ເປີດສູດ ສະຫະລັດຯ ຂຶ້ນພາສີນຳເຂົ້າຈາກຈີນສູງເຖິງ 245% ທຣຳລຸຍຕອບໂຕ້ສຶກແຮ່ຫາຍາກ ເບື້ອງຫຼັງສົງຄາມເສດຖະກິດຄັ້ງໃໝ່ທີ່ເດີມພັນດ້ວຍຄວາມໝັ້ນຄົງຂອງປະເທດ

 

ບໍ່ແມ່ນຕົວເລກຫຼຸດ ຫຼື ພິມຜິດຢ່າງທີ່ຫຼາຍຄົນສົງໄສ ລັດຖະບານສະຫະລັດພາຍໃຕ້ການນຳຂອງປະທານາທິບໍດີໂດນັລດ໌ ທຣຳ ຢືນຢັນຊັດເຈນແລ້ວວ່າ ພາສີນຳເຂົ້າສິນຄ້າບາງປະເພດຈາກຈີນຖືກປັບຂຶ້ນສູງສຸດເຖິງ 245% ຈິງ ແລະ ເປັນຕົວເລກທີ່ມີທີ່ມາທີ່ໄປ

 

ພາສີ 245% ຄິດຈາກຫຍັງ?

 

ຈາກຖະແຫຼງການຂອງທຳນຽບຂາວ, ສະຫະລັດຯ ບໍ່ໄດ້ຕັ້ງພາສີ 245% ໃນລາຍການດຽວ ແຕ່ເປັນການລວມຫຼາຍມາດຕະການພາສີທີ່ຊ້ອນທັບກັນ ຈົນກາຍເປັນຕົວເລກສູງ ໂດຍສະເພາະກັບສິນຄ້າຈີນບາງປະເພດ ຊຶ່ງຖືກຈັດຢູ່ໃນກຸ່ມເປົ້າໝາຍສຳຄັນ.

 

ທັງນີ້, ມາດຕະການທີ່ນຳມາລວມກັນມີດັ່ງນີ້:

 

• ພາສີຖານ 10% ທີ່ໃຊ້ກັບສິນຄ້ານຳເຂົ້າທັງໝົດເປັນພື້ນຖານ

 

• ພາສີຕອບໂຕ້ 125% ທີ່ໃຊ້ເພື່ອຕອບກັບຈີນ ຫຼັງຈາກທີ່ຈີນຕັ້ງກຳແພງພາສີຕໍ່ສິນຄ້າສະຫະລັດໃນລະດັບດຽວກັນ

 

• ພາສີພິເສດ 20% ທີ່ເຊື່ອມໂຍງກັບບົດບາດຂອງຈີນໃນບັນຫາການລັກລອບນຳເຂົ້າເຟນທານິລ

 

• ພາສີພາຍໃຕ້ກົດໝາຍ Trade Act ມາດຕາ 301 ຊຶ່ງກຳນົດໄວ້ລະຫວ່າງ 7.5% ເຖິງ 100% ຂຶ້ນຢູ່ກັບປະເພດສິນຄ້າແລະພຶດຕິກຳທາງການຄ້າທີ່ສະຫະລັດມອງວ່າບໍ່ເປັນທຳ

 

ດັ່ງນັ້ນ ໃນກໍລະນີຂອງສິນຄ້າບາງລາຍການ ຫາກສະຫະລັດຯ ນຳພາສີຈາກແຕ່ລະໝວດທີ່ກ່ຽວຂ້ອງມາລວມກັນ ເຊັ່ນ: 125% (ພາສີຕອບໂຕ້) + 20% (ເຟນທານິລ) + 100% (ພາສີຕາມ Section 301) = 245%

 

ນັ່ນຄືທີ່ມາຂອງຕົວເລກ 245% ຊຶ່ງບໍ່ແມ່ນພາສີດຽວ ແຕ່ເປັນຜົນລວມຈາກມາດຕະການຫຼາຍທາງທີ່ຊ້ອນທັບກັນກັບສິນຄ້າບາງປະເພດ ໂດຍສະເພາະສິນຄ້າທີ່ກ່ຽວຂ້ອງກັບແຮ່ຫາຍາກຫຼືສິນຄ້າທີ່ກ່ຽວຂ້ອງກັບຄວາມໝັ້ນຄົງແຫ່ງຊາດແລະສົງຄາມການຄ້າ ຫຼື ໃນບາງກໍລະນີ ອາດບວກຈາກ 125% + 20% + 10% (ຖານ) + 90% (Section 301) = 245% ເຊັ່ນກັນ.

 

ທັງໝົດນີ້ເກີດຂຶ້ນທ່າມກາງການຕອບໂຕ້ກັນລະຫວ່າງສະຫະລັດ ແລະ ຈີນໃນເວທີການຄ້າລະຫວ່າງປະເທດ ໂດຍຈີນເອງກໍບໍ່ໄດ້ນິ່ງເສີຍ ຕອບໂຕ້ດ້ວຍການຕັ້ງກຳແພງພາສີຂອງຕົນເອງສູງເຖິງ 125% ພ້ອມທັງອອກຂໍ້ຈຳກັດໃນການສົ່ງອອກແຮ່ຫາຍາກຊະນິດຕ່າງໆ ໄປຍັງສະຫະລັດ ຊຶ່ງລວມເຖິງການລະງັບການສົ່ງອອກແມ່ເຫຼັກແຮ່ຫາຍາກ 6 ຊະນິດໃນເດືອນນີ້ ສົ່ງຜົນກະທົບໂດຍກົງຕໍ່ອຸດສາຫະກຳເອເລັກໂຕຣນິກ, ການບິນ ແລະ ການປ້ອງກັນປະເທດຂອງອາເມລິກາ.

 

ພາສີ 245% ນີ້ຍັງເຊື່ອມໂຍງກັບຄຳສັ່ງບໍລິຫານລ່າສຸດຂອງທຣຳ ເມື່ອວັນທີ 15 ເມສາ ທີ່ໃຫ້ກະຊວງການຄ້າສະຫະລັດເປີດການສອບສວນວ່າ ການເພິ່ງພາການນຳເຂົ້າວັດຖຸດິບຫາຍາກຈາກຕ່າງປະເທດ ໂດຍສະເພາະຈາກຈີນ ກໍ່ໃຫ້ເກີດ “ໄພຂົ່ມຂູ່ຕໍ່ຄວາມໝັ້ນຄົງຂອງຊາດ” ຫຼື ບໍ່.

 

ຫາກຜົນການສອບສວນຊີ້ວ່າເປັນໄພຈິງ, ສະຫະລັດອາດໃຊ້ອຳນາດພາຍໃຕ້ Section 232 ຂອງກົດໝາຍ Trade Expansion Act ປີ 1962 ເພື່ອກຳນົດພາສີເພີ່ມເຕີມຫຼືອອກມາດຕະການອື່ນໆ ໄດ້ອີກ.

ສະແດງຄຳຄິດເຫັນ