ສຳນັກຂ່າວຕ່າງປະເທດ ລາຍງານອ້າງອີງການຖະແຫຼງຂອງກະຊວງພາຍຊິດຈີນໃນມື້ນີ້ (21 ເມສາ 2025)

ລະບຸວ່າ ລັດຖະບານປັກກິ່ງໄດ້ອອກມາເຕືອນປະເທດຕ່າງໆ ວ່າທາງການຈີນຈະຄັດຄ້ານຢ່າງເຕັມທີ່ຫາກມີຝ່າຍໃດ ຫຼື ປະເທດໃດກໍຕາມເຮັດຂໍ້ຕົກລົງທີ່ເຮັດໃຫ້ຈີນເສຍປະໂຫຍດ ແລະ ຫາກສິ່ງນີ້ເກີດຂຶ້ນ ຈີນຈະບໍ່ຍອມຮັບ ແລະ ຈະໃຊ້ມາດຕະການຕອບໂຕ້ທີ່ເດັດຂາດ ແລະ ເທົ່າທຽມ

ທາງກະຊວງຢ້ຳວ່າ ລັດຖະບານຈີນມຸ້ງໝັ້ນ ແລະ ມີສັກຍະພາບພຽງພໍທີ່ຈະປົກປ້ອງສິດ ແລະ ຜົນປະໂຫຍດຂອງຈີນ ແລະ ຍິນດີຈະກະຊັບຄວາມຮ່ວມມືກັບທຸກໆຝ່າຍ

ຂະນະທີ່ໂຄສົກກະຊວງພາຍຊິດຈີນລະບຸວ່າ ສະຫະລັດໃຊ້ພາສີ-ອາກອນເປັນເຄື່ອງມືກົດດັນຄູ່ຄ້າທຸກປະເທດ ໂດຍອ້າງສິ່ງທີ່ພວກເຂົາເອີ້ນວ່າເທົ່າທຽມ ແຕ່ໃນຂະນະດຽວກັນກໍບີບໃຫ້ທຸກປະເທດຕ້ອງຍອມເຈລະຈານຳ

ທັງນີ້ຄຳຖະແຫຼງຂອງກະຊວງການຄ້າ ຈີນເປັນການຕອບໂຕ້ ຫຼັງຈາກມີຂ່າວວ່າລັດຖະບານປະທານາທິບໍດີ ໂດນັລດ໌ ທຣຳ ກຳລັງກຽມກົດດັນໃຫ້ຊາດຕ່າງໆ ລົດມູນຄ່າການຄ້າກັບຈີນລົງ ເພື່ອແລກກັບການທີ່ສະຫະລັດຯ ຈະລົດ ຫຼື ຍົກເວັ້ນພາສີ-ອາກອນໃຫ້ ແລະ ວໍຊິງຕັນອາດນຳມາດຕະການຄວ່ຳບາດທາງການເງິນມາໃຊ້ຮ່ວມດ້ວຍ.

ຊຶ່ງກ່ອນໜ້ານີ້ປະທານາທິບໍດີທຣຳ ປະກາດຊະລໍການຂຶ້ນພາສີຕອບໂຕ້ໄປຍັງປະເທດຄູ່ຄ້າຫຼາຍສິບປະເທດທົ່ວໂລກທີ່ປະກາດໄປເມື່ອວັນທີ 2 ເມສາ 2025 ເປັນເວລາ 90 ວັນ ແລະ ບັນດາຊາດຕ່າງໆກໍພາກັນເຂົ້າມາເຈລະຈາຕໍ່ລອງເພື່ອລົດພາສີ ຍົກເວັ້ນພຽງແຕ່ຈີນປະເທດດຽວ ທີ່ສະຫະລັດບໍ່ມີການຊະລໍມາດຕະການໃຫ້ ແລະ ຍັງເພີ່ມອັດຕາພາສີຂຶ້ນຢ່າງຕໍ່ເນື່ອງຈົນສູງເຖິງ 145% ຊຶ່ງເຮັດໃຫ້ຈີນຕອບໂຕ້ດ້ວຍການສັ່ງຮີດພາສີສິນຄ້າອາເມລິກັນ 125%

ພ້ອມກັນນີ້ທາງການຈີນຍັງກຽມຂໍເປີດການປະຊຸມຄະນະລັດຖະມົນຕີຄວາມໝັ້ນຄົງແຫ່ງສະຫະປະຊາຊາດ ແບບບໍ່ເປັນທາງການໃນອາທິດນີ້ເພື່ອກ່າວຫາສະຫະລັດຯ ວ່າມີພຶດຕິກຳກົດຂີ່ຂົ່ມເຫັງ ແລະ ບັ່ນທອນຄວາມພະຍາຍາມຂອງໂລກທີ່ຈະແສວງຫາສັນຕິພາບ ແລະ ການພັດທະນາ ດ້ວຍການນຳພາສີ-ອາກອນມາໃຊ້ເປັນອາວຸດ

ໂດຍກ່ອນໜ້ານີ້ ເມື່ອຕົ້ນເດືອນ ເມສາ 2025 ເຈມີສັນ ກຣີເອີ ຜູ້ແທນການຄ້າສະຫະລັດຯ (USTR) ປະກາດວ່າ ມີເກືອບ 50 ປະເທດທີ່ເຂົ້າຫາສະຫະລັດຯ ເພື່ອຂໍເຈລະຈາລົດພາສີ ຫຼັງຈາກນັ້ນການເຈລະຈາກັບຄູ່ຄ້າໃນແບບທະວິພາຄີໄດ້ເກີດຂຶ້ນຕັ້ງແຕ່ນັ້ນມາ ໂດຍຍີ່ປຸ່ນກຳລັງພິຈາລະນາເພີ່ມການນຳເຂົ້າຖົ່ວເຫຼືອງ ແລະ ເຂົ້າຈາກສະຫະລັດຯ ເພື່ອໃຊ້ເປັນເງື່ອນໄຂຕໍ່ລອງກັບທຣຳ.

ໃນຂະນະທີ່ອິນໂດເນເຊຍກໍມີແຜນຈະເພີ່ມການນຳເຂົ້າອາຫານ ແລະ ສິນຄ້າອຸປະໂພກບໍລິໂພກຈາກສະຫະລັດຯ ແລະ ລົດການສັ່ງຊື້ຈາກຊາດອື່ນ

ຂະນະທີ່ລັດຖະບານສະຫະລັດກຳລັງພະຍາຍາມສະກັດກັ້ນການພັດທະນາຂອງຈີນໃນດ້ານອຸດສາຫະກຳເຊມິຄອນດັກເຕີຊິບລະດັບກ້າວໜ້າ ຊຶ່ງສະຫະລັດຯ ອ້າງວ່າອາດຖືກນຳໄປໃຊ້ໃນປະໂຫຍດທາງການທະຫານ ແລະ ອາທິດທີ່ແລ້ວກໍໄດ້ເລີ່ມເກັບຄ່າທຳນຽມທ່າເຮືອສູງລິ່ວກັບເຮືອສິນຄ້າທີ່ຜະລິດໃນຈີນເພື່ອລົດອິດທິພົນຂອງປັກກິ່ງໃນອຸດສາຫະກຳການຕໍ່ເຮືອດ້ວຍ

Nvidia ຊຶ່ງເປັນຜູ້ຜະລິດຊິບເອໄອລາຍໃຫຍ່ຂອງສະຫະລັດຯ ອອກມາຍອມຮັບເມື່ອອາທິດທີ່ແລ້ວວ່າບໍລິສັດຈະຕ້ອງແບກຄ່າໃຊ້ຈ່າຍສູງເຖິງ 5,500 ລ້ານໂດລາ ເນື່ອງຈາກສະຫະລັດຯ ຈຳກັດການສົ່ງອອກຊິບ H20 ໄປຍັງຈີນ

ດ້ານປະທານາທິບໍດີ ສີ ຈິ້ນຜິງ ຜູ້ນຳຂອງຈີນກໍໄດ້ອອກເດີນສາຍຢ້ຽມຢາມ 3 ຊາດໃນອາຊຽນເມື່ອອາທິດທີ່ແລ້ວ ເພື່ອກະຊັບຄວາມສຳພັນໃຫ້ໜຽວແໜ້ນຂຶ້ນທ່າມກາງມໍລະສຸມການຄ້າໂລກທີ່ທະວີຄວາມຮຸນແຮງ ໂດຍ ສີ ຍັງຮຽກຮ້ອງໃຫ້ປະເທດຄູ່ຄ້າເຫຼົ່ານີ້ຕໍ່ຕ້ານພຶດຕິກຳກົດຂີ່ຝ່າຍດຽວຂອງສະຫະລັດຯ ແລະ ຢ້ຳດ້ວຍບໍ່ມີຜູ້ຊະນະໃນສົງຄາມການຄ້າ ແລະ ສົງຄາມພາສີ

ສະແດງຄຳຄິດເຫັນ