ສະພາບການເງິນລະຫວ່າງປະເທດກໍາລັງເຂົ້າສູ່ຈຸດປ່ຽນແປງ ເມື່ອທະນາຄານກາງຈີນ (PBoC) ໄດ້ປະກາດວ່າ ລະບົບການຊໍາລະເງິນຂ້າມຊາຍແດນຂອງ “ສະກຸນເງິນດິຈິຕອລຢວນ” ຈະເຊື່ອມຕໍ່ກັບ “10 ປະເທດໃນອາຊຽນ” ແລະ “6 ປະເທດໃນຕາເວັນອອກກາງ” ເຊິ່ງໝາຍຄວາມວ່າ ປະມານ 38% ຂອງການຄ້າລະຫວ່າງປະເທດ ອາດສາມາດຫຼີກລ່ຽງການໃຊ້ເງິນໂດລາໃນລະບົບ SWIFT ທີ່ຄອບຄອງຕະຫຼາດ

 

ໃນຂະນະທີ່ລະບົບ SWIFT ໃຊ້ເວລາເຮັດທຸລະກໍາ “3-5 ວັນ” ແລະ ມີຕົວກາງຫຼາຍຝ່າຍ, ແຕ່ສະກຸນເງິນດິຈິຕອລຢວນຂອງຈີນ ຖືກອອກແບບມາເພື່ອຫຼຸດຜ່ອນໄລຍະເວລາໃນການເຮັດທຸລະກໍາໃຫ້ເຫຼືອພຽງແຕ່ “ບໍ່ເທົ່າໃດວິນາທີ” ໂດຍໂຄງການນໍາລ່ອງລະຫວ່າງຮ່ອງກົງ ແລະ ອາບູດາບີ ເຮັດໃຫ້ການຊໍາລະເງິນສໍາເລັດໃນເວລາພຽງແຕ່ປະມານ “7 ວິນາທີ” ໂດຍມີຄ່າທໍານຽມຫຼຸດລົງເຖິງ 98%

 

ນອກຈາກຄວາມໄວແລ້ວ, ໂຄງສ້າງບລັອກເຊນຂອງສະກຸນເງິນດິຈິຕອລຢວນທີ່ຮັກສາ “ຄວາມສາມາດໃນການຕິດຕາມທຸລະກໍາໄດ້” ຊ່ວຍຕ້ານການຟອກເງິນໂດຍອັດຕະໂນມັດ, ຫຼຸດຜ່ອນຄວາມສ່ຽງຈາກການສໍ້ໂກງ

 

ໃນຂະນະດຽວກັນ, ກໍລະນີທົດສອບອີກຄັ້ງລະຫວ່າງຈີນ ແລະ ອິນໂດເນເຊຍ, ການຊໍາລະເງິນຂ້າມຊາຍແດນສໍາເລັດພາຍໃນ 8 ວິນາທີ ເຊິ່ງເປັນເວລາທີ່ສັ້ນກວ່າວິທີການແບບດັ້ງເດີມຫຼາຍ.

 

ຄວາມມີປະສິດທິພາບນີ້ໄດ້ດຶງດູດທະນາຄານກາງ 23 ແຫ່ງໃຫ້ເຂົ້າຮ່ວມທົດສອບການເຊື່ອມຕໍ່, ໂດຍຜູ້ຄ້າພະລັງງານໃນຕາເວັນອອກກາງລາຍງານວ່າ ຊ່ວຍຫຼຸດຄ່າໃຊ້ຈ່າຍໃນການຊໍາລະເງິນເຖິງ 75%

 

ໃນລະຫວ່າງທີ່ສະຫະລັດໃຊ້ລະບົບ SWIFT ເປັນເຄື່ອງມືຄວໍ່າບາດຕໍ່ຣັດເຊຍ, ອີຣ່ານ, ແລະ ປະເທດອື່ນໆ, ຈີນໄດ້ດໍາເນີນການຢ່າງຮອບຄອບໃນການສ້າງລະບົບການຊໍາລະເງິນໃໝ່ນີ້, ເຊິ່ງການຄ້າພາຍໃຕ້ເງິນຢວນຂອງອາຊຽນ ພຸ່ງສູງເຖິງ 5.8 ລ້ານລ້ານຢວນໃນປີ 2024 ໂດຍມາເລເຊຍ, ສິງກະໂປ, ແລະ ປະເທດອື່ນໆ ໄດ້ເພີ່ມເງິນສະກຸນນີ້ເຂົ້າສູ່ທຶນສໍາຮອງລະຫວ່າງປະເທດຂອງພວກເຂົາ

 

ບໍ່ພຽງແຕ່ເທົ່ານັ້ນ, ການເຮັດທຸລະກໍາ “ຊື້ຂາຍນໍ້າມັນດ້ວຍເງິນຢວນດິຈິຕອລ” ຄັ້ງທໍາອິດຂອງປະເທດໄທ ເປັນອີກໜຶ່ງເລື່ອງລາວຄວາມສໍາເລັດຂອງລະບົບນີ້, ເຊິ່ງສະແດງໃຫ້ເຫັນເຖິງການເສື່ອມຖອຍຂອງການຄອບຄອງຕະຫຼາດໂດລາຢ່າງຊ້າໆ

ສະແດງຄຳຄິດເຫັນ