ຈີນອາດແບນໜັງຮໍລີວູດຕອບໂຕ້ທຣຳຂຶ້ນພາສີນຳເຂົ້າສູງເຖິງ 104% ກະທົບໜັກ ວົງການບັນເທີງສະຫະລັດ ທ່າມກາງສົງຄາມການຄ້າທະວີຄວາມຮຸນແຮງອີກຄັ້ງ

 

ທ່າມກາງກະແສຄວາມຕຶງຄຽດໃນສົງຄາມການຄ້າລະຫວ່າງສະຫະລັດອາເມລິກາ ແລະ ຈີນທີ່ກຳລັງທະວີຄວາມຮຸນແຮງຂຶ້ນອີກຄັ້ງ, ປະເດັນຮ້ອນທີ່ຖືກຈັບຕາໃນອາທິດນີ້ ຄືຄວາມເປັນໄປໄດ້ທີ່ຈີນອາດໃຊ້ມາດຕະການຕອບໂຕ້ດ້ວຍການ “ແບນຫນັງຮໍລີວູດ” ຊຶ່ງຈະເປັນການຍົກລະດັບຂໍ້ພິພາດທາງການຄ້າໄປສູ່ແນວໜ້າດ້ານວັດທະນະທຳ ແລະ ຄວາມບັນເທີງ

 

ຕົ້ນຕໍຂອງກະແສດັ່ງກ່າວເລີ່ມຕົ້ນຈາກການເປີດເຜີຍໂດຍບລັອກເກີຊາວຈີນຜູ້ຊົງອິດທິພົນສອງລາຍ ໄດ້ແກ່: ຫຼິວ ຫົງ ບັນນາທິການອາວຸໂສຂອງສຳນັກຂ່າວຊິນຫົວ ແລະ ‘ປະທານກະຕ່າຍ’ ຫຼື ເຫີຣິນ ອີ້ ຫຼານຊາຍຂອງອະດີດຜູ້ນຳພັກຄອມມິວນິສແຫ່ງແຂວງກວາງຕຸ້ງ,

 

ທັງສອງລາຍໄດ້ໂພສຂໍ້ຄວາມລົງໂຊຊຽວເມື່ອວັນອັງຄານທີ່ຜ່ານມາ ເປີດເຜີຍຊຸດມາດຕະການຕອບໂຕ້ທີ່ລັດຖະບານຈີນກຳລັງພິຈາລະນາຢ່າງໃກ້ຊິດ ໜຶ່ງໃນນັ້ນຄືການຈຳກັດ ຫຼື ລະງັບການນຳເຂົ້າຮູບເງົາຈາກສະຫະລັດຯ ລວມເຖິງການເພີ່ມພາສີສິນຄ້າກະສິກຳ ແລະ ບໍລິການຈາກອາເມລິກາ

 

ສັນຍານຕອບໂຕ້ຂອງຈີນມີຂຶ້ນຫຼັງຈາກທີ່ ປະທານາທິບໍດີໂດນັລດ໌ ທຣຳ ປະກາດຂຶ້ນພາສີນຳເຂົ້າສິນຄ້າຈາກຈີນເປັນຢ່າງໜ້ອຍ 104% ໂດຍເລີ່ມມີຜົນໃນວັນທີ 9 ເມສາ 2025 ຫາກຈີນບໍ່ຖອນມາດຕະການພາສີຕອບໂຕ້ທີ່ກາກໍປະກາດໄປກ່ອນໜ້ານີ້ 34% ທຣຳຍັງລະບຸຊັດເຈນຜ່ານໂພສໃນ Truth Social ວ່າຫາກຈີນບໍ່ຍອມຖອຍ ສະຫະລັດຯ ຈະຍຸຕິການເຈລະຈາໃນທຸກມິຕິທັນທີ

 

ກະຊວງການຄ້າຂອງຈີນຖະແຫຼງຕອບໂຕ້ທັນທີ ເມື່ອວັນອັງຄານ ໂດຍວິຈານວ່າການຂົ່ມຂູ່ດ້ວຍພາສີເພີ່ມເຕີມຂອງສະຫະລັດຯ ເປັນ “ຄວາມຜິດພາດຊ້ຳຊ້ອນ” ພ້ອມຢ້ຳວ່າຈີນຈະບໍ່ຍອມອ່ອນຂໍ້ ແລະ “ຈະສູ້ຈົນເຖິງທີ່ສຸດ”

 

ໃນປະເດັນເລື່ອງການແບນຮູບເງົາຮໍລີວູດ, ໂຄສົກກະຊວງການຕ່າງປະເທດຂອງຈີນ ຫຼິນ ເຈີ້ຍນ ກ່າວວ່າ “ພວກເຮົາບໍ່ໃຫ້ຄວາມເຫັນຕໍ່ຄຳເວົ້າເທິງໂລກອອນລາຍ ແຕ່ຈຸດຢືນຂອງຈີນຊັດເຈນ ຈີນຈະດຳເນີນມາດຕະການຢ່າງໝັ້ນຄົງເພື່ອປົກປ້ອງສິດ ແລະ ຜົນປະໂຫຍດຂອງພວກເຮົາຢ່າງຖືກຕ້ອງຕາມກົດໝາຍ”

ສະແດງຄຳຄິດເຫັນ