ເຮລິຄອບເຕີພະຍາບານຂອງຍີ່ປຸ່ນຕົກໃນທະເລທາງຕາເວັນຕົກສຽງໃຕ້ຂອງປະເທດ ເຮັດໃຫ້ມີຜູ້ເສຍຊີວິດ 3 ສົບ ຄົນໄຂ້ທີ່ເດີນທາງໄປນຳກໍບໍ່ລອດຊີວິດ

 

ສຳນັກຂ່າວຕ່າງປະເທດລາຍງານວ່າ ເຮລິຄອບເຕີຂົນສົ່ງທາງການແພດລຳໜຶ່ງ ເຊິ່ງກຳລັງພາຄົນເຈັບ 1 ຄົນໄປໂຮງໝໍ ຕົກໃນທະເລທາງຕາເວັນຕົກສຽງໃຕ້ຂອງປະເທດຍີ່ປຸ່ນ ເມື່ອວັນອາທິດທີ 6 ເມສາ 2025 ທີ່ຜ່ານມາ ສົ່ງຜົນໃຫ້ຜູ້ທີ່ຢູ່ເທິງເຄື່ອງເສຍຊີວິດ 3 ສົບ ຂະນະທີ່ອີກ 3 ຄົນໄດ້ຮັບຄວາມຊ່ວຍເຫຼືອ

 

 

ໜ່ວຍຍາມຝັ່ງສົ່ງເຄື່ອງບິນ 2 ລຳກັບເຮືອອີກ 3 ລຳອອກປະຕິບັດພາລະກິດຄົ້ນຫາ ແລະ ສາມາດຊ່ວຍເຫຼືອ ທ່ານຮິໂຣຊິ ຮາມາດະ ນັກບິນອາຍຸ 66 ປີ, ທ່ານຄາຊຸໂຕະ ໂນຊິທາເກະ ຊ່າງເຄື່ອງ ແລະ ນ.ສ.ຊາກຸລະ ຄຸນິທາເກະ ພະຍາບານຍິງໄວ 28 ປີ ໄດ້ສຳເລັດໃນຊ່ວງເຊົ້າຂອງວັນເກີດເຫດ

 

ພວກເຂົາຖືກພົບລອຍ ຢູ່ໃນທະເລໂດຍເກາະອຸປະກອນຊູຊີບລອຍນ້ຳເອົາໄວ້ ໃກ້ກັບເຮລິຄອບເຕີທີ່ຈົມຢູ່ໃຕ້ຜິວທະເລ ທັງ 3 ຄົນຢູ່ໃນພາວະອຸນຫະພູມຮ່າງກາຍຫຼຸດຕ່ຳ ແຕ່ຍັງມີສະຕິ

 

(ພາບຈາກ AP / THE 7TH REGIONAL JAPAN COAST GUARD HEADQUARTERS)

 

ຫຼັງຈາກນັ້ນ ເຈົ້າໜ້າທີ່ຈຶ່ງສາມາດເກັບກູ້ຮ່າງຂອງທ່ານເຄອິ ອາລາຄາວະ ແພດໄວ 34 ປີ, ນ.ສ.ມິຕຊຶກິ ໂມໂຕອິຊິ ຄົນໄຂ້ອາຍຸ 86 ປີ ແລະ ທ່ານຄາຊຸໂຢຊິ ໂມໂຕອິຊິ ໄວ 68 ປີ ຜູ້ດູແລຄົນໄຂ້ລາຍນີ້ ໂດຍຫົວໃຈຂອງພວກລາວຢຸດເຕັ້ນ ແລະ ໄດ້ຮັບການຢືນຢັນວ່າເສຍຊີວິດແລ້ວໃນເວລາຕໍ່ມາ

 

ທັງນີ້ ຕາມການເປີດເຜີຍຂອງສື່ຍີ່ປຸ່ນ ເຮລິຄອບເຕີພະຍາບານລຳນີ້ກຳລັງເດີນທາງຈາກສະໜາມບິນສຶຊິມະ ໃນຈັງຫວັດນາງາຊາກິ ໄປຍັງໂຮງໝໍໃນເມືອງຟຸກຸໂອກະ ກ່ອນຈະຕົກໃນທະເລ ໂດຍສາເຫດທີ່ເຮັດເຄື່ອງຕົກກຳລັງຢູ່ລະຫວ່າງການສືບສວນ

ສະແດງຄຳຄິດເຫັນ