ລັດຖະບານທະຫານມຽນມາ ອະໄພໂທດນັກໂທດ 4,893 ຄົນ ເນື່ອງໃນໂອກາດເທດສະການປີໃໝ່ມຽນມາ ເພື່ອໃຫ້ບຸກຄົນເຫຼົ່ານີ້ເຂົ້າມາມີສ່ວນຮ່ວມໃນຂະບວນການສ້າງລັດ

ວັນນີ້ (17 ເມສາ2568) ຄອບຄົວ ແລະ ຍາດພີ່ນ້ອງຂອງນັກໂທດ ເດີນທາງມາລໍຖ້າທີ່ເຮືອນຈຳໃນນະຄອນຢ່າງກຸ້ງຂອງມຽນມາ ຫຼັງຊາບຂ່າວວ່າລັດຖະບານທະຫານມຽນມາອະໄພໂທດຜູ້ຕ້ອງຂັງຈຳນວນຫຼາຍເນື່ອງໃນມື້ປີໃຫມ່

ສະຖານີໂທລະພາບເອັມອາທີວີຂອງທາງການມຽນມາ ລາຍງານວ່າ ພົນເອກອາວຸໂສມິນ ອອງ ໄລງ໌ ຜູ້ນຳລັດຖະບານທະຫານເມຍນມາ ອະໄພໂທດຜູ້ຕ້ອງຂັງ 4,893 ຄົນ. ໃນຈຳນວນນີ້ລວມເຖິງຊາວຕ່າງຊາດ 13 ຄົນ ທີ່ຈະຖືກເນລະເທດຫຼັງໄດ້ຮັບການປ່ອຍຕົວ.

ຂະນະທີ່ນັກໂທດບາງສ່ວນໄດ້ຮັບການຫຼຸດໂທດໃນໂອກາດນີ້ດ້ວຍ ແຕ່ບໍ່ນັບລວມຜູ້ນັກໂທດຄະດີອຸກໂຈນກຳ ໃນຖານຄວາມຜິດຂ້າຜູ້ອື່ນ, ຂົ່ມຂືນກະທຳຊຳເລົາ, ກໍ່ການຮ້າຍ ແລະ ການລວມຕົວກັນຢ່າງຜິດກົດໝາຍ.

ແຖລງການຂອງລັດຖະບານທະຫານມຽນມາ ລະບຸດ້ວຍວ່າ ການຕັດສິນໃຈຄັ້ງນີ້ເພື່ອຕ້ອງການໃຫ້ຜູ້ທີ່ໄດ້ຮັບການປ່ອຍຕົວເຂົ້າມາມີສ່ວນຮ່ວມໃນຂະບວນການສ້າງລັດ

ເພື່ອຄວາມສະຫງົບສຸກຂອງປະຊາຊົນ ແລະ ຖືເປັນການສົ່ງມອບຄວາມເມດຕາກະລຸນາຈາກລັດ.

ສຳລັບການປະກາດອະໄພໂທດຜູ້ນັກໂທດຈຳນວນຫຼາຍໃນໂອກາດສຳຄັນ ຖືເປັນສິ່ງທີ່ເກີດຂຶ້ນເປັນປະຈຳໃນມຽນມາ.

ຂະນະທີ່ບຸກຄົນລະດັບສູງທາງການເມືອງທີ່ຖືກຄຸມຂັງໂດຍລັດຖະບານທະຫານມຽນມາ ລວມເຖິງອອງ ຊານ ຊູ ຈີ ອະດີດທີ່ປຶກສາແຫ່ງລັດ ບໍ່ໄດ້ຮັບການອະໄພໂທດໃນຄັ້ງນີ້.

ອີກທັງຍັງບໍ່ຊາບແນ່ຊັດວ່າມີນັກໂທດຄະດີການເມືອງໄດ້ຮັບການປ່ອຍຕົວຫຼາຍນ້ອຍພຽງໃດ.

ສະແດງຄຳຄິດເຫັນ