍໂມນທີ່ສະໝອງໃຊ້ບອກເມື່ອເຮົາຮູ້ສຶກອີ່ມ ແລະ ບໍ່ຫິວອີກຕໍ່ໄປ.

ຫຼື ເວົ້າງ່າຍວ່າ ຊູຄຣາໂລສ ບໍ່ຕອບສະໜອງຕໍ່ຮໍໂມນທີ່ສັ່ງໃຫ້ເຮົາຮູ້ສຶກອີ່ມ ຈຶ່ງມີໂອກາດທີ່ເຮົາຈະກິນອາຫານໄດ້ຫຼາຍຂຶ້ນ.

ແລ້ວແນວທາງທີ່ດີຕໍ່ສຸຂະພາບ ຄືຫຍັງ?

ນັກວິໄຈແນະນຳວ່າ ເຊັ່ນດຽວກັນກັບທີ່ຫຼາຍຄົນໄດ້ຫຼຸດການໃຊ້ເກືອ, ກໍສາມາດຫຼຸດການໃຊ້ສານໃຫ້ຄວາມຫວານໄດ້, ຊຶ່ງເປັນໜຶ່ງໃນການຝຶກຕ່ອມຮັບລົດໃຫ້ຕ້ອງການຄວາມຫວານໜ້ອຍລົງ.

ຕ່ອມຮັບລົດຈະຕອບສະໜອງໂດຍພົບວ່າອາຫານລົດຫວານທີ່ເຄີຍແຊບກັບກາຍເປັນຫວານຈົນລ້ຽນ, ຫຼືໃນກໍລະນີຂອງໂຊດຽມ ຈະຮູ້ສຶກວ່າເຄັມເກີນໄປ.

ເລືອກຜະລິດຕະພັນທີ່ບໍ່ມີສານໃຫ້ຄວາມຫວານ ເປັນໄປໄດ້ທີ່ຈະຫຼຸດການບໍລິໂພກນ້ຳຕານ ຫຼື ສານໃຫ້ຄວາມຫວານປະຈຳວັນລົງ.

ສະແດງຄຳຄິດເຫັນ