ທຣຳປະກາດພັກການຂຶ້ນພາສີສິນຄ້ານຳເຂົ້າໃຫ້ປະເທດຕ່າງໆ ເກືອບທັງໝົດເປັນເວລາ 90ມື້ ແຕ່ກັບປັບຂຶ້ນພາສີສິນຄ້າຈີນເປັນ 125% ໂດຍຈະມີການຈັດເກັບພາສີ-ອາກອນສິນຄ້າທົ່ວໄປ 10% ສຳລັບສິນຄ້າຂອງທຸກປະເທດ ຍົກເວັ້ນຈີນ

ທຣຳ ກ່າວວ່າ ອັດຕາພາສີທີ່ສູງຂຶ້ນສຳລັບສິນຄ້າຂອງຈີນນັ້ນ ເປັນເພາະ “ການຂາດຄວາມເຄົາລົບທີ່ຈີນໄດ້ສະແດງຕໍ່ຕະຫຼາດໂລກ” ໃນຊ່ວງເຊົ້າວານນີ້ (9 ເມສາ) ຈີນປະກາດຂຶ້ນພາສີສິນຄ້ານຳເຂົ້າຂອງສະຫະລັດ ເປັນ 84%

ເລີ່ມມີຜົນໃນວັນທີ 10 ເມສາ ຫຼັງທຣຳກຳນົດເກັບພາສີສິນຄ້າຈີນທີ່ເຂົ້າສູ່ສະຫະລັດ  104%  ແຕ່ລ່າສຸດ ທຣຳລະບຸວ່າ ເຂົາໄດ້ເປີດການເຈລະຈາກັບປະທານາທິບໍດີສີ ຈິ້ນຜິງ ຂອງຈີນແລ້ວ ຫຼັງປະກາດເກັບພາສີສິນຄ້າຈີນໃນອັດຕາ 125%

ສ່ວນຕະຫຼາດຫຸ້ນສະຫະລັດ ດີດຕົວແຮງຫຼັງທຣຳປະກາດພັກການເກັບພາສີສິນຄ້ານຳເຂົ້າຈາກຫຼາຍສິບປະເທດເປັນເວລາ 90 ມື້ ມີຜົນທັນທີ ຊຶ່ງເຮັດໃຫ້ບັນດານັກລົງທຶນຜ່ອນຄາຍຄວາມກັງວົນລົງໄດ້ ກ່ຽວກັບຜົນກະທົບຕໍ່ເສດຖະກິດໂລກຈາກນະໂຍບາຍການຄ້າຂອງສະຫະລັດ

ໂດຍດັດຊະນີເອສແອນພີ 500 ປິດຕະຫຼາດເມື່ອວານນີ້ (9 ເມສາ) ເພີ່ມຂຶ້ນ 474.13 ຈຸດ ຫຼື  9.52% ປິດທີ່ 5,456.90 ຈຸດ ຂະນະທີ່ແນສແດັກ ເພີ່ມຂຶ້ນ 1,857.06 ຈຸດ ຫຼື  12.16% ຢູ່ທີ່ 17,124.97 ຈຸດ ແລະ ອຸດສາຫະກຳດາວໂຈນສ໌ ເພີ່ມຂຶ້ນ 2,962.86 ຈຸດ ຫຼື  7.87%  ປິດທີ່ 40,608.45 ຈຸດ ກັບມາຢູ່ໃນວັນທີ່ດີທີ່ສຸດໃນຮອບ 5 ປີສຳລັບຕະຫຼາດຫຸ້ນສະຫະລັດ

ສະແດງຄຳຄິດເຫັນ