ປະທານາທິບໍດີ ໂດນັລດ໌ ທຣຳ ແຫ່ງສະຫະລັດຯ ລະບຸວານນີ້ (8 ເມສາ) ວ່າ ຕົນໄດ້ແຈ້ງໄປຍັງບໍລິສັດ ໄຕ້ຫວັນ ເຊມິຄອນດັກເຕີ ແມນູແຟກເຈີຣິງ ຄອມພະນີ (TSMC) ແລ້ວວ່າ ພວກເຂົາອາດຖືກເກັບພາສີສຸນສູງສຸດເຖິງ 100% ຫາກບໍ່ເຂົ້າໄປຕັ້ງໂຮງງານຜະລິດຊິບໃນສະຫະລັດຯ ຊຶ່ງທາງ TSMC ເອງກໍຮັບປາກແລ້ວວ່າຈະເຮັດ

ລະຫວ່າງກ່າວປາຖະກະຖາໃນອີເວັນຊຶ່ງຈັດໂດຍຄະນະກຳມະການແຫ່ງຊາດຂອງພັກຣີພັບລິກັນ, ທຣຳ ໄດ້ວິພາກວິຈານລັດຖະບານອະດີດປະທານາທິບໍດີ ໂຈ ໄບເດັນ ວ່າໄປໃຫ້ງົບອຸດໜູນ TSMC ເຖິງ 6,600 ລ້ານໂດລາ ເພື່ອໃຫ້ຕັ້ງໂຮງງານຜະລິດເຊມິຄອນດັກເຕີທີ່ເມືອງຟີນິກຊ໌ ລັດແອຣິໂຊນາ ໂດຍ ທຣຳ ຊີ້ວ່າການຈ່າຍເງິນໃຫ້ກັບບໍລິສັດເຊມິຄອນດັກເຕີເຫຼົ່ານີ້ “ບໍ່ຈຳເປັນ”

“ກັບ TSMC ຂ້ອຍບໍ່ໃຫ້ເງິນພວກເຂົາຈັກໂດລາ ຂ້ອຍກໍພຽງບອກວ່າ ຖ້າພວກເຈົ້າບໍ່ມາຕັ້ງໂຮງງານທີ່ນີ້ ເຈົ້າຈະຕ້ອງຈ່າຍພາສີມະຫາສານ” ທຣຳ ກ່າວ

ຫຼ້າສຸດທາງ TSMC ເອງຍັງບໍ່ອອກມາສະແດງຄວາມຄິດເຫັນໃນເລື່ອງນີ້

ເມື່ອເດືອນ ມີນາ ທີ່ຜ່ານມາ TSMC ຊຶ່ງເປັນຜູ້ຜະລິດຊິບລາຍໃຫຍ່ທີ່ສຸດໃນໂລກໄດ້ແຖລງທີ່ທຳນຽບຂາວວ່າ ບໍລິສັດມີແຜນຈະລົງທຶນໃນສະຫະລັດຯ ເພີ່ມອີກ 100,000 ລ້ານໂດລາ ເພື່ອສ້າງໂຮງງານຊິບອີກ 5 ແຫ່ງພາຍໃນບໍ່ເທົ່າໃດປີຂ້າງໜ້ານີ້

ຣອຍເຕີລາຍງານເມື່ອວັນອັງຄານ (8) ວ່າ TSMC ອາດຕ້ອງຍອມເສຍຄ່າປັບເຖິງ 1,000 ລ້ານໂດລາ ຫຼື ຫຼາຍກວ່ານັ້ນ ເພື່ອທີ່ຈະຍຸຕິຂະບວນການສອບສວນຖານລະເມີດກົດໝາຍຄວບຄຸມສົ່ງອອກຂອງສະຫະລັດຯ ຈາກກໍລະນີທີ່ຊິບຂອງ TSMC ໄປປະກົດຢູ່ໃນລະບົບປະມວນຜົນເອໄອຂອງ ຫົວເວ່ຍ ເທັກໂນໂລຢີ

ສະແດງຄຳຄິດເຫັນ